તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
સુરતના ઉદ્યોગપતિએ ૨૯૦ ખેડૂતોને ૯૦ લાખનું દાન આપી દેવામુક્ત કર્યા
માનવતાનું અનોખું ઉદાહરણ : પોતાની દિવંગત માતાની પુણ્યતિથિ નિમિત્તે રૂ. ૮૯,૮૯,૨૦૯નું દાન આપીને અમરેલી જિલ્લાના જીરા ગામના ૨૯૦ ખેડૂતોને છેલ્લા ૧૦૦ વર્ષથી ચાલી આવતા બોગસ ધિરાણના બોજમાંથી મુક્ત કર્યા
સુરત તા.૪: શું પૈસાથી લાગણી ખરીદી શકાય? કદાચ નહીં, પરંતુ પૈસાનો સદુપયોગ કરીને દુઃખી લોકોના જીવનમાં આનંદ ભરી શકાય છે. માનવતાનું આવું જ એક અનોખું ઉદાહરણ સુરતના ઉદ્યોગપતિ બાબુભાઈ જીરાવાલા (ચોડવડિયા) એ પૂરું પાડ્યું છે. તેમણે પોતાની દિવંગત માતાની પુણ્યતિથિ નિમિત્તે રૂ. ૮૯,૮૯,૨૦૯નું દાન આપીને અમરેલી જિલ્લાના જીરા ગામના ૨૯૦ ખેડૂતોને છેલ્લા ૧૦૦ વર્ષથી ચાલી આવતા બોગસ ધિરાણના બોજમાંથી મુક્ત કર્યા છે.
જીરા ગામમાં વર્ષ ૧૯૯૫થી ચાલી આવતા જીરા સેવા સહકારી મંડળીના બોગસ ધિરાણના વિવાદે ૨૯૦ ખેડૂત પરિવારોની ઊંઘ હરામ કરી દીધી હતી.
ખેડૂતોનું દુઃખઃ આ બોજાને કારણે ખેડૂતોની જમીન (સાત-બાર) પર દેવાનો ડાઘ લાગી ગયો હતો. પરિણામે, તેમને સરકાર તરફથી મળતી કોઈ સહાય, લોન કે અન્ય સુવિધાઓ મળતી નહોતી. વળી, ભાઈ-ભાગમાં જમીનનું વિભાજન કરવામાં પણ આ બોજો મોટું નડતરરૂપ બનતો હતો.
નિરાશાઃ ખેડૂતોએ આંદોલનો કર્યા, અનેક રજૂઆતો કરી અને સરકારે તપાસ પંચ પણ નીમ્યું, પણ વહીવટકર્તાઓએ રકમ ન ભરતા ખેડૂતો નિરાશ હતા.
ઉદ્યોગપતિ બાબુભાઈ અને તેમના મોટાભાઈ ઘનશ્યામભાઈએ પોતાની માતાની પુણ્યતિથિને યાદગાર બનાવવાનું નક્કી કર્યું. બાબુભાઈએ ખૂબ જ લાગણી સાથે જણાવ્યું કે, તેમના આ ઉમદા કાર્ય પાછળની પ્રેરણા તેમની માતા હતી.
મોટો નિર્ણયઃ તેમણે નક્કી કર્યું કે આ વખતે એવું કાર્ય કરવું છે કે જેથી માતાનું નામ ભલે તકતીમાં ન લખાય, પણ ખેડૂતોના દિલમાં ચોક્કસ લખાય.
લાભ પાંચમે પુણ્ય કાર્યઃ આ નિર્ણય કરીને, તેમણે લાભ પાંચમના દિવસે કુલ રૂ. ૮૯,૮૯,૨૦૯ એકસાથે બેંકમાં ભરી દીધા અને ૨૯૦ ખેડૂતોનું ધિરાણ ચૂકતે કરી દીધું.
જીરા ગામમાં જ્યારે તમામ ૨૯૦ ખેડૂતોને તેમના નો ડ્યૂ સર્ટિફિકેટ આપવામાં આવ્યા, ત્યારે વાતાવરણ અત્યંત ભાવનાત્મક બની ગયું હતું.
આનંદના આંસુઃ ખેડૂતોની આંખોમાં વર્ષો જૂના બોજમાંથી મુક્ત થવાના આનંદના આંસુ હતા. તેમણે ઉદ્યોગપતિને નતમસ્તક થઈને હૃદયપૂર્વકના આશીર્વાદ આપ્યા.
ઉદ્યોગપતિનો સંતોષઃ બાબુભાઈએ જણાવ્યું કે, આ પુણ્ય કાર્ય કરીને અમને ખૂબ જ આનંદ છે, કારણ કે વર્તમાન સંજોગોમાં ખેડૂતોના આશીર્વાદ અમને ખૂબ મળ્યા છે અને એ આશીર્વાદને કારણે હું અને મારો પરિવાર ખૂબ આનંદમાં છીએ.
આ દ્રશ્યે સાબિત કરી દીધું કે, જ્યારે પૈસાનો ઉપયોગ માનવતાના કાર્ય માટે થાય છે, ત્યારે તેનું મૂલ્ય અબજો રૂપિયા કરતાં પણ અનેક ગણું વધી જાય છે. બાબુભાઈએ પોતાની માતાની પુણ્યતિથિને જીરા ગામના ૨૯૦ પરિવારો માટે નવા જીવનના પ્રારંભનો દિવસ બનાવી દીધો છે.
(9:52 AM IST)
છેલ્લા 8 દિવસમાં સૌથી લોકપ્રિય 
