બેબી શાવર માટે અમદાવાદ આવ્યું હતું કપલઃ પ્લેન ક્રેશમાં ગુમાવ્યો જીવ
અમદાવાદમાં થયેલા એર ઈન્ડિયાના પ્લેન ક્રેશમાં જેટલા મૃતકો તેટલી તેમની હ્રદયદ્રાવક વાતો : એર ઈન્ડિયાના પ્લેન ક્રેશમાં વૈભવ પટેલ અને જિનલના મોત થયા હતા, જિનલને સાત મહિનાનો ગર્ભ હતો
લંડન તા.૧૯: અમદાવાદમાં થયેલા એર ઈન્ડિયાના પ્લેન ક્રેશમાં જેટલા મળતકો તેટલી તેમની હ્રદયદ્રાવક વાતો છે, જેમાં સાત મહિનાની પ્રેગ્નેન્ટ મહિલા અને તેના પતિના મોતની પણ વાત છે. ૨૯ વર્ષીય વૈભવ પટેલ અને તેની ૨૭ વર્ષીય પત્ની જિનલ ગોસ્વામી તેમના બેબી શાવર એટલે કે સિમંત સંસ્કાર માટે યુકેથી અમદાવાદ આવ્યા હતા.
આ કપલ લંડનના ક્રોયડનમાં રહેતું હતું પરંતુ તાજેતરમાં જ તે હેમ્પશાયરના સાઉધમ્પ્ટનથી મૂવ થઈને આવ્યા હતા કેમ કે વૈભવ અહીં કામ કરતો હતો. તેમના ખાસ મિત્ર નિરવ પટેલે BBC સાથેની વાતચીતમાં જણાવ્યું હતું કે, વૈભવ અને જિનલ ઘણા જ ખુશ હતા અને પોતાના પ્રથમ બાળકને લઈને તેઓ ઘણા જ રોમાંચિત હતા. વૈભવ અને જિનલની અંતિમક્રિયા સોમવારે ભારતમાં કરવામાં આવી હતી.
સાઉધમ્પ્ટનમાં રહેતા નિરવે જણાવ્યું હતું કે, તે છેલ્લા એક દાયકાથી પણ વધારે સમયથી વૈભવનો મિત્ર છે અને તે અમદાવાદમાં હતા ત્યારથી એકબીજાના મિત્રો છે. ચાર વર્ષ અગાઉ જ વૈભવના લગ્ન થયા હતા અને તે હંમેશા પોતાના મિત્રો અને પરિવારને સપોર્ટ કરતો હતો. પોતાનું પ્રથમ બાળક હોવાના કારણે સિમંત વિધી માટે વૈભવ અને જિનલ અમદાવાદ આવ્યા હતા અને જૂન ૦૫ના રોજ સિમંત વિધી હતી. જિનલને સાત મહિનાનો ગર્ભ હતો અને તેઓ ઘણા ખુશ હતા.
વૈભવના પિતા ન હતા અને પરિવારમાં મોટો દીકરો હોવાના કારણે તે તેનો આધારસ્તંભ પણ હતો. પ્લેન ક્રેશના સમાચાર વૈભવ અને જિનલના પરિવાર તથા મિત્રો માટે મોટો આઘાત હતા. ફ્લાઈટના બે દિવસ પહેલા વૈભવે નિરવને ફોન કરીને તે પાછો આવી રહ્યો છે તેવું જણાવ્યું હતું. નિરવે કહ્યું હતું કે, તે બંને ગાઢ મિત્રો હતા અને સાથે મળીને ઘણી મજા કરી હતી. તેમણે ભારતમાં ગોવા, રાજસ્થાન સહિત ઘણી ટ્રિપ્સ પણ કરી હતી. નિરવ માટે પણ વૈભવનું જવું આઘાતજનક વાત છે.
નિરવ અને વૈભવ સાઉધમ્પ્ટનના પોર્ટવૂડમાં પાપા જોન્સમાં કામ કરતા હતા અને તેના મેનેજરમે જણાવ્યું હતું કે, વૈભવ પટેલ એક ઉમદા વ્યક્તિ હતો, અને એક ફેમિલી મેન હતો. ઉલ્લેખનીય હતો ૧૨ જૂનના રોજ અમદાવાદથી લંડન જઈ રહેલી ફ્લાઈટ ટેક ઓફ થયાની ગણતરીની મિનિટો બાદ જ ક્રેશ થઈ ગઈ હતી. જેમાં પ્લેનમાં સવાર ક્રુ મેમ્બર્સ અને પેસેન્જર્સ સહિત ૨૪૧ લોકોના મોત થયા હતા જ્યારે એક પેસેન્જરનો બચાવ થયો હતો. આ ઉપરાંત પ્લેન ક્રેશ થયું ત્યાં જમીન પર પણ લોકોના મોત થયા હતા અને કુલ મળત્યુઆંક ૨૭૦ થયો છે(૩૮.૬)
(1:47 PM IST)
છેલ્લા 8 દિવસમાં સૌથી લોકપ્રિય 
