​ડાકોર: ગુજરાતના સુપ્રસિદ્ધ યાત્રાધામ ડાકોરમાં આજે બુધવારે પરંપરાગત ઉત્સાહ અને ભક્તિસભર વાતાવરણમાં ભગવાન રણછોડરાયજીની ૨૫૪મી ભવ્ય રથયાત્રા નીકળી હતી. દર વર્ષે અષાઢી બીજની આસપાસના દિવસોમાં આવતા પુષ્ય નક્ષત્રના શુભ દિવસે નીકળતી ઠાકોરજીની આ નગરયાત્રામાં આ વર્ષે પણ ભક્તોનું ઘોડાપૂર ઉમટ્યું હતું. ‘જય રણછોડ, માખણ ચોર’ના ગગનભેદી નાદ સાથે સમગ્ર ડાકોર નગરી ભક્તિના રંગે રંગાઈ ગઈ હતી.

​મંગળા આરતીથી આરંભાયો ઉત્સવ

વહેલી સવારે ૬:૧૫ વાગ્યે નિજ મંદિરમાં મંગળા આરતી બાદ ભગવાન રણછોડરાયજીની સ્નાન સેવા અને વિશેષ મહાભોગની વિધિ સંપન્ન કરવામાં આવી હતી. ત્યારબાદ મંદિરની પરંપરાગત પરિક્રમા પૂર્ણ કરીને ગોપાલલાલજી મહારાજને ચાંદીના ભવ્ય રથમાં બિરાજમાન કરવામાં આવ્યા હતા. સવારે નિર્ધારિત સમયે મંદિરના મુખ્ય દ્વારથી રથયાત્રાનું પ્રસ્થાન થયું ત્યારે હજારો ભક્તોની આંખોમાં શ્રદ્ધાના અશ્રુ અને મુખ પર પ્રભુના જયઘોષ હતા.

​પરંપરાગત રૂટ પર ભક્તિનું ઘોડાપૂર

ઠાકોરજીની આ શાહી સવારી ડાકોરના મુખ્ય માર્ગો પર ફરી હતી. રથયાત્રા ગૌશાળા, લાલબાગ, મહાપ્રભુજીની બેઠક, નરસિંહ ટેકરી, રાધા કુંડ થઈ કેવડેશ્વર સુધી પહોંચી હતી. આ સમગ્ર રૂટ પર વિવિધ સેવાભાવી સંસ્થાઓ અને નગરજનો દ્વારા ઠેર-ઠેર ભગવાનનું ભવ્ય સ્વાગત કરવામાં આવ્યું હતું. શ્રદ્ધાળુઓ માટે ઠંડા પીણા, શરબત, ફણગાવેલા મગ, કેરી અને જાંબુના પ્રસાદનું વિતરણ કરવામાં આવ્યું હતું. ભક્તોએ રથને નિહાળી ધન્યતા અનુભવી હતી.

​અદભૂત સુરક્ષા વ્યવસ્થા અને આયોજન

રથયાત્રા દરમિયાન કાયદો અને વ્યવસ્થા જાળવવા માટે વહીવટી તંત્ર દ્વારા ચાંપતો બંદોબસ્ત ગોઠવવામાં આવ્યો હતો. આ સુરક્ષા વ્યવસ્થામાં એક ડીવાયએસપી, બે પોલીસ ઇન્સ્પેક્ટર, છ પીએસઆઈ અને હોમગાર્ડના જવાનો સહિત કુલ ૩૮૮ પોલીસ કર્મચારીઓ ખડેપગે તૈનાત હતા. આ ઉપરાંત સમગ્ર રથયાત્રાના રૂટ પર ડ્રોન સર્વેલન્સ અને ૩ડી કેમેરાની મદદથી સતત મોનિટરિંગ કરવામાં આવ્યું હતું, જેથી ભક્તો કોઈ પણ અવરોધ વિના દર્શન કરી શકે.

​આ વર્ષની રથયાત્રામાં બે ભવ્ય રથ, ત્રણ પાલખી, સુશોભિત ઘોડા, બેન્ડવાજાં અને વિવિધ ભજન મંડળીઓ મુખ્ય આકર્ષણનું કેન્દ્ર રહ્યા હતા. નિર્ધારિત રૂટની પરિક્રમા પૂર્ણ કર્યા બાદ ભગવાન રણછોડરાયજી રાત્રે ૮ વાગ્યાના સુમારે ફરી નિજ મંદિરે પરત ફર્યા હતા, જ્યાં ભક્તિભાવપૂર્ણ માહોલમાં આરતી કરી પ્રભુને પોઢાડવામાં આવ્યા હતા.