ગાંધીનગર, ૩૦ જૂન, ૨૦૨૫: ૧ જુલાઈ, રાષ્ટ્રીય ડોક્ટર્સ ડે પૂર્વે, ગુજરાત સરકારે રાજ્યની દીકરીઓને મેડિકલ ક્ષેત્રે કારકિર્દી બનાવવા માટે કેવી રીતે સશક્ત બનાવી છે તેની એક પ્રેરણાદાયી ગાથા રજૂ કરી છે. વડાપ્રધાન નરેન્દ્રભાઈ મોદીના '૨૧મી સદીના ભારતના ઝડપી વિકાસ માટે મહિલાઓનો ઝડપી વિકાસ, તેમનું સશક્તિકરણ મહત્વપૂર્ણ છે' ના દૂરંદેશી નેતૃત્વ હેઠળ, ગુજરાત સરકારે મુખ્યમંત્રી ભૂપેન્દ્રભાઈ પટેલના માર્ગદર્શન હેઠળ કન્યાઓ માટે શિક્ષણનો અધિકાર સુનિશ્ચિત કરવા અને ખાસ કરીને તબીબી શિક્ષણને પ્રોત્સાહન આપવા માટે અભૂતપૂર્વ પ્રયાસો કર્યા છે.
આર્થિક મુશ્કેલીઓનો અંત: MKKN યોજના:
મેડિકલ (MBBS) ક્ષેત્રે પોતાની કારકિર્દી બનાવવા માંગતી ગુજરાતની દીકરીઓનું તબીબી શિક્ષણ આર્થિક મુશ્કેલીઓને લીધે અટકે નહીં, તે સુનિશ્ચિત કરવા માટે ગુજરાત સરકારે 'મુખ્યમંત્રી કન્યા કેળવણી નિધિ યોજના' (MKKN) અમલી બનાવી છે. આ યોજનાનો મુખ્ય ઉદ્દેશ્ય MBBS માં અભ્યાસ કરતી તેજસ્વી વિદ્યાર્થિનીઓને નાણાકીય સહાય પૂરી પાડવાનો છે, જેથી તેઓ પોતાના 'વ્હાઈટ-કોટ' વોરિયર્સ બનવાના સપનાને સાકાર કરી શકે.
આંકડા બોલે છે:
MKKN યોજના હેઠળ અત્યાર સુધીમાં રાજ્યની ૨૫,૭૬૮ વિદ્યાર્થિનીઓને ડોક્ટર બનવા માટે કુલ ₹૭૭૨ કરોડની આર્થિક સહાય ચૂકવવામાં આવી છે. આ આંકડા દર્શાવે છે કે આ યોજનાએ કેટલી મોટી સંખ્યામાં દીકરીઓને તેમના સપના પૂરા કરવામાં મદદ કરી છે.
ખાસ કરીને, વર્ષ ૨૦૨૪-૨૫ માટે ૪૫૦૦ વિદ્યાર્થિનીઓને ₹૧૫૦ કરોડની સહાયનો લક્ષ્યાંક રાખવામાં આવ્યો હતો, પરંતુ સરકારે તેનાથી પણ વધુ દીકરીઓને મદદ કરી છે. આ વર્ષે ૫૧૫૫ વિદ્યાર્થિનીઓને ₹૧૬૨.૬૯ કરોડની આર્થિક સહાય ચૂકવવામાં આવી છે, જે દર્શાવે છે કે રાજ્ય સરકાર દીકરીઓના શિક્ષણ પ્રત્યે કેટલી પ્રતિબદ્ધ છે.
યોજનાની વિગતો:
મુખ્યમંત્રી કન્યા કેળવણી નિધિ યોજના વર્ષ ૨૦૧૭-૧૮માં શરૂ કરવામાં આવી હતી. આ યોજના અંતર્ગત, ₹૬ લાખ સુધીની વાર્ષિક આવક ધરાવતા પરિવારની વિદ્યાર્થિનીઓ કે જેઓ NEET સ્કોરના આધારે MBBSમાં પ્રવેશ મેળવે છે, તેમને ૫૦% પ્રવેશ ફી રાજ્ય સરકાર દ્વારા સ્પોન્સર કરવામાં આવે છે. આ સહાય માટે તેમનો કોમ્યુનિટી બેકગ્રાઉન્ડ (જ્ઞાતિ) ધ્યાનમાં લેવામાં આવતું નથી, જે યોજનાને વધુ સમાવેશી બનાવે છે.
પ્રેરણાદાયી કિસ્સો: પ્રતિભાબેન ચૌહાણની ગાથા:
અમદાવાદના મણિનગર સ્થિત નરેન્દ્રભાઈ મોદી મેડિકલ કોલેજમાંથી MBBSનું શિક્ષણ પૂર્ણ કરીને ડોક્ટર બનેલા મૂળ જામનગરના રહેવાસી પ્રતિભાબેન ચૌહાણ MKKN યોજનાના જીવંત ઉદાહરણ છે. પ્રતિભાબેન જણાવે છે કે, "MBBS કરવા માટે પ્રાઈવેટ કોલેજોની ફી ભરવી સામાન્ય આર્થિક સ્થિતિના પરિવારો માટે ખૂબ મુશ્કેલ હોય છે. સારા માર્ક્સ અને સારી કોલેજમાં મેરિટમાં નામ હોવા છતાં એડમિશન લેવામાં મન પાછું પડે. પરંતુ કેટલાક સિનિયર ડોક્ટર્સ થકી મને મુખ્યમંત્રી કન્યા કેળવણી નિધિ યોજના અંગે જાણકારી મળી અને મેં અરજી કરી દીધી. આ યોજનાના કારણે જ ખાનગી મેડિકલ કોલેજમાં એડમિશન લેવાની હિંમત થઈ, અને આર્થિક રીતે અમને ખૂબ ફાયદો થયો."
પ્રતિભાબેનને સાડા ચાર વર્ષોના MBBS શિક્ષણ દરમિયાન રાજ્ય સરકાર તરફથી કુલ ₹૨૫,૪૮,૦૦૦ની સહાય મળી છે. આજે તેઓ પોતાના ડોક્ટર બનવાના સપનાને સાકાર કરી ચૂક્યા છે અને હવે PGની તૈયારી કરી રહ્યા છે. તેઓ અને તેમનો પરિવાર આ માટે ગુજરાત સરકારના ખૂબ જ આભારી છીએ.
પ્રતિભાબેન જેવી રાજ્યની અનેક પ્રતિભાશાળી અને મહત્વાકાંક્ષી વિદ્યાર્થિનીઓનું ડોક્ટર બનવાનું સપનું આજે રાજ્ય સરકારની આ યોજનાને કારણે પૂરું થઈ રહ્યું છે. દેશના વિકાસ માટે દીકરીઓ શિક્ષિત અને કાબેલ હોય તે ખૂબ જ મહત્વપૂર્ણ છે, અને મુખ્યમંત્રી ભૂપેન્દ્રભાઈ પટેલના દૂરંદેશી નેતૃત્વ હેઠળ રાજ્ય સરકાર સતત તે દિશામાં પ્રયાસરત છે. આ યોજના ભવિષ્યમાં પણ અનેક દીકરીઓને ડોક્ટર બનવા માટે પ્રેરિત કરશે અને રાજ્યની આરોગ્ય સેવાઓમાં તેમનું યોગદાન સુનિશ્ચિત કરશે.