(  અશ્વિન વ્યાસ દ્વારા)ગાંધીનગર, તા. 15 : બાંધકામ શ્રમિકો અને તેમના પરિવારજનોને ન્યૂનતમ દરે પૌષ્ટિક ભોજન ઉપલબ્ધ કરાવવા ગુજરાત સરકારના શ્રમ, કૌશલ્ય વિકાસ અને રોજગાર વિભાગ દ્વારા ‘શ્રમિક અન્નપૂર્ણા યોજના’ નો વ્યાપ વધારવામાં આવી રહ્યો છે. જે અંતર્ગત આવતીકાલે શુક્રવારે રાજ્યના 28 જિલ્લાઓમાં કુલ 101 નવા શ્રમિક અન્નપૂર્ણા કેન્દ્રોનું લોકાર્પણ કરાશે.

મુખ્યમંત્રી ભૂપેન્દ્રભાઈ પટેલ અમદાવાદના ચાણક્યપુરી ખાતેના કેન્દ્રનો શુભારંભ કરાવશે અને શ્રમદાન સાથે શ્રમિકોને ભોજન પીરસી સંવાદ કરશે. વિવિધ જિલ્લાઓમાં મંત્રીઓ, સાંસદો અને ધારાસભ્યો પણ કેન્દ્રોનું લોકાર્પણ કરશે.

યોજના હેઠળ પ્રતિ વ્યક્તિ માત્ર 5 રૂપિયામાં રોટલી, શાક, કઠોળ, ભાત, અથાણું, મરચાં અને ગોળ સહિતનું પૌષ્ટિક ભોજન અપાય છે, અઠવાડિયામાં એક વાર સુખડી અને શીરા જેવું મિષ્ટાન્ન પણ આપવામાં આવે છે.

અત્યાર સુધીમાં યોજના હેઠળ 5 કરોડથી વધુ ભોજનનું વિતરણ થયું છે. હાલ દરરોજ સરેરાશ 35 હજારથી વધુ ભોજન વિતરિત થાય છે, 101 નવા કેન્દ્રો શરૂ થવાથી દૈનિક વિતરણમાં 10 હજારનો વધારો થઈ અંદાજે 45 હજાર લોકોને લાભ મળશે. કડીયાનાકા ખાતે સ્થાયી કેન્દ્રો ઉપરાંત બાંધકામ સાઈટ પર 50 થી વધુ શ્રમિકો હોય ત્યાં ડોરસ્ટેપ ડિલિવરીની સુવિધા પણ છે, અત્યાર સુધીમાં સાઈટ પર અંદાજે 27 લાખ ભોજન વિતરિત કરાયા છે.