તા. ૩ સપ્ટેમ્બર ર૦ર૫ વિક્રમ સંવત ર૦૮૧ ભાદરવો સુદ – ૧૧ બુધવાર
લગ્ન બાદ લાંબો સમય દૂર રહેવું તે ક્રૂરતા : હાઇકોર્ટે છૂટાછેડા મંજુર કર્યા
પતિ માનસિક ક્રૂરતા સાબિત કરવામાં સફળ રહયો : હનીમૂન બાદ ૧૦ વર્ષથી પતિ આણંદમાં અને પત્નિ ઓસ્ટ્રેલિયામાં, પતિને વિઝા મળી શકતા નથી
અમદાવાદ, તા.૧૯: હનીમૂન બાદ છેલ્લા ૧૦ વર્ષથી પતિ આણંદમાં અને પત્ની ઓસ્ટ્રેલિયામાં રહેતી હતી. પતિને વિઝા મળી શકતા ન હોવાથી તેણે કંટાળી વર્ષ ૨૦૧૫માં સૌપ્રથમ આણંદની ફેમિલી કોર્ટમાં છૂટાછેડાની અરજી દાખલ કરી હતી. જેને વર્ષ ૨૦૧૭માં નકારી દેવાઈ હતી. જેને પતિએ ગુજરાત હાઇકોર્ટમાં પડકારી હતી. જેમાં હાઇકોર્ટે નોંધ્યું હતું કે ૧૦ વર્ષથી પત્ની ઓસ્ટ્રેલિયા રહે છે. કાયદા અને સુપ્રીમ કોર્ટના ચુકાદા મુજબ લગ્ન બાદ લાંબો સમય દૂર રહેવું તે ક્રૂરતા છે. જેથી પતિની અરજી ગ્રાહ્ય રાખીને હાઇકોર્ટે આણંદની ફેમિલી કોર્ટનો ચુકાદો રદ્દ ઠેરવ્યો હતો. તેમજ પતિની છૂટાછેડાની અરજી ગ્રાહ્ય રાખી હતી.
આણંદમાં રહેતા એક યુવકના લગ્ન ઓસ્ટ્રેલિયામાં રહેતી યુવતી સાથે ફેબ્રુઆરી, ૨૦૧૩માં થયા હતા. તેમના હનીમૂન બાદ પત્ની માર્ચ, ૨૦૧૩માં પરત ઓસ્ટ્રેલિયા જતી રહી હતી. તેઓ ફોન અને ઇન્ટરનેટથી એક બીજાના સંપર્કમાં રહેતા હતા. બીજી તરફ પતિએ પણ ઓસ્ટ્રેલિયાના કાયમી વિઝા મેળવવા માટે IELTSની તૈયારીઓ શરૂ કરી દીધી હતી. આ દરમિયાન ઓગસ્ટ, ૨૦૧૩માં પત્ની પરત ભારત આવી હતી. જ્યાં બંને વચ્ચે વિવાદો શરૂ થયા હતા. સપ્ટેમ્બર ૨૦૧૩માં પત્ની પરત ઓસ્ટ્રેલિયા ગઈ હતી. તે ફેબ્રુઆરી, ૨૦૧૪માં પતિને જણાવ્યા વગર જ ઓસ્ટ્રેલિયાથી લંડન ગઈ હતી. તે વચ્ચે જ્યારે લંડનથી ભારત આવી ત્યારે પણ પતિને જાણ કરી નહોતી.
પત્નીએ પતિને જણાવ્યું હતું કે તે ગમે તેમ કરીને ઓસ્ટ્રેલિયાના કાયમી વિઝા મેળવે નહીં તો તેઓ સાથે રહી શકશે નહીં. બંને પતિ પત્ની જૂન ૨૦૧૪થી એક છત નીચે રહ્યા નથી. પતિના કહ્યાં મુજબ પત્નીએ તેને માનસિક ત્રાસ આપી તેની સાથે બોલવાનું પણ બંધ કરી દીધું હતું. પતિએ આણંદની ફેમિલી કોર્ટમાં છૂટાછેડાની અરજી દાખલ કરતા પત્નીએ પોતાના પિતાને પોતાના વતી કેસ રજૂ કરવા પાવર ઓફ એટર્ની કરી આપી હતી. જેમાં એવો કેસ ઊભો કરાયો હતો કે પતિએ ઓસ્ટ્રેલિયામાં સેટલ થવું હોવાથી તેની સાથે લગ્ન કર્યાં હતા. જો કે, આણંદ ફેમિલી કોર્ટે તે અરજી વર્ષ ૨૦૧૭માં નકારી કાઢી હતી.
જેની સામે પતિએ હાઇકોર્ટમાં અરજી કરી હતી. જેમાં પતિના વકીલ તરફથી રજૂઆત કરવામાં આવી હતી કે પત્નીએ પતિ સાથે માનસિક ક્રૂરતા આચરી છે. જૂન ૨૦૧૪થી તેઓ એક સાથે રહેતા નથી. પત્નીને પતિ સાથે આણંદમાં રહેવું નથી, તેને લગ્નની કોઈ જવાબદારી નિભાવી નથી. જ્યારે પત્નીના વકીલે દલીલ કરી હતી કે પતિ જ ચીટર છે, તેને ઓસ્ટ્રેલિયામાં સ્થાયી થવા માટે આ લગ્ન કર્યાં હતા. જો પતિ ઓસ્ટ્રેલિયાના કાયમી વિઝા ન મેળવી શકે, તો તેમાં પત્ની શું વાંક ?
હાઇકોર્ટે છૂટાછેડા મંજૂર કરતા નોધ્યું હતું કે પતિ-પત્ની બંને વર્ષ ૨૦૧૪થી અલગ રહે છે. પત્ની લગ્ન પહેલા અને લગ્ન પછી પણ ભારતમાં રહી નથી અને ઓસ્ટ્રેલિયામાં રહે છે. બંને વચ્ચે પતિના વિઝાને લઈને વિખવાદ શરૂ થયો હતો. પત્ની હવે ભારત આવવા તૈયાર નથી. ફેમિલી કોર્ટની ટ્રાયલમાં પણ પત્ની હાજર રહી નહોતી કે તેનું કોઈ નિવેદન લેવાયું નથી. સુ-ીમ કોર્ટના ચુકાદા મુજબ લાંબા સમયથી પતિ-પત્ની એક સાથે ન રહે તો તેને ક્રૂરતા કહેવામાં આવે છે. ફેમિલી કોર્ટે પોતાના ચુકાદામાં ભૂલ કરી છે, પતિ-પત્ની ફરીથી ભેગા થઈ શકે તેવી શકયતા નથી. પત્નીએ પોતાના લગ્નની કોઈ જવાબદારી નિભાવી નથી. વળી પત્નીએ ભરણપોષણનો પણ કોઈ દાવો કર્યો નથી અને પતિ માનસિક ક્રૂરતા સાબિત કરવામાં સફળ રહ્યો છે ત્યારે આ છૂટાછેડાને મંજૂર કરવામાં આવે છે.
(9:38 AM IST)
છેલ્લા 8 દિવસમાં સૌથી લોકપ્રિય 
