તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ગુજરાત હાઈકોર્ટે મુસ્લિમ ઉદ્યોગપતિને પોતાની દુકાન ખોલવાની મંજૂરી આપી
મુસ્લિમોને દુકાનો અને મકાનો આપવાનું બંધ કરનારાઓએ હાઈકોર્ટનું આ નિવેદન વાંચવું જોઈએ : રાજ્ય સરકારને કાયદો અને વ્યવસ્થા જાળવવાની તેની જવાબદારી યાદ અપાવી : વડોદરાના એક હિન્દુ વિસ્તારમાં મુસ્લિમ વેપારીની દુકાન અંગે ગુજરાત હાઈકોર્ટે મોટો નિર્ણય આપ્યો છે
અમદાવાદ, તા.૨૩: એક મહત્વપૂર્ણ નિર્ણયમાં ગુજરાત હાઈકોર્ટે રાજ્ય સરકારને યાદ અપાવ્યું છે કે ‘કાયદો અને વ્યવસ્થા જાળવવાની તેમની બંધારણીય જવાબદારી છે.' વડોદરાના હિન્દુ બહુલ વિસ્તારમાં એક મુસ્લિમ ઉદ્યોગપતિને પોતાની દુકાનથી વ્યવસાય શરૂ કરવામાં આવી રહેલા અવરોધોને તાત્કાલિક દૂર કરવા કોર્ટે વહીવટીતંત્રને નિર્દેશ આપ્યો છે.
જસ્ટિસ એચડી સુથારની સિંગલ બેન્ચ દ્વારા આપવામાં આવેલ આ નિર્ણય અરજદાર ઓનાલી ધોળકાવાલાને મોટી રાહત આપનારો છે. ધોળકાવાલાએ આરોપ લગાવ્યો હતો કે તેમને સતત પોતાની દુકાન ખોલતા અટકાવવામાં આવી રહ્યા હતા કારણ કે કેટલાક સ્થાનિક લોકો ઇચ્છતા ન હતા કે મુસ્લિમ વેપારીઓ આ વિસ્તારમાં વ્યવસાય કરે.
ટાઇમ્સ ઓફ ઇન્ડિયાના અહેવાલ મુજબ, ધોળકાવાલાએ ૨૦૧૬ માં ચાંપાનેર ગેટ નજીક બે હિન્દુ ભાઈઓ પાસેથી કાયદેસર રીતે દુકાન ખરીદી હતી, પરંતુ આ વિસ્તાર ગુજરાત ડિસ્ટર્બ્ડ એરિયાઝ એક્ટ, ૧૯૯૧ હેઠળ આવે છે, જે મિલકતના વ્યવહારોનું સંચાલન કરે છે અને કોઈપણ રિયલ એસ્ટેટ ખરીદવા માટે કલેક્ટરની પૂર્વ પરવાનગી મેળવવી ફરજિયાત બનાવે છે. તેમણે ૨૦૨૦ માં હાઇકોર્ટની મદદથી વેચાણ દસ્તાવેજ રજીસ્ટર કરાવ્યો.
આમ છતાં, વિસ્તારના કેટલાક લોકોએ મુસ્લિમને મિલકતના વેચાણનો વિરોધ કર્યો અને તેને રદ કરવા માટે કોર્ટમાં અરજી કરી. તેમણે દાવો કર્યો હતો કે મુસ્લિમોને મિલકત આપવાથી વિસ્તારમાં વસ્તી સંતુલન ખલેલ પહોંચશે અને સાંપ્રદાયિક ધ્રુવીકરણ થઈ શકે છે.
હાઈકોર્ટે શું કહ્યું? : જોકે, ફેબ્રુઆરી ૨૦૨૩ માં, હાઇકોર્ટે આ વાંધાઓને ફગાવી દીધા અને બંને અરજદારો પર ૨૫,૦૦૦ રૂપિયાનો દંડ ફટકાર્યો, એમ કહીને કે તેઓ ‘કાયદેસર માલિકને મિલકતના અધિકારથી વંચિત રાખવાનો પ્રયાસ કરી રહ્યા હતા.' આ પછી પણ સ્થાનિક રહીશોએ ધોળકાવાલાને દુકાન ખોલવા દીધી ન હતી અને ગેટ પર કાટમાળ ફેંકીને દુકાનમાં અવરોધ ઉભો કર્યો હતો.
આના પર ધોળકાવાલાને ફરી એકવાર હાઈકોર્ટનો સંપર્ક કરવો પડ્યો. અરજીમાં તેમણે પોલીસ સુરક્ષાની માંગણી કરી હતી જેથી તેઓ દુકાનનું સમારકામ કરી શકે અને પોતાનો વ્યવસાય શરૂ કરી શકે. તેમણે એમ પણ કહ્યું કે તેમણે સ્થાનિક પોલીસ પાસે ઘણી વખત મદદ માંગી, પરંતુ કોઈ સહકાર મળ્યો નહીં.
આ અંગે કોર્ટે સ્પષ્ટ શબ્દોમાં કહ્યું કે ‘કોઈ વ્યક્તિને તેની કાયદેસર રીતે ખરીદેલી મિલકતનો ઉપયોગ કરતા અટકાવવા એ બંધારણ અને કાયદાનું ઉલ્લંઘન છે.' રાજ્ય સરકારની જવાબદારી છે કે તેઓ દરેક નાગરિકની સુરક્ષા સુનિશ્ચિત કરે અને તેમને તેમના કાયદેસર અધિકારો પૂરા પાડે.
(11:31 AM IST)
છેલ્લા 8 દિવસમાં સૌથી લોકપ્રિય 
