નવી દિલ્હી: તા.૦૮ રામાનંદ સાગરની વર્ષ 1987ની સુપ્રસિદ્ધ ટીવી સિરિયલ 'રામાયણ' આજે પણ લોકોના હૃદયમાં જીવંત છે. આ સિરિયલમાં રાવણની પત્ની અને અત્યંત બુદ્ધિશાળી ગણાતી મંદોદરીનું પાત્ર અભિનેત્રી અપરાજિતા ભૂષણે ભજવ્યું હતું. પરંતુ શું તમે જાણો છો કે મંદોદરીનું પાત્ર ભજવનાર આ અભિનેત્રી વાસ્તવિક જીવનમાં 50ના દાયકાના દિગ્ગજ સુપરસ્ટાર ભારત ભૂષણની દીકરી છે? વિરાટ ફિલ્મી વારસો અને રામાયણની અભૂતપૂર્વ સફળતા છતાં અપરાજિતા આજે ગ્લેમરની ઝાકમઝોળથી જોજનો દૂર છે.
અપરાજિતા ભૂષણે રામાયણમાં મંદોદરીના પાત્રને જે ગંભીરતા અને સૂઝબૂઝથી ભજવ્યું હતું તેના આજે પણ વખાણ થાય છે. સિરિયલમાં તેઓ વારંવાર રાવણને તેના ખોટા કાર્યો, ખાસ કરીને માતા સીતાના અપહરણ વિરુદ્ધ ચેતવણી આપતા અને સત્યનો સાથ આપતા જોવા મળતા હતા. તેમની આ દમદાર એક્ટિંગે તેમને ઘરે-ઘરે લોકપ્રિય બનાવી દીધા હતા. જોકે, સુપરસ્ટાર પિતાની પુત્રી હોવા છતાં તેમણે મુંબઈની માયાનગરીમાં વધુ સમય સુધી ટકવાને બદલે શાંત જીવન પસંદ કર્યું.
હાલમાં અપરાજિતા ભૂષણ ક્યાં છે અને શું કરી રહી છે તે જાણવા માટે તેમના ચાહકો હંમેશા આતુર હોય છે. મળતી માહિતી મુજબ, અભિનય છોડ્યા બાદ તેમણે પોતાનું જીવન આધ્યાત્મિકતા અને લખવા તરફ વાળી દીધું છે. તેઓ એક સફળ લેખિકા અને મોટિવેશનલ સ્પીકર તરીકે કાર્યરત છે. વર્ષો પહેલા જે ચહેરાને લોકોએ મંદોદરી તરીકે પૂજ્યો હતો, તે આજે શાંતિપૂર્ણ અને સાદગીભર્યું જીવન જીવી રહ્યો છે. રામાયણના પ્રસારણના દાયકાઓ પછી પણ અપરાજિતા ભૂષણના અભિનયની છાપ દર્શકોના માનસપટ પર હજુ અકબંધ છે.