મુંબઈ :બોલિવૂડ અભિનેતા આયુષ્માન ખુરાના, સારા અલી ખાન અને રકુલ પ્રીત સિંહ હાલમાં તેમની આગામી ફિલ્મ "પતિ પત્ની ઔર વો દો" ના પ્રમોશનમાં વ્યસ્ત છે. આ દરમિયાન મુંબઈમાં આયોજિત એક કાર્યક્રમનો વીડિયો સોશિયલ મીડિયા પર વાયુવેગે વાયરલ થઈ રહ્યો છે, જેમાં શોના હોસ્ટે કરેલી એક ચોંકાવનારી ટિપ્પણીથી સારા અલી ખાન સ્તબ્ધ જોવા મળી હતી. હોસ્ટે પાપારાઝી દ્વારા લેવામાં આવતા સેલિબ્રિટીઝના વાંધાજનક એન્ગલવાળા ફોટા અને વીડિયો પર ટિપ્પણી કરતા કહ્યું કે, "હું બધી સેલિબ્રિટીઓને અંદરથી ઓળખું છું, હું તેમને પાછળથી પણ ઓળખી શકું છું." આ સાંભળીને સારા અલી ખાનના ચહેરાના હાવભાવ બદલાઈ ગયા હતા અને તેણે આશ્ચર્ય સાથે પૂછ્યું હતું કે, "તમે આ શું કહી રહ્યા છો?"

વાયરલ ક્લિપમાં જોઈ શકાય છે કે જ્યારે સ્ટેજ પર ઉભેલો હોસ્ટ આ પ્રકારની વાતો કરી રહ્યો હતો, ત્યારે સારા અલી ખાન અને રકુલ પ્રીત સિંહ બંને અસહજ અનુભવી રહ્યા હતા. હોસ્ટે વધુમાં મજાકમાં ઉમેર્યું કે તેના આર્કાઇવમાં આવા અનેક વીડિયો છે અને તે આ જોઈને પ્રેક્ટિસ કરે છે. જોકે રકુલ પ્રીત સિંહ આ સ્થિતિને હળવી બનાવવા હસતી જોવા મળી હતી, પરંતુ સારા અલી ખાનની આંખો પહોળી થઈ ગઈ હતી અને તેણે બાજુમાં બેઠેલા આયુષ્માન ખુરાનાને પણ આ અંગે પ્રશ્ન કર્યો હતો. કાર્યક્રમમાં હાજર અન્ય લોકોએ હોસ્ટને રોકવાનો પ્રયાસ કર્યો હતો કે તે ખોટી દિશામાં વાત કરી રહ્યો છે, પરંતુ હોસ્ટે પોતાની મજાક ચાલુ રાખી હતી.

આ વીડિયો સામે આવ્યા બાદ સોશિયલ મીડિયા યુઝર્સે હોસ્ટની આકરી ટીકા કરી છે. કોમેન્ટ સેક્શનમાં લોકો પોતાની નારાજગી વ્યક્ત કરતા લખી રહ્યા છે કે આ કોઈ કોમેડી નથી પરંતુ ‘બેશરમી’ની હદ છે. ઘણા ચાહકોએ નોંધ્યું કે સારા અલી ખાનના હાવભાવ સ્પષ્ટપણે દર્શાવે છે કે હોસ્ટે તેની ગરિમાનું ઉલ્લંઘન કર્યું છે. પાપારાઝી સંસ્કૃતિ અને સેલિબ્રિટીઝની પ્રાઈવસી પર ફરી એકવાર સવાલો ઉભા થયા છે. ફિલ્મ પ્રમોશનના બહાને આવા હલકા સ્તરની મજાક સહન ન કરવી જોઈએ તેવો સૂર પ્રેક્ષકોમાં જોવા મળી રહ્યો છે. હાલમાં આ મુદ્દો ફિલ્મ વર્તુળોમાં ગરમાયો છે.