અંબાજી,તા.૬,

રાજ્ય મંત્રી હર્ષ સંઘવીએ નવરાત્રિ પર્વમાં રાત્રે પાંચ વાગ્યા સુધી રમવાની છૂટ આપવાની જાહેરાત કરી હતી. જોકે, બનાસકાંઠા સાંસદ ગેનીબેન ઠાકોરે તેની સામે સવાલો ઉઠાવ્યા હતા. તેનો જવાબ આપતાં હર્ષ સંઘવીએ ગુજરાતના લોકો ગુજરાત નહીં તો શું પાકિસ્તાનમાં ગરબે રમશે.  આ નિવેદન બાદ ગેનીબેને વળતો જવાબ આપતાં તમારી કે તમારા ડિપાર્ટમન્ટની તાકાત તો છે નહીં કાયદો અને વ્યવસ્થા જાળવવાની તેમ કહેતાં ફરી રાજકારણ ગરમાયું છે.

પ્રથમ નવરાત્રિએ દર વર્ષની જેમ આ વખતે પણ પ્રથમ નોરતે યાત્રાધામ અંબાજીમાં મહાઆરતીનું આયોજન થયું હતું. જેમાં જિલ્લા કલેક્ટર અને બનાસકાંઠા સાંસદ ગેનીબેન ઠાકોર ઉપસ્થિત રહ્યા હતા. મહાઆરતી પછી સાંસદ ગેનીબેને મીડિયા સમક્ષ નિવેદન આપતાં જણાવ્યું હતું કે, ગુજરાતમાં પહેલેથી જ કાયદો અને વ્યવસ્થા જાળવવામાં ગૃહ મંત્રાલય નિષ્ફળ નીવડ્યું છે.

 એમાં પણ ગરબા રમવાનો સમય રાત્રે ૧૨ વાગ્યાની જગ્યાએ સવારે ૫ વાગ્યા સુધી રમવાની છૂટ અંગે સાંસદ ગેનીબેન ઠાકોરે સવાલો ઉઠાવ્યા હતા.

જેને પગલે સુરત મુકામે એજ રાત્રે નવરાત્રિ આયોજનના સ્ટેજ પરથી ગૃહ પ્રધાન હર્ષ સંઘવીએ ગેનીબેનને વળતો જવાબ આપતાં કહ્યું હતું કે, હું તમારા બધા ખેલૈયાની ગરબા રમવાની લાગણીને માન આપી સવારે પાંચ વાગ્યા સુધીની પરવાનગી આપી છે.

જેનાથી અમુક લોકોને વાંધો છે અને ગુજરાતીઓ ગરબા ગુજરાતમાં નહી રમે તો ક્યાં પાકિસ્તાનમાં રમશે, ગૃહમંત્રીના આ નિવેદનથી ફરી રાજકરણ ગરમાયું છે.

હવે બીજા નોરતે ગેનીબેને ગૃહરાજ્ય મંત્રીને વળતો જવાબ આપ્યો છે. જેમાં બીજા નોરતે દાંતા મુકામે ઠાકોર સમાજ દ્વારા વિજેતા સાંસદ ગેનીબેન ઠાકોરનો સન્માન સમારંભ રાખવામાં આવ્યો હતો. જેમાં ગેનીબેન ઉપસ્થિત રહ્યા હતા. બાદમાં અંબાજી દર્શન કરવા ગયા હતા અને ફરીથી નિવેદન આપ્યું હતું કે, ગુજરાતમાં બેન-દીકરીઓ સલામત નથી, રોજનાં પાંચ-પાંચ કિસ્સાઓ બનતા હોય ત્યારે એક જવાબદાર ગૃહમંત્રી એમ કહે કે, ગરબા પાકિસ્તાનમાં થોડી રમાશે, એ યોગ્ય નથી.

તમારી કે તમારા ડિપાર્ટમેન્ટની તાકાત નથી બેન દીકરીઓની સુરક્ષા કરવાની. હું માત્ર એમ કહેવા માંગુ છું કે, ખેલૈયાઓ આસ્થા સાથે ગરબા રમે અને દીકરીઓ પણ ગરબા રમે પણ પોતાના પરિવાર સાથે ગરબા રમવા જાય અને એમના જ સાથે પરત ઘરે જાય. જેથી કરીને કોઈ અનિચ્છનિય ઘટના ન બને. આમ, સતત બે નવરાત્રિ નેતાઓ વચ્ચે ગરબા યુદ્ધ ચાલ્યું હતું.