અમદાવાદ મ્યુનિસિપલ કોર્પોરેશન અને પોલીસ દ્વારા સંયુક્ત રીતે BRTS કોરિડોરમાં ગેરકાયદેસર રીતે વાહન ચલાવતા વાહનચાલકો સામે ખાસ ડ્રાઇવનું આયોજન કરવામાં આવ્યું હતું. જાહેર પરિવહનને સુગમ બનાવવા માટે અલગ રાખવામાં આવેલા આ કોરિડોરમાં અન્ય વાહનોના પ્રવેશને કારણે થતી અડચણોને દૂર કરવા માટે આ કાર્યવાહી હાથ ધરવામાં આવી હતી. AMC અને પોલીસની સંયુક્ત ટીમે આ ડ્રાઇવ દરમિયાન BRTS કોરિડોરમાં પ્રવેશતા અને વાહન ચલાવતા વાહનચાલકો સામે કડક કાર્યવાહી કરી હતી

આ ડ્રાઇવ દરમિયાન કુલ 53 વાહનોને રોકવામાં આવ્યા હતા. આ 53 વાહનચાલકો પાસેથી સ્થળ પર જ કુલ રૂ.85,000નો દંડ વસૂલવામાં આવ્યો હતો. BRTS કોરિડોર માત્ર બસો માટે આરક્ષિત છે અને તેમાં અન્ય વાહનોનો પ્રવેશ કાયદેસર રીતે પ્રતિબંધિત છે.

ખાનગી વાહનો દ્વારા આ કોરિડોરનો ઉપયોગ કરવાથી માત્ર ટ્રાફિકના નિયમોનું ઉલ્લંઘન થતું નથી પરંતુ તે BRTS બસોની ગતિ અને સમયપાલનને પણ અસર કરે છે. AMC અને પોલીસે સ્પષ્ટ કર્યું છે કે ભવિષ્યમાં પણ જાહેર સુરક્ષા અને ટ્રાફિક વ્યવસ્થા જાળવવા માટે આ પ્રકારની ડ્રાઇવ્સ ચાલુ રહેશે. જેથી નિયમોનું ઉલ્લંઘન કરનારા વાહનચાલકો સામે કડક પગલાં લઈ શકાય.