તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
રોડ- રસ્તાના નબળા કામ કરનાર એજન્સી સામે દંડાત્મક પગલા લોઃ ભુપેન્દ્રભાઇ
ગુજરાતની તમામ નગરપાલિકાઓ અને કોર્પોરેશનોની વિડીયો કોન્ફરન્સઃ સીએમએ આપ્યા કાર્યવાહીના નિર્દેશ
રાજકોટ તા. ૭: ગુજરાતભરમાં ચોમાસાની શરૂઆત થતાં જ રાજકોટ સહિતના શહેરો, ગામડાઓમાં રોડ રસ્તાઓ તુટી જવાની ઘટનાઓ બહાર આવી છે. અને આ મુદ્દાને વિપક્ષે પણ હથિયાર બનાવી સરકાર ઉપર પ્રહાર કરવાનું શરૂ કર્યુ છે. તેવી જ રીતે શહેરો અને ગ્રામ્ય વિસ્તારોમાંથી ફરિયાદોનો ધોધ મુખ્યમંત્રી સુધી પહોંચતા સરકાર સફાળી જાગી છે.
આ મુદ્દે તમામ વિભાગો સાથે સંકલન કરવા મુખ્યમંત્રી ભૂપેન્દ્રભાઈ પટેલે આજે તમામ કોર્પોરેશનો, નગરપાલિકાઓ, પંચાયતો, હાઈવે ઓથોરીટી, માર્ગમકાન વિભાગ સહિતના અધિકારીઓ સાથે વીડિયો કોન્ફરન્સ યોજી નબળા રોડ-રસ્તા બનાવનાર એજન્સીઓ ઉપર દંડ સહિત કાર્યવાહી કરી લોકોની ફરિયાદનું તુરંત નિરાકરણ લેવામાં આવે તેવો આદેશ જારી કરતા તંત્ર દોડતુ થઈ ગયું છે.
ચોમાસાએ વહેલી દસ્તક દીધા બાદ આ વર્ષે વરસાદી પાણીના કારણે રોડ રસ્તાઓને વધુ ધોવાણ થઈ ગયાનું બહાર આવ્યું છે. શહેરો તેમજ ગામડાઓ અને હાઈવે ઉપર ખાડાઓના સામ્રાજ્ય છવાઈ જતાં પબ્લીકમાં દેકારો બોલી ગયો છે. અને આ મુદ્દાને હથિયાર બનાવી વિપક્ષોએ પણ સરકાર ઉપર પ્રહાર કર્યાછે.
નગરપાલિકાઓ અને કોર્પોરેશનમાં ખરાબ રોડ રસ્તા મુદ્દે ફરિયાદોના ધોધ વહ્યા છે. તેવી જ રીતે આ પ્રકારની ગુજરાતભરમાંથી ફરિયાદો મુખ્યમંત્રી સુધી પહોંચતા હવે આ મુદ્દે કડક પગલા લેવા અંગે મુખ્યમંત્રીએ આજે તમામ મહાનગરપાલિકાઓ, નગરપાલિકાઓ, ગ્રામ પંચાયતો, હાઈવે ઓથોરીટી અને માર્ગ મકાન વિભાગ સહિતના અધિકારીઓ સાથે વીડિયો કોન્ફરન્સ યોજી હતી.
આજે ૧૧ વાગ્યે યોજાયેલ વીડિયો કોન્ફરન્સમાં અમદાવાદ અને ગાંધીનગરના અધિકારીઓ રૂબરૂ હાજર રહ્યા હતા ત્યારે બાકીના વિભાગો સાથે વીડિયો કોન્ફરન્સ યોજી મુખ્યમંત્રીએ જણાવેલ કે, રોડના કામની ગુણવત્તા સુધારો નબળા કામ કરનાર એજન્સીઓને ફરી વખત કામ ન આપી તેમને દંડ કરવામાં આવે. તેવી જ રીતે હવે પછી રોડ રસ્તા માટે જે ટેન્ડર કરવામાં આવે તેમાં આ મુદ્દે ખાસ શરતોનો ઉમેરો કરવામાં આવે.
ભૂપેન્દ્રભાઇએ વધુમાં જણાવેલ કે, વર્ષોથી લોકોની ફરિયાદો ઉઠવા પામી છે. જેનું સંકલન કરતા માલુમ પડેલ કે, ચોમાસામાં દર વર્ષે એક જ જગ્યાએ પાણી શા માટે ભરાઈ રહ્યું છે ત્યાં હાલત કેમ સુધરતી નથી. લોકોમાં ફરિયાદ ઉઠે ત્યાર બાદ તંત્ર દ્વારા કામગીરી કરવામાં આવતી હોય છે. આથી રોડ રસ્તાના ટેન્ડર પ્રસિદ્ધ કર્યા બાદ વાપી અને વડોદરાને લઈને સુચારુ આયોજન કરવું જોઈએ તેમ જણાવ્યું હતું. તેવી જ રીતે હાઈવે ઓથોરીટીના અધિકારીઓને સુચના આપી જણાવેલ કે, હાઈવેના કામો મોટે ભાગે ગેરંટીમાં થતાં હોય છે. ત્યારે રોડ તુટી જવાની ઘટનામાં એજન્સી પાસે તાત્કાલીક ધોરણે કામ કેમ કરાવવામાં નથી આવતું. અને નબળા કામ થયા હોય તો પણ આ એજન્સીને શા માટે ફરી વખત કામ આપવામાં આવી રહ્યું છે. તેની તપાસ પણ થવી જોઈએ આમ આજે મુખ્યમંત્રીએ વીડિયો કોન્ફરન્સ યોજી છેલ્લા ઘણા સમયથી ગુજરાતભરમાંથી ઉઠી રહેલ રોડ રસ્તાની ફરિયાદો બાબતે કમિશનરો તેમજ ઉચ્ચ અધિકારીઓને આડેહાથ લેતા આજથી જ તંત્ર દોડતુ થઈ ગયું છે. (૯.ર૦)
શહેરમાં કયા કયાં સ્થળે પાણી ભરાય છે : સીસીટીવી મારફતે મોનીટરીંગ
ઝોનના ડે. કમિશનર અને સીટી ઇજનેરને ફોટા સાથે મેસેજ કરવા સુચના : પાણી નિકાલની કામગીરી યુધ્ધના ધોરણે કરવા આદેશ
રાજકોટ : શહેરમાં સામાન્ય વરસાદમાં પણ વર્ષોથી અમુક ચોક્કસ સર્કલો તેમજ રોડ રસ્તાઓ ઉપર પાણી ભરાઈ રહ્યા છે. જેનો આજ સુધી નિરાકરણ નથી આવ્યું ત્યારે આજે મુખ્યમંત્રીએ આ મુદ્દે તંત્રને આડેહાથ લેતા રાજકોટ મહાનગરપાલિકાએ આઈવે પ્રોજેક્ટ અંતર્ગત શહેરભરમાં મુકવામાં આવેલા સીસીટીવી કેમેરા પૈકી જે સ્થળે પાણી ભરાવાની ફરિયાદો ઉઠે છે તેવા સ્થળો માટે કેમેરાને અલગથી તારવી તેનું મોનીટરીંગ કરવાના આદેશ આપ્યા છે. સુપરવિઝન મારફતે પાણી ભરાય એટલે તુરંત તે ઝોનના ડેપ્યુટી મ્યુનિસિપલ કમિશનર અને સીટી ઈજનેરને ફોટા સાથે મેસેજ કરવાનો રહેશે અને ત્યાર બાદ પાણી નિકાલની કામગીરી યુદ્ધના ધોરણે હાથ ધરવાની રહેશે તેવા આદેશ આજે થયાનું જાણવા મળેલ છે.
(3:52 PM IST)
છેલ્લા 8 દિવસમાં સૌથી લોકપ્રિય 
