ખેડા જિલ્લામાં આવેલા જગવિખ્યાત યાત્રાધામ ડાકોર ખાતે શ્રી રણછોડજી મંદિરમાં આગામી 15 જુલાઈના રોજ 254મી રથયાત્રા નીકળવાની છે. જેને લઈને મંદિર સંચાલક મંડળ દ્વારા તડામાર તૈયારીઓ આરંભી દેવાઈ છે. આ પાવન અવસર પર મંદિર કમિટીએ સેવક આગેવાનો સાથે બેઠકનું આયોજન કરીને રથયાત્રાના દિવસનો દર્શનનો સમય નિર્ધારિત કર્યો છે. રથયાત્રાના દિવસે સવારે 6 વાગ્યાથી મંદિરના દ્વાર ભક્તો માટે ખુલી જશે.

રથયાત્રાના દિવસે સવારે 6 વાગ્યે રોજ મંદિર ભક્તો માટે ખુલી જશે.

• 6.15 વાગ્યાના ગાળામાં શ્રીજી મહારાજની મંગળા આરતી ઉતારવામાં આવશે.
• પ્રભુની મંગળા આરતી કરી લીધા બાદ તેમને ત્રણ ભોગ અને મહાભોગ અર્પણ કરવામાં આવશે,
• સવારે 9 વાગ્યાના અરસામાં મંદિરની પરિક્રમા માર્ગમાં ગોપાલલાલજી મહારાજનું રથમાં વિરાજીત કરાશે.

ગોપાલલાલજી મહારાજને ચાંદી અને પિત્તળના રથમાં વારાફરતી વિરાજમાન કરાવીને તેમને મંદિર પરિસરમાં 11 વખત પરિક્રમા કરાવવામાં આવશે, ઉપરાંત આ રથોને મંદિર બહાર પ્રસ્થાન કરાવીને નિર્ધારિત માર્ગો પર આગળ વધારાશે. આ રથયાત્રામાં વિવિધ ભજનમંડળીઓ સહિત હજારોની સંખ્યામાં ભક્તોની મોટી ભીડ જોડાશે.

સંપૂર્ણ રથયાત્રાના રુટ પર 15 બેઠકો પર રથયાત્રા રોકાણ કરશે, જ્યાં પ્રભુજીની પૂજા-આરતી કરવામાં આવશે, ભક્તો તેમને પ્રેમ પૂર્વક ભોગ ધરાવશે. વૈષ્ણવો ભગવાનની પૂજા કરી શકે માટે રથયાત્રાના રુટ પર રથને ઉભો પણ રાખવામાં આવશે. આમ સવારના 9 વાગ્યે પ્રસ્થાન કરેલી રથયાત્રા રાત્રિના 8થી 8:30ના સમયગાળામાં મંદિરમાં પરત ફરશે. પ્રભુજીની રથયાત્રા પ્રસ્થાન કરે ત્યાંથી લઈને મંદિર પરત ફરે ત્યાં સુધી મંદિરના દ્વાર ભક્તોના દર્શન માટે ખુલ્લા મુકવામાં આવશે.