તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
રોડ -રસ્તાના કામોની એજન્સી સામે કાર્યવાહી અમારે કરવાની ? ભૂપેન્દ્રભાઇ ઉકળી ઉઠયા
ગુજરાતભરના કોર્પોરેશનના પદાધિકારીઓ, કમિશનર સહિતના સાથે માર્ગો અંગે વિડીયો કોન્ફરન્સ કરતા મુખ્યમંત્રી : તંત્ર વધુ ધ્યાન રાખે- મોનીટીંગ કરે : શહેરમાં રસ્તાનો રી-સર્વે શરૂ : સપ્તાહમાં નવા રસ્તાનો રીપોર્ટ થશે તૈયાર
રાજકોટ, તા. ૧૪ : રાજયભરમાં રોડ-રસ્તાની ખાસ્તા હાલતને ધ્યાનમાં રાખી મુખ્યમંત્રી ભૂપેન્દ્રભાઇએ તમામ કોર્પોરેશનના પદાધિકારીઓ તથા અધિકારીઓનો ઉઘડો લીધો હતો. તેમણે તંત્રને ચાલી રહેલ કામ ઉપર ધ્યાન આપવા મોનીટરીંગ કરવા તાકીદ કરેલ. ઉપરાંત આવતા અઠવાડીયે રસ્તાઓનો સર્વે કરી સ્થિતિ જણાશે. મ્યુ. કમિશનર ચૂંટણીના નોડલ ઓફીસર હોય અને ૭૦૦ થી ૮૦૦ નો સ્ટાફ પણ ચૂંટણી કામમાં રોકાયેલ હોવાથી ૩૦ નવેમ્બર સુધી વિવિધ વિભાગો ઉપર પણ અસર પડી છે.
મુખ્યમંત્રી ભૂપેન્દ્રભાઇએ મ્યુ. કમિશનર સાથેની વીસી દરમિયાન સ્પષ્ટે જણાવેલ કે, શું રોડ -રસ્તા અંગેના પગલા અમારે લેવાના છે ? અને નિયમિત રીતે રીપોર્ટ આપવા પણ સુચના આપી હતી.
મુખ્યમંત્રી ભૂપેન્દ્રભાઇ પટેલે રાજ્યમાં ધોરી માર્ગો તથા મહાનગરો અને નગરોના રોડ-રસ્તાના કામોની ક્વોલિટીમાં કોઇપણ ે બાંધછોડ રાજ્ય સરકાર ચલાવશે નહી તેવા સ્પષ્ટ દિશાનિર્દેશો ગાંધીનગરમાં નાયબ મુખ્યમંત્રી હર્ષ સંઘવી, નાણાં મંત્રી કનુભાઈ દેસાઈ અને મુખ્ય સચિવ એમ.કે. દાસની ઉપસ્થિતિમાં યોજાયેલી ઉચ્ચસ્તરીય બેઠકમાં આપ્યા હતા.
રાજ્યના મહાનગરોના મેયર સ્ટેન્ડિંગ કમિટીના અધ્યક્ષો, મ્યુનિસિપલ કમિશનરો અને રિજનલ મ્યુનિસિપલ કમિશનરો બેઠકમાં વિડિયો કોન્ફરન્સીંગના માધ્યમથી જોડાયા હતા અને તેમના નગરો-મહાનગરોની રોડ-રસ્તાની સ્થિતિની વિગતો મુખ્યમંત્રીને આપી હતી.
ભૂપેન્દ્રભાઇ પટેલે શાસનદાયિત્વ સંભાળ્યું ત્યારથી રાજ્યમાં માર્ગો-રોડ-રસ્તા-પૂલોના બાંધકામમાં ક્વોલિટી પર સતત ભાર મૂકયો છે.
આવા પ્રજાહિતના કામોમાં ક્વોલિટીમાં કોમ્પ્રોમાઈઝ કે બાંધછોડ કરવાની વાત ચલાવી લેતા નથી તેની પ્રતીતિ તેમણે અનેકવાર કરાવી છે. તાજેતરમાં ૩ કોન્ટ્રાક્ટરોને બ્લેકલિસ્ટ કરવામાં આવ્યા છે.
એટલું જ નહીં, હલકી ગુણવત્તાના કામો કરનારા ૧૩થી વધુ કોન્ટ્રાક્ટરોને આ વર્ષે બ્લેકલિસ્ટ કરવા સુધીના સખત શિક્ષાત્મક પગલાં પણ મુખ્યમંત્રીશ્રીની સીધી સૂચનાથી લેવાયા છે.
આ બેઠકમાં ભૂપેન્દ્રભાઇએ સ્પષ્ટપણે જણાવ્યું કે, માર્ગો પરના પોટહોલ્સ પુરવાના કામો અગ્રતા ક્રમે હાથ ધરાય એટલુ જ નહી, સંબંધિત અધિકારીઓ, મ્યુનિસિપલ કમિશનરો અને ડેપ્યુટી કમિશનરો નિયમિત પણે ફિલ્ડ વિઝીટ કરીને કામોની ગુણવત્તા ચકાસતા રહે અને ૩૦મી નવેમ્બર સુધીમાં રોડ-રસ્તાની સમગ્રતયા સ્થિતિનો સ્થળ અહેવાલ રજૂ કરે.
જે સ્થળોએ બ્રિજના કામો થતા હોય ત્યાં ડાયવર્ઝન માટેના આર.સી.સી. રોડ બને જેથી સંબંધિત કામ પૂરૂ થાય ત્યાં સુધી નાગરિકોને વાહન-વ્યવહાર માટે કોઈ અગવડ ન પડે તે માટે પણ તેમણે બેઠકમાં સંબંધિત અધિકારીઓને સૂચનો કર્યા હતા.
મુખ્યમંત્રી ભૂપેન્દ્રભાઇ પટેલે તાજેતરમાં રાજ્ય મંત્રીમંડળની બેઠકમાં પણ પ્રભારી મંત્રીઓ તેમના જિલ્લાઓમાં રોડની સ્થિતિની સમીક્ષા સંબંધિત અધિકારીઓ સાથે બેઠક યોજીને તા. ૩૦ નવેમ્બર સુધીમાં પૂરી કરીને સ્થળ-સ્થિતિનો અહેવાલ સત્વરે આપવા માટે પણ સૂચના આપી હતી.
તેમણે આ ઉચ્ચસ્તરીય બેઠકમાં એમ પણ જણાવ્યું કે, જે રોડ-રસ્તા મેન્ટેનન્સ ગેરેન્ટી પિરીયડ દરમિયાન તૂટી જાય તો તેના કોન્ટ્રાક્ટર્સને તાત્કાલિક બ્લેક લિસ્ટ કરવા સહિતની કાયદાકીય કાર્યવાહી થવી જોઈએ.
નાયબ મુખ્યમંત્રી હર્ષ સંઘવીએ આ બેઠકમાં કહ્યુ કે, શહેરોમાં રેલ્વે સ્ટેશન, બસ સ્ટેશન, માર્કેટ જેવા સ્થળો જ્યાં લોકોની વધુ અવર-જવર હોય ત્યાં રોડ રિપેરીંગના કામોની લોકોને અનુભૂતિ થાય તે રીતે શહેરી સત્તાતંત્રો અને માર્ગ-મકાન વિભાગ કામગીરી કરે. માર્ગ દુરસ્તી માટેની મળતી ફરિયાદોનું સત્વરે નિવારણ આવે સાથોસાથ અન્ય રિપેરીંગ અને રસ્તાના નવા કામો પણ થતા રહે તે જરૂરી છે તેમ તેમણે ઉમેર્યુ હતુ.
આ ઉચ્ચસ્તરીય બેઠકમાં મુખ્યમંત્રીના સલાહકાર એસ.એસ. રાઠૌર, શહેરી વિકાસ અગ્ર સચિવ એમ. થેન્નારસન, મુખ્યમંત્રીના અધિક અગ્ર સચિવ અવંતિકા સિંઘ, કમિશનર ઓફ મ્યુનિસિપાલિટીઝ રેમ્યા મોહન, માર્ગ-મકાન સચિવ પ્રભાત પટેલિયા, મુખ્યમંત્રીના ઓ.એસ.ડી. ધીરજ પારેખ અને માર્ગ-મકાન તથા શહેરી વિકાસ વિભાગના સંબંધિત અધિકારીઓ ઉપસ્થિત રહ્યા હતા.
(3:49 PM IST)
છેલ્લા 8 દિવસમાં સૌથી લોકપ્રિય 
