સુરત, શનિવાર, 31 મે, 2025: સાંજે 8:20 વાગ્યા: કેન્દ્રીય ગૃહ મંત્રાલયના નિર્દેશાનુસાર, દુશ્મન દેશના હુમલા સામે નાગરિક સંરક્ષણની તૈયારીઓને વધુ સુદ્રઢ કરવા માટે સુરત શહેરમાં 'ઓપરેશન શિલ્ડ' મોકડ્રિલનું આયોજન કરવામાં આવ્યું હતું. ઉમરવાડા સ્થિત ગ્લોબલ ટેક્સટાઇલ માર્કેટ ખાતે યોજાયેલી આ સિવિલ ડિફેન્સ કવાયતનો મુખ્ય ઉદ્દેશ્ય સંભવિત યુદ્ધની સ્થિતિમાં નાગરિકોને સુરક્ષિત અને જાગૃત રાખવાનો હતો.
હવાઈ હુમલાનું સિમ્યુલેશન અને તાત્કાલિક પ્રતિભાવ:
મોકડ્રિલની શરૂઆત ગ્લોબલ ટેક્સટાઇલ માર્કેટ પર કાલ્પનિક હવાઈ હુમલાના સિમ્યુલેશનથી થઈ હતી, જેના કારણે માર્કેટમાં ભયાવહ આગ લાગી હોવાનું દ્રશ્ય ઊભું કરાયું હતું. ઈમરજન્સી ઓપરેશન સેન્ટર ખાતેથી તાત્કાલિક ફાયર વિભાગ, 108 એમ્બ્યુલન્સ અને પોલીસ સહિતના તમામ સંબંધિત વિભાગોને ઘટનાસ્થળે પહોંચવાનો નિર્દેશ આપવામાં આવ્યો હતો. થોડા જ સમયમાં આગ વિકરાળ બનતા, સાયરન વગાડીને હવાઈ હુમલાનો સંકેત આપવામાં આવ્યો હતો અને માર્કેટના વેપારીઓ, ગ્રાહકો તથા આસપાસની રહેણાંક સોસાયટીઓના લોકોને સુરક્ષિત સ્થળે ખસી જવા માટે એલર્ટ કરાયા હતા.
યુદ્ધના ધોરણે રાહત અને બચાવ કામગીરી:
ઘટનાસ્થળે પહોંચીને ફાયર ફાયટરોએ પાણીનો મારો ચલાવીને આગ બુઝાવવાના પ્રયાસો શરૂ કર્યા હતા. 108 અને સ્મીમેર હોસ્પિટલની એમ્બ્યુલન્સો પણ તુરંત પહોંચી ગઈ હતી અને હવાઈ હુમલામાં ઘાયલ થયેલા ઈજાગ્રસ્તોને નજીકની સ્મીમેર હોસ્પિટલમાં ખસેડવામાં આવ્યા હતા. ફાયર તેમજ SDRFની ટીમે તાત્કાલિક રેસ્ક્યુની કામગીરી હાથ ધરી હતી. સિવિલ ડિફેન્સ વોલન્ટિયરોની ટીમે માનવ સાંકળ બનાવીને ઈજાગ્રસ્તોને સ્ટ્રેચર પર લાવીને તાત્કાલિક સારવારમાં સહયોગ આપ્યો હતો.
આ મોક એક્સરસાઈઝ દરમિયાન 108 એમ્બ્યુલન્સ, પોલીસ- પીસીઆર, સિવિલ ડિફેન્સ વોલન્ટિયરો, ફાયર સ્ટાફ અને સુરક્ષા દળો એલર્ટ મોડ પર આવી ગયા હતા. સંબંધિત તમામ વિભાગના અધિકારીઓ જરૂરી રેસ્ક્યુ સાધનો સાથે રાહત-બચાવની કામગીરીમાં જોડાયા હતા. મોકડ્રિલ દરમિયાન કુલ 79 ઈજાગ્રસ્તોને સ્મીમેર હોસ્પિટલમાં સારવાર માટે લઈ જવામાં આવ્યા હતા, જ્યારે સામાન્ય ઈજા પામેલા 20 ઘાયલોને નજીકના સેફ હાઉસમાં ખસેડી તબીબો દ્વારા પ્રાથમિક સારવાર આપવામાં આવી હતી.
જનભાગીદારી અને ઉચ્ચ અધિકારીઓની ઉપસ્થિતિ:
આ સમગ્ર મોકડ્રિલમાં 'માય ભારત'ના 20 વોલન્ટિયરો અને એન.સી.સી.ના કેડેટ્સે પણ સક્રિય સહયોગ આપ્યો હતો. ફાયર વિભાગ દ્વારા સ્કાઉટ એન્ડ ગાઈડ્સ, એન.સી.સી.ના કેડેટ્સ તેમજ સિવિલ ડિફેન્સના સ્વયંસેવકોને રેસ્ક્યુ સંબંધિત તાલીમ પણ આપવામાં આવી હતી.
મોકડ્રિલના અંતે મેયર દક્ષેશ માવાણી, જિલ્લા કલેક્ટર ડો. સૌરભ પારધી, ઇન્ચાર્જ પોલીસ કમિશનર વાબાંગ ઝમીર અને મ્યુનિસિપલ કમિશનર શાલિની અગ્રવાલે ઘટનાસ્થળનું નિરીક્ષણ કર્યું હતું. આ કવાયત દ્વારા કોઈપણ આપત્તિ દરમિયાન ઝડપી પ્રતિસાદ માટે તંત્ર તથા નાગરિકો બંને તૈયાર રહે અને યુદ્ધ જેવી કટોકટીની સ્થિતિમાં નાગરિકોની સુરક્ષા સુનિશ્ચિત કરી શકાય તેવા મહત્વના સંદેશ સાથે સફળતાપૂર્વક પૂર્ણ થઈ હતી.