તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
તાપમાનમાં મોટી વધ-ઘટના કારણે ઈન્ફેક્શનના કેસમાં મોટો ઉછાળો
હાલમાં અમદાવાદમાં ડબલ સિઝન જેવું વાતાવરણ છે જેના કારણે વાયરલ ઈન્ફેક્શનના કેસની સંખ્યામાં મોટો ઊછાળો આવ્યો છે
અમદાવાદ, તા.૧૧: હાલમાં અમદાવાદમાં ડબલ સિઝન જેવું વાતાવરણ છે જ્યાં દિવસ દરમિયાન ગરમી અને સવારે તથા રાત્રે ઠંડીનો અનુભવ થાય છે. જેના કારણે વાયરલ ઈન્ફેક્શનના કેસની સંખ્યામાં મોટો ઊછાળો આવ્યો છે. સોમવારે અમદાવાદમાં દિવસનું મહત્તમ તાપમાન ૩૩.૪ ડિગ્રી સેલ્સિયસ નોંધાયું હતું જ્યારે સવારે અને રાત્રે ૧૩.૮ ડિગ્રી સેલ્સિયસ તાપમાન હતું. આમ તાપમાનમાં ૧૯.૬ ડિગ્રી સેલ્સિયસનો તફાવત હતો અને આવું તાપમાન વાયરસના બ્રીડિંગ માટે એકદમ પરફેક્ટ હોય છે. તાપમાનમાં આટલા મોટા વધાર-ઘટાડાની અસર લોકોના સ્વાસ્થ્ય પર પણ પડતી હોય છે. જેના કારણે ડોક્ટરોએ ચેતવણી આપી છે કે, તાપમાનમાં આટલા મોટા ફેરફારના કારણે ગળાના ઈન્ફેક્શનમાં વધારો થયો છે. આઉટપેશન્ટ ડિપાર્ટમેન્ટમાં જેટલા પણ દર્દીઓ આવે છે તેમાંથી ૫૦ ટકાથી વધુ દર્દીઓને ગળાનો સોજો, શરીરમાં દુખાવો, શરદી તથા સૂકી ઉધરસ જેવી ફરિયાદો હોય છે.
ભારતીય હવામાન ખાતાના જણાવ્યા પ્રમાણે મહત્તમ તાપમાન સામાન્ય કરતાં ૩.૨ ડિગ્રી સેલ્સિયસ વધારે હતું. જ્યારે લઘુત્તમ તાપમાન સામાન્ય કરતાં ૦.૨ ડિગ્રી સેલ્સિયસ નીચે હતું. નલીયા ગુજરાતનું સૌથી ઠંડુ શહેર રહ્યું હતું જ્યાં તાપમાન ૯.૮ ડિગ્રી સેલ્સિયસ નોંધાયું હતું. જ્યારે ગાંધીનગર અને પોરબંદરમાં તાપમાન અનુક્રમે ૧૨.૪ ડિગ્રી અને ૧૨.૬ ડિગ્રી સેલ્સિયસ નોંધાયું હતું.
અમદાવાદ મેડિકલ એસોસિયેશનના પ્રેસિડેન્ડ ડોક્ટર ધીરેન મેહતાએ જણાવ્યું હતું કે, ઓપીડીમાં જેટલા પણ દર્દીઓ આવે છે તેમાંથી ૫૦ ટકાથી વધુ દર્દીઓ ગળાના ઈન્ફેક્શનની ફરિયાદો લઈને આવે છે. તાવના કેસ ઘણા ઓછા છે. મોટા ભાગના કેસ ગળામાં અને શરીરમાં દુખાવો, શરદી અને સૂકી ઉધરસના હોય છે. અમારું માનવું છે કે હાલમાં લગ્નની સિઝનમાં લોકો મોટી સંખ્યામાં એકઠા થતાં હોય છે અને તેના કારણે વાયરસ ઝડપથી ફેલાય છે. જોકે, આવા કેસો ગંભીર નથી હોત અને સારવારના પાંચથી સાત દિવસની અંદર આ લક્ષણો ગાયબ થઈ જાય છે.
અમદાવાદ ફેમિલી ફિઝિશિયન્સ એસોસિયેશનના પ્રેસિડેન્ટ ડોક્ટર વિજય મૌર્યએ જણાવ્યું હતું કે, શરૂઆતમાં રિકવરીનો સમયગાળો બેથી ત્રણ દિવસનો હતો, પરંતુ હાલમાં આ સમયગાળો વધી ગયો છે અને રિકવર થવામાં એક સપ્તાહ કે તેનાથી વધુનો સમય લાગે છે. જે લોકો આવી બીમારીઓ પ્રત્યે સંવેદનશીલ હોય છે તેમને રોટાવાયરસ અને અન્ય ચેપથી બચવા માટે રસીકરણ લેવાની સલાહ આપવામાં આવે છે. અમે લોકોને થોડા સમય માટે ઠંડા પીણાં અને બહાર ખાવાનું ટાળવાની અને શકય હોય ત્યારે હૂંફાળું પાણી પીવાની સલાહ આપીએ છીએ. હોસ્પિટલોમાં પણ ઓપીડી કેસોમાં ફ્લુ જેવા લક્ષણો ધરાવતા દર્દીઓની સંખ્યામાં ઉછાળો નોંધાયો છે. એક્સપર્ટ્સનું કહેવું છે કે, જેટલા પણ કેસ નોંધાયા છે તે કદાચ થોડા ઓછા હોઈ શકે છે કેમ કે ઘણા લોકો આવા લક્ષણો સામે કાઉન્ટર મેડિસિન લેતા હોય છે. શહેરના એક ડોક્ટરે જણાવ્યું હતું કે, સામાન્ય રીતે દિવાળી બાદ આવો ટ્રેન્ડ જોવા મળતો હોય છે અને જાન્યુઆરીના મધ્ય સુધીમાં તે ધીમો પડી જાય છે. પરંતુ આ વર્ષે તો એક મહિનાથી પણ વધારે સમયથી આવું જોવા મળી રહ્યું છે જેની તીવ્રતામાં ફેરફાર જોવા મળ્યો છે. (રર.૧૬)
(4:07 PM IST)
છેલ્લા 8 દિવસમાં સૌથી લોકપ્રિય 
