રાજકોટ, તા. ૩૦ જૂન, ૨૦૨૫: હિન્દી ફિલ્મોમાં જ જોવા મળતી ચમત્કારી ઘટનાઓ વાસ્તવિક જીવનમાં પણ બની શકે છે, તેનો જીવંત ઉદાહરણ આજે રાજ્યના મુખ્ય પોલીસ વડા (DGP) વિકાસ સહાયના કિસ્સામાં જોવા મળ્યું. આજે સાંજે વયમર્યાદાના કારણે નિવૃત થતા વિકાસ સહાય, જેમની સ્વચ્છ અને બેદાગ છબી માટે તેઓ જાણીતા છે, તેમના ભાવિને લઈને એક અનોખું સસ્પેન્સ છેલ્લા કેટલાક દિવસોથી ચાલી રહ્યું હતું. તેમને એક્સટેન્શન મળવાની પ્રબળ સંભાવના હતી, પરંતુ બપોરે ૧૨ વાગ્યા સુધી આ અંગે કોઈ સત્તાવાર આદેશ આવ્યો ન હતો.

વિદાય સમારોહની તૈયારીઓ અને અચાનક ટ્વિસ્ટ:
નિયમાનુસાર, DGP નિવૃત થાય ત્યારે તેમને શણગારેલી ખુલ્લી જીપમાં બેસાડી, સિનિયર અધિકારીઓ દ્વારા દોરડા વડે જીપ ખેંચીને માનભેર વિદાય આપવામાં આવે છે. આ માટેની જરૂરી તૈયારીઓ DGP ઓફિસ દ્વારા સંબંધિત અધિકારીઓની સહમતિથી કરવામાં આવી હતી અને વિદાય સમારોહનું આયોજન પણ ગોઠવાઈ ગયું હતું.

ખૂબ આત્મસ્વાભિમાની એવા શ્રી વિકાસ સહાયે ઓફિસનો સમય પૂરો થવાની રાહ જોયા વિના, બપોરે ત્રણ વાગ્યે જ વિદાય સમારોહ શરૂ કરાવ્યો. સિનિયર IPS અધિકારીઓ ઉપસ્થિત રહ્યા હતા અને વિકાસ સહાયના નિવૃત્તિ જીવનની શુભકામનાઓ આપી રહ્યા હતા, તેમના કાર્યકાળની સિદ્ધિઓને યાદ કરીને સહુ છુટ્ટા પડવાની તૈયારી કરતા હતા.

અને પછી સર્જાયો ચમત્કાર!
બસ, આ જ ક્ષણે, જે ઘટના ફક્ત હિન્દી ફિલ્મોમાં જ બને અને વાસ્તવિકતામાં ભાગ્યે જ જોવા મળે તેવી એક અણધારી ઘટના બની. ગૃહ મંત્રાલયના એક સિનિયર અધિકારીએ અચાનક સમારોહ સ્થળે એન્ટ્રી કરી અને મોટા અવાજે જણાવ્યું કે, "વિકાસ સહાય સાહેબને એક્સટેન્શન આપવાનું નક્કી થયેલ છે."

આટલા શબ્દો સાંભળતા જ ત્યાં ઉપસ્થિત સૌ કોઈ આશ્ચર્યચકિત થઈ ગયા. વિદાયનો માહોલ પળભરમાં જ આનંદ અને ઉત્સાહના હર્ષોલ્લાસમાં ફેરવાઈ ગયો. સિનિયર IPS અધિકારીઓ સહિત સમગ્ર સ્ટાફ ખુશીથી ઝૂમી ઉઠ્યો, અને વિદાય સમારોહ તરત જ સત્કાર સમારોહમાં પરિવર્તિત થઈ ગયો. સત્તાવાર આદેશ ગમે ત્યારે આવશે તે નક્કી થઈ ગયું હતું. ખરેખર, આ એક ચમત્કારથી ઓછું નહોતું!

આ ઘટનાએ ફરી એકવાર સાબિત કર્યું કે જીવનમાં ક્યારેક અણધારી અને ખુશીઓથી ભરપૂર પળો પણ આવતી હોય છે. વિકાસ સહાય જેવા સમર્પિત અધિકારીને વધુ સમય માટે રાજ્યની સેવા કરવાનો મોકો મળતા સમગ્ર પોલીસ દળમાં સંતોષની લાગણી જોવા મળી રહી છે.