મુંબઈ: બોલિવૂડના દિગ્ગજ ફિલ્મ સર્જક અનુભવ સિંહા, જેઓ ‘થપ્પડ’ અને ‘આર્ટિકલ ૧૫’ જેવી સામાજિક મુદ્દાઓ પર આધારિત ફિલ્મો માટે જાણીતા છે, તેમની નવી ફિલ્મ ‘અસ્સી’ હાલમાં Zee5 પર રિલીઝ થઈ છે. જોકે, થિયેટરોમાં આ ફિલ્મે અપેક્ષા મુજબનું પ્રદર્શન કર્યું નહોતું. ઈન્ડિયા ટુડે સાથેની ખાસ વાતચીતમાં અનુભવ સિંહાએ ખૂબ જ નિખાલસતાથી સ્વીકાર્યું કે ફિલ્મ વ્યાપારી રીતે નબળી રહી છે અને તેની પાછળના કારણો પણ રસપ્રદ છે.

વખ્ખાણ જ પડ્યા ભારે!

અનુભવ સિંહાના મતે, ફિલ્મની તરફેણમાં જે વાતો હતી તે જ તેની વિરુદ્ધ ગઈ. તેમણે જણાવ્યું કે, “ઘણા સમીક્ષકોએ ફિલ્મના ખૂબ વખાણ કર્યા, પરંતુ તેમણે ‘ખલેલ પહોંચાડતી ફિલ્મ’ (Disturbing) અથવા ‘આંતરડામાં મુક્કો મારે તેવી’ (Gut-punch) જેવા શબ્દો વાપર્યા. આનાથી સામાન્ય દર્શકો ડરી ગયા. લોકોએ રિવ્યુ વાંચીને વિચાર્યું કે જો આ ફિલ્મ જોઈશું તો મન અશાંત થઈ જશે, અને આ જ કારણસર તેઓ થિયેટર સુધી ન આવ્યા.”

દર્શકોના બદલાતા મિજાજ પર કટાક્ષ

ફિલ્મ નિર્માતાએ વધુમાં ઉમેર્યું કે આજકાલ લોકો પાસે ઘરે બેઠા મનોરંજનના અનેક વિકલ્પો છે. “લોકો હવે થિયેટરમાં જવાનું ટાળે છે કારણ કે તે ઓછું અનુકૂળ છે. માત્ર સિનેમા જ નહીં, ખરીદીની આદતો પણ બદલાઈ ગઈ છે.” તેમણે એ પણ નોંધ્યું કે ૧.૨ મિલિયન લોકોએ થિયેટરમાં ફિલ્મ જોઈ તે પ્રોત્સાહક છે, પરંતુ એક સર્જક તરીકે તેઓ ‘ચંદ્ર’ સુધી પહોંચવાની આશા રાખતા હતા, જે પૂરી ન થઈ.

વાતચીત શરૂ કરવાનો હેતુ

સિંહાએ સ્પષ્ટ કર્યું કે તેઓ ફિલ્મો માત્ર પૈસા કમાવવા માટે નહીં, પણ સમાજમાં સંવાદ શરૂ કરવા માટે બનાવે છે. “જેમ ‘થપ્પડ’ ફિલ્મ જોઈને લોકોએ ઘરેલુ હિંસા પર વાત શરૂ કરી હતી, તેમ ‘અસ્સી’ પણ સમાજમાં પ્રશ્નો ઉભા કરે તેવી મારી ઈચ્છા હતી. આવી ફિલ્મો માટે ફાઇનાન્સ મેળવવું હંમેશા મુશ્કેલ હોય છે, પરંતુ આ જ મારો માર્ગ છે અને હું તેના પર ચાલવાનું ચાલુ રાખીશ.”

Zee5 પર ધૂમ મચાવવાની આશા

ભલે થિયેટરમાં ફિલ્મ પૂરતી ન ચાલી હોય, પણ હવે OTT પ્લેટફોર્મ Zee5 પર તેને મળેલા પ્રતિસાદથી અનુભવ સિંહા અભિભૂત છે. રીલ્સ અને સોશિયલ મીડિયા મેસેજ દ્વારા લોકો આ ફિલ્મના ગહન સંદેશને સમજી રહ્યા છે. ‘મહત્વપૂર્ણ વાર્તા’ અને શાનદાર અભિનયના દમ પર ‘અસ્સી’ હવે ડિજિટલ પ્લેટફોર્મ પર પોતાની અલગ ઓળખ બનાવી રહી છે.