રાજકોટઃ સૌરાષ્‍ટ્ર ગુજરાત સહીત દેશભરમાં સાયબર ક્રાઇમ ફ્રોડના કેસનો રાફડો ફાટયો છે. તાજેતરમાં સીઆઇડી ક્રાઇમે આવા ફ્રોડના ગુન્‍હાના આંકડા જાહેર કર્યા છે તે ખૂબ જ ચોંકાવનારા છે. અહીં ગુજરાતની જ વાત કરીએ તો ગુજરાતના લોકો પણ આવી છેતરપીંડીનો ભોગ બની મરણમૂડી સમાન નાણા ગુમાવવામાં પાછળ નથી. ગુજરાતમાં લગભગ જાન્‍યુઆરીથી સપ્‍ટેમ્‍બર - ૨૫ સુધીમાં ૭૨૫૪૪ ફરીયાદો થવા પામી છે. જેમાં અમદાવાદ, સુરત, વડોદરા, રાજકોટ સહિત અનેક નાના ગામોનો પણ સમાવેશ થયેલ છે.

આવા સાયબર ફ્રોડના બનાવો બનવા પાછળ એક માત્રને માત્ર માનવીય ભુલ ઉપરાંત લોભ-લાલચ ઝડપથી પૈસા કમાવવાની વૃતિ હોય છે. આવી માનસિકતાને કારણે જ લોકો વગર વિચાર્યે સાહજીક ભુલ કરી બેસે છે અને પોતાની જીવનભરની મરણમુડી ગુમાવે છે. આ પ્રકારના સાયબર ફ્રોડના ગુન્‍હાના સમાચાર દરરોજ ગુજરાતના માતબર અખબારોમાં લોક જાગૃતિ માટે પ્રસિધ્‍ધ થતા રહે છે.

હજુ સમય છે દરેક લોકોએ જાગૃત થવાનો આપના મોબાઇલ પર કોઇપણ વ્‍યકિત આપને સસ્‍તી લોન આપવાની, શેરબજારમાં સારો નફો આપવાની, સરકારી નોકરી કે આવાસ અપાવી દેવાની તમારા આધારકાર્ડનો ઉપયોગ કરી કોઇએ મોટી લોન (તમારા નામે મેળવી છે) કોઇ અધિકારીના નામે તમે કૌભાંડ કર્યુ છે માટે તમને ડીઝીટલ એરેસ્‍ટ કરવામાં આવે છે? આવા પ્રકારના ફોન આવે તો જરાપણ ગભરાયા વગર તેને ફોલો કરવા નહિ અને સાઇબર ક્રાઇમની હેલ્‍પલાઇન નં.૧૯૩૦ ઉપર જાણ કરવાનો સંકલ્‍પ કરવો.

આટલું પણ યાદ રાખો કે જો તમે આવા ફોનની લાલચમાં સપડાય ગયા, તમારા બેંક એકાઉન્‍ટમાંથી પૈસા જતા રહયા હોય અથવા ડીઝીટલ એરેસ્‍ટની વાત કરે તો ફકત ૩૦ મીનીટ સુધીમાં પણ તમે સાઇબર ક્રાઇમની હેલ્‍પલાઇન પર જાણ કરશો. તમારા ગુમાવેલા પૈસા અન્‍ય કોઇ જગ્‍યાએ ટ્રાન્‍સફર થતા અટકી જશે. તમને ફ્રોડ કરનારના બેંક એકાઉન્‍ટમાંજ જમા રહેશે અને તમામ ગુમાવેલી રકમ તમને ઝડપથી પરત મળવાના સંજોગો ઉભા રહેશે. તમો જાગૃત બનો અને તમારા પરિવાર નજીકના સગા - સંબંધીઓને પણ જાગૃત બનાવો.