તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ગુજરાતના ૧૦ મહત્વના પવિત્ર યાત્રાધામોની થશે કાયાકલ્પ
કરોડો રૂપિયાના પ્રોજેક્ટ્સને સૈદ્ધાંતિક સ્વીકૃતિ આપવામાં આવી
અમદાવાદ તા.૩: ગુજરાતના સાંસ્કૃતિક, ધાર્મિક અને ઐતિહાસિક વારસાને વધુ સમૃદ્ધ બનાવવા અને પ્રવાસન ક્ષેત્રને નવી ઊંચાઈએ પહોંચાડવાના હેતુથી રાજ્ય સરકાર દ્વારા એક મહત્વપૂર્ણ નિર્ણય લેવામાં આવ્યો છે. મુખ્યમંત્રી ભૂપેન્દ્ર પટેલના અગ્રણી માર્ગદર્શન હેઠળ રાજ્યભરના ૧૦ મહત્વના યાત્રાધામો અને પ્રવાસન સ્થળોના સર્વાંગી વિકાસ અર્થે કરોડો રૂપિયાના પ્રોજેક્ટ્સને સૈદ્ધાંતિક સ્વીકૃતિ આપવામાં આવી છે. આ પ્રોજેક્ટ્સ પૂર્ણ થવાથી શ્રદ્ધાળુઓ અને સહેલાણીઓ માટે આધુનિક પાયાની સુવિધાઓમાં નોંધપાત્ર વધારો થશે, સાથે જ સ્થાનિક વેપાર-રોજગારને પણ મોટો ટેકો મળશે.
શ્રી વરદાયિની માતાજી મંદિર, રૂપાલ (ગાંધીનગર): પ્રસિદ્ધ યાત્રાધામ રૂપાલ ખાતે મંદિર પરિસરમાં યાત્રાળુઓ માટેની ઉત્કૃષ્ટ સુવિધાઓ ઊભી કરવા અને સર્વગ્રાહી વિકાસ માટે રૂ. ૩૫ કરોડ મંજૂર કરાયા છે.
આઈકોનિક ગ્રેટર ગીર પ્રોજેક્ટઃ ગીર અને આસપાસના પ્રવાસન ક્ષેત્રોને આંતરરાષ્ટ્રીય કક્ષાએ પ્રમોટ કરવા અને સુવિધાઓ વધારવા માટે રૂ. ૪૬.૯૧ કરોડ ફાળવાયા છે.
શ્રી જોધલપીર મંદિર, કેસરડી (અમદાવાદ): બાવળા તાલુકાના કેસરડી સ્થિત પવિત્ર ધામના ભવ્ય નવનિર્માણ અને પરિસર વિકાસ અર્થે રૂ. ૨૧.૭૫ કરોડની જોગવાઈ કરાઈ છે.
ગોવર્ધન પર્વત પ્રોજેક્ટ, અંજાર (કચ્છ): કચ્છ જિલ્લામાં પ્રવાસનને પ્રોત્સાહન આપવા અંજાર ખાતે ગોવર્ધન પર્વતના વિશેષ વિકાસ માટે રૂ. ૧૨.૯૮ કરોડ આપવાનો નિર્ણય લેવાયો છે.
અનલગઢ કિલ્લો અને મહાકાળી મંદિર, ગોંડલ (રાજકોટ): ઐતિહાસિક અનલગઢ કિલ્લા અને પરિસરના સુશોભીકરણ તથા વિકાસ અર્થે રૂ. ૫.૦૬ કરોડ મંજૂર થયા છે.
શ્રી ઉનાઈ માતાજી મંદિર સંકુલ, વાંસદા (નવસારી): મંદિર પરિસરમાં ભોજનાલય, કલ્ચરલ હોલ, લાયબ્રેરી અને પ્રદક્ષિણા પથ સહિતના સુધારા માટે રૂ. ૫.૦૩ કરોડ ફાળવાયા છે.
મહીસાગર નદી ઘાટ, ભાદરવા (વડોદરા): સાવલીના ભાદરવા ખાતે ચેહર માતા મંદિર નજીક મહીસાગર કિનારે સુંદર ઘાટ, વોક-વે અને લેન્ડસ્કેપિગ માટે રૂ. ૩.૧૩ કરોડ અનામત રખાયા છે.
શ્રી વાળીનાથ મહાદેવ મંદિર, તરભ (મહેસાણા): ગ્રીન એનર્જી અભિગમ હેઠળ ૧૦૦ kW સોલાર રૂફટોપ અને વીજળીકરણ માટે રૂ. ૨.૬૮ કરોડ મંજૂર કરાયા છે.
શ્રી મહાકાળી માતાજી મંદિર, ઉમરેચા (મહેસાણા): સતલાસણા સ્થિત ‘મીની પાવાગઢ' તરીકે ઓળખાતા ધામમાં સ્ટ્રીટ લાઈટ અને ડ્રેનેજ જેવા કામો માટે રૂ. ૫૦ લાખ આપવામાં આવ્યા છે.
શ્રી ગોરા રામજી મંદિર, ધરમપુર (વલસાડ): મંદિરના પ્રથમ માળ અને છતના સમારકામ, ફલોરિગ તથા કલરકામ માટે રૂ. ૧૮.૯૧ લાખની મંજૂરી અપાઈ છે.
રાજ્ય સરકારના આ સરાહનીય પગલાથી ગુજરાતના પ્રવાસન નકશા પર શ્રદ્ધા અને સંસ્કૃતિના કેન્દ્રો વધુ ઝળહળી ઉઠશે.
(10:05 AM IST)
છેલ્લા 8 દિવસમાં સૌથી લોકપ્રિય 
