અમદાવાદ : અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર તે સમયે ભારે અફરાતફરી મચી ગઈ જ્યારે બાગડોગરા જતી સ્પાઇસજેટની ફ્લાઇટ અચાનક રદ કરી દેવામાં આવી. આ અણધારી જાહેરાતના કારણે અંદાજે 190 જેટલા મુસાફરો એરપોર્ટ પર જ અટવાઈ ગયા હતા. એરલાઇન્સની ગંભીર બેદરકારી સામે રોષે ભરાયેલા મુસાફરોએ યોગ્ય જવાબ અને તાત્કાલિક વૈકલ્પિક વ્યવસ્થાની માંગ સાથે ટર્મિનલ-2ના ગેટ નંબર-5 પાસે ધરણા પર બેસીને ઉગ્ર વિરોધ પ્રદર્શન શરૂ કર્યું હતું.

મળતી વિગતો અનુસાર, આ ફ્લાઇટનો નિર્ધારિત પ્રસ્થાન સમય બપોરે 3:20 વાગ્યાનો હતો. આ મુસાફરોમાં માત્ર અમદાવાદ જ નહીં પરંતુ સુરત, મહેસાણા અને જેતપુર સહિત ગુજરાતના વિવિધ દૂરના વિસ્તારોમાંથી આવેલા પ્રવાસીઓ પણ સામેલ હતા. મુસાફરોએ એરલાઇન્સ સામે ગંભીર આક્ષેપ કરતા જણાવ્યું હતું કે તેમની પાસે તમામ માન્ય દસ્તાવેજો અને બોર્ડિંગ પાસ હોવા છતાં તેમને ટર્મિનલની અંદર પ્રવેશ આપવામાં આવ્યો નહોતો. ફ્લાઇટ રદ થવા પાછળનું કોઈ ચોક્કસ કારણ ન અપાયું હોવાથી પ્રવાસીઓમાં ભારે નારાજગી ફેલાઈ હતી.

એરલાઇન્સ તરફથી કોઈ પણ પ્રકારનો સંતોષકારક જવાબ કે મુસાફરો માટે આગળની મુસાફરીની કોઈ વૈકલ્પિક વ્યવસ્થા કરવામાં આવી ન હતી. જેના કારણે ગુસ્સે ભરાયેલા મુસાફરો ટર્મિનલ-2ના ગેટ નંબર-5 પાસે બેસી ગયા હતા અને સૂત્રોચ્ચાર કર્યા હતા. મુસાફરોએ સ્પષ્ટ ચીમકી આપી હતી કે જ્યાં સુધી તેમની સમસ્યાનું કાયમી નિરાકરણ નહીં આવે અને તેમને ગંતવ્ય સ્થાને મોકલવાની વ્યવસ્થા નહીં થાય ત્યાં સુધી તેઓ આ ધરણા ચાલુ રાખશે.

આ સમગ્ર ઘટનાના પગલે એરપોર્ટ પરિસરમાં થોડા સમય માટે ભારે હોબાળો અને અરાજકતાનો માહોલ સર્જાયો હતો. સુરક્ષાકર્મીઓ અને એરપોર્ટ સ્ટાફે પરિસ્થિતિને કાબૂમાં લેવાના પ્રયાસો હાથ ધર્યા હતા, પરંતુ મુસાફરોનો રોષ શાંત થવાનું નામ લેતો ન હતો.