દાહોદઃ  આજે દાહોદ ખાતે આયોજિત પ્રધાનમંત્રી નરેન્‍દ્રભાઈ મોદીના ભવ્‍ય કાર્યક્રમમાં ગુજરાત સરકારના કેબિનેટ મંત્રી બચુભાઈ ખાબડને મંચ પર સ્‍થાન આપવામાં આવ્‍યું નહોતું. આ ઘટના રાજકીય વર્તુળોમાં ભારે ચર્ચાનો વિષય બની છે, કારણ કે તેમના બંને સંતાનો તાજેતરમાં ભ્રષ્ટાચારના ગંભીર આરોપોમાં પોલીસ ફરિયાદ બાદ હાલ જેલ હવાલે થયેલા છે. બચુભાઈ ખાબડના પુત્રો વિરુદ્ધ સરકારી ભરતી પ્રક્રિયામાં કથિત ગેરરીતિઓ અને લાંચ લેવાના આરોપો હેઠળ ગુનો નોંધવામાં આવ્‍યો હતો. આ મામલે પોલીસે સઘન તપાસ હાથ ધરી હતી, જેના પગલે તેમના બંને પુત્રોની ધરપકડ કરવામાં આવી હતી અને હાલ તેઓ જેલ હવાલે છે. આ ઘટનાથી રાજ્‍ય સરકાર અને ભાજપ સંગઠન બંનેની છબીને ફટકો પડ્‍યો હોવાનું મનાય છે. રાજકીય વિશ્‍લેષકો માની રહ્યા છે કે, વડાપ્રધાનના કાર્યક્રમમાંથી બચુભાઈ ખાબડની બાદબાકી એ ભાજપના કેન્‍દ્રીય નેતળત્‍વ દ્વારા ભ્રષ્ટાચાર સામેની ઝીરો-ટોલરન્‍સ નીતિનો સ્‍પષ્ટ સંકેત છે. ખાસ કરીને જ્‍યારે વડાપ્રધાન પોતે મંચ પર હાજર હોય. આ નિર્ણય દ્વારા પક્ષે ભ્રષ્ટાચારના આરોપોથી ઘેરાયેલા નેતાઓ પ્રત્‍યે કડક વલણ અપનાવ્‍યું હોવાનો સંદેશ આપવાનો પ્રયાસ કર્યો છે. આ ઘટનાથી દાહોદ અને આસપાસના પંથકમાં રાજકીય ગરમાવો જોવા મળી રહ્યો છે. સ્‍થાનિક ભાજપ કાર્યકરો અને જનતામાં પણ આ મામલે વિવિધ ચર્ચાઓ ચાલી રહી છે. અગાઉ પણ આવા કિસ્‍સાઓમાં પક્ષ દ્વારા કડક પગલાં લેવામાં આવ્‍યા હોવાથી, બચુભાઈ ખાબડના રાજકીય ભવિષ્‍ય અને પક્ષમાં તેમની સ્‍થિતિ અંગે અનેક તર્ક-વિતર્ક થઈ રહ્યા છે.