નર્મદા,તા.૩૦,

નર્મદા જિલ્લાના રાજપીપળાથી સ્ટેચ્યુ ઓફ યુનિટી જવાના માર્ગ ઉપર જીતપુરા ગામની સીમમા આવેલાં શ્રદ્ધા સબુરી હોટેલની બરોબર બાજુમાં આવેલ ઇન્ડિયન ઓઇલના પેટ્રોલ પંપમા પહેલા બ્લાસ્ટ થયો અને બાદમા આખું પેટ્રોલ પંપ આગની જ્વાળાઓમાં લપેટાઈ જતા અફરાતફરીનો માહોલ સર્જાયો હતો.આ આગની ઘટનામાં ૨ કર્મચારીઓ ગંભીર રીતે દાઝી જતા એમને રાજપીપળા સિવિલ હોસ્પિટલમાં સારવાર અર્થ ખસેડાયા છે. ૨૮ જુનના બપોરે ૨ વાગ્યાની આસપાસ પેટ્રોલ પંપ ઉપર અંડરગ્રાઉન્ડ ટાંકી ચેન્જ કરવાનું કામ કંપનીના માણસો કરી રહ્યા હતા.એ દરમિયાન કોઈ કારણોસર બ્લાસ્ટ થયો હતો અને આગ લાગી ગઈ હતી.રાજપીપળા ફાયરબ્રિગેડના કર્મચારીઓએ તાત્કાલિક ત્યાં પહોંચી આગ ઓલવવાની કામગીરી શરૂ કરી હતી અને અડધો કલાકના સમયમાં આગ પરત કાબુ મેળવી લીધો હતો.આગની જ્વાળાઓમાં અને ધુમાડાના ગોટામા લપેટાઈ ગયેલો પેટ્રોલ પંપના દ્રશ્યો રાજકોટ ગેમ ઝોનની યાદ ફરી એક વખત તાજી કરાવી ગયા છે.આગની આ ઘટનામાં કંપનીના બે કર્મચારીઓમાં નરેન્દ્રભાઇ રામુપ્રસાદ ૧૨ ટકા જેટલુ જ્યારે અજયભાઈ હરીનંદન નામના કર્મચારી ૪૫ ટકા દાઝી ગયા છે અને ફેક્ચર પણ થયું હોવાનું જાણવા મળ્યું છે.એ બંનેવ કર્મચારીઓને ૧૦૮ દ્વારા સારવાર માટે રાજપીપળા સિવિલ હોસ્પિટલ ખાતે ખસેડવામાં આવ્યા હતા, હાલ તેઓ સારવાર હેઠળ છે.અત્રે ઉલ્લેખનીય છે કે આ આગ લાગવાનું કારણ શું હોઈ શકે એ હજુ સુધી જાણી શકાયું નથી. મળતી માહીતી મુજબ જો ટાંકામાં વધુ પેટ્રોલ હોત તો મોટી દુર્ઘટના બની હોત પરંતુ પેટ્રોલ થોડુક જ હોવાના કારણે સદનસીબે કોઈ જાનહાનિ થઈ નથી.રાજપીપળા પોલીસે આ બાબતની નોંધ લઈ આગળની કાર્યવાહી કરી છે.