( ભરત શાહ દ્વારા )નર્મદા : રાજપીપળાની માધવબાગ સોસાયટીમાં આ વર્ષે અનોખી થીમ સાથે ગણપતિની સ્થાપના કરવામાં આવી છે. માધવબાગ યુવક મંડળે ચાઈનીઝ દોરીના વિરોધમાં અને સ્વદેશી વસ્તુઓને પ્રોત્સાહન આપવાના સંદેશ સાથે ગણપતિની પ્રતિમા સજાવી છે.

      આ મુદ્દે યુવક મંડળના કાર્યકર સોહન માછીએ જણાવ્યું કે તેમના એક મિત્રનું ચાઈનીઝ દોરીથી મૃત્યુ થયું હતું. આ ઘટનાએ તેમને પ્રેરણા આપી કે લોકોને ચાઈનીઝ દોરીથી થતા નુકસાન અંગે જાગૃત કરવા જોઈએ. આ દોરી માનવી, પશુ અને પક્ષીઓ માટે કેટલી જોખમી છે તે દર્શાવવામાં આવ્યું છે.
   માધવબાગ યુવક મંડળના વકીલ ગૌરવ રાજ અને ચેતનભાઈએ જણાવ્યું કે આ થીમનો મુખ્ય ઉદ્દેશ લોકોને વિદેશી વસ્તુઓનો બહિષ્કાર કરી સ્વદેશી ઉત્પાદનો અપનાવવા પ્રેરિત કરવાનો છે.છેલ્લા દસ વર્ષથી માધવબાગમાં વિવિધ સામાજિક સંદેશ સાથે ગણપતિની સ્થાપના કરવામાં આવે છે. આ વર્ષની આ થીમે નર્મદા જિલ્લામાં વિશેષ આકર્ષણ જમાવ્યું છે. દર્શન કરવા આવેલા ભરતભાઈ માછીએ વિદેશી વસ્તુઓ પર લાગતા 50 ટકા ટેરિફનો વિરોધ કર્યો અને સંપૂર્ણપણે વિદેશી વસ્તુઓનો બહિષ્કાર કરવાની અપીલ કરી હતી.