ધર્મશાલામાં ઈન્દ્રુનાગ સાઈટ પર ટેન્ડમ પેરાગ્લાઈડિંગ ફ્લાઈટ કરતી વખતે ગુજરાતની એક યુવતીનું મૃત્યુ થયું હતું.પેરાગ્લાઈડર ટેક ઓફ કર્યા બાદ તરત જ ઊંડી ખાઈમાં પડી જવાને કારણે આ ઘટના બની હતી. ગુજરાતના અમદાવાદની 19 વર્ષની પ્રવાસી યુવતીના મૃત્યુથી પરિવારજનો શોકમાં છે. આ અકસ્માતમાં પેરાગ્લાઈડર પાઈલટને પણ ઈજા થઈ છે, જેને સામાન્ય ઈજા થઈ છે. પાયલટને ઝોનલ હોસ્પિટલ ધર્મશાળામાં દાખલ કરવામાં આવ્યો છે જ્યાં તેની સારવાર કરવામાં આવી છે.

એસપી કાંગડા શાલિની અગ્નિહોત્રીએ જણાવ્યું કે, પેરાગ્લાઈડિંગ ટેન્ડમ ફ્લાઈટ દરમિયાન એક મહિલા પ્રવાસીનું મોત થયું હતું. આ અંગે ધર્મશાળા પોલીસ સ્ટેશનની ટીમ દ્વારા તપાસ કરવામાં આવી રહી છે.

મૃતકની ઓળખ ખુશી જીગ્નેશભાઈ ભાવસાર ઉંમર વર્ષ 19 તરીકે થઈ છે. જેઓ અમદાવાદના નારણપુરા સ્થિત સહજાનંદ એવન્યુ ટોરેન્ટ પાવર લિમિટેડ પાસે રહે છે. જોકે સહજાનંદ એવન્યુના એક રહેવાસીએ જણાવ્યું કે, પરિવાર છેલ્લા એક-દોઢ વર્ષથી આ સોસાયટીમાં નથી રહેતો. તેઓ તેમના પરિવાર સાથે મેમનગર બાજુ કોઈક સોસાયટીમાં રહે છે. સમાચાર મારફતે જાણકારી મળી છે કે અમારી સોસાયટીમાં મોટી થયેલી દીકરી હવે નથી રહી.

ધર્મશાળાના તાહુ ચોલા નિવાસી પ્યારે લાલના પુત્ર પાયલટ મુનીશ કુમારે ટેન્ડમ ફ્લાઈટ ઉડાવી હતી. ઈન્દ્રનાગ સાઈટ પરથી અયોગ્ય રીતે ટેકઓફ કરવાને કારણે પેરાગ્લાઈડર અકસ્માતનો ભોગ બન્યો હતો.
 દુર્ઘટના બાદ મહિલા પ્રવાસી અને પાયલટને ઝોનલ હોસ્પિટલ ધર્મશાળા લઈ જવામાં આવ્યા હતા. પરંતુ તબીબોએ પ્રવાસી યુવતીને મૃત જાહેર કરી હતી, જ્યારે પાયલોટની સારવાર ચાલી રહી છે. મહિલા પ્રવાસી ગુજરાતની હતી અને તેના પરિવાર સાથે ધર્મશાળાની મુલાકાતે આવી હતી. તે જ સમયે, પેરાગ્લાઇડરના ક્રેશને કારણે, સુરક્ષાને લઈને મોટા પ્રશ્નો ફરીથી ઉભા થવા લાગ્યા છે કે કેમ આ ઘટના સાંજે 5:55 વાગ્યે બની હતી. ખાસ વાત એ છે કે પેરાગ્લાઇડિંગને સાંજે 5 વાગ્યા સુધી જ મંજૂરી આપવામાં આવી હતી.

ધર્મશાલા પોલીસ સ્ટેશનના એસએચઓ નારાયણના જણાવ્યા અનુસાર, ટેકઓફ કરતી વખતે પેરાગ્લાઈડર ન ખૂલવાને કારણે યુવતી 60 ફૂટ ઊંડી ખીણમાં ખાબકી હતી. અકસ્માત બાદ પરિવારજનો તરત જ ખુશીને ઝોનલ હોસ્પિટલ ધર્મશાલા લઈ ગયા, જ્યાં તબીબોએ તેને મૃત જાહેર કરી હતી. પોલીસે મૃતદેહનો કબજો મેળવી આગળની કાર્યવાહી હાથ ધરી છે. ઘટનાની ગંભીરતાને ધ્યાનમાં લઈને પોલીસે પરિવારના સભ્યો અને પેરાગ્લાઈડરના પાઈલટનાં નિવેદન નોંધ્યાં છે. આ ઉપરાંત અકસ્માતની ઝીણવટભરી તપાસ માટે પાઈલટને લગતી માહિતી પણ એકત્રિત કરવામાં આવી રહી છે.