​ચંદીગઢ: પંજાબી સંગીત જગતમાંથી એક ખૂબ જ દુઃખદ અને આંચકાજનક સમાચાર સામે આવ્યા છે. જાણીતા પંજાબી ગાયક બલજીત સિંહ પોતાના જ નિવાસસ્થાનેથી રહસ્યમય સંજોગોમાં મૃત હાલતમાં મળી આવ્યા છે. ગાયકના ઘરમાંથી તીવ્ર દુર્ગંધ આવવા લાગતા આસપાસના લોકોએ સ્થાનિક પોલીસને જાણ કરી હતી, જેના આધારે ઘટનાસ્થળે પહોંચેલી પોલીસે દરવાજો તોડીને તપાસ કરતા સિંગરનો મૃતદેહ મળી આવ્યો હતો. પ્રાથમિક અંદાજ મુજબ તેમનું મૃત્યુ ચાર દિવસ પહેલા થયું હોવાની શક્યતા વ્યક્ત કરવામાં આવી રહી છે.

​સ્થાનિક રહેવાસીઓના જણાવ્યા અનુસાર, બલજીત સિંહ છેલ્લા કેટલાક દિવસોથી ઘરની બહાર દેખાયા નહોતા અને તેમનું ઘર અંદરથી સતત બંધ હતું. જ્યારે આસપાસના લોકોને તીવ્ર દુર્ગંધ અનુભવાઈ ત્યારે તેમને કોઈ અનિષ્ટ બન્યું હોવાનો સંદેહ ગયો હતો. પોલીસની પ્રાથમિક તપાસ બાદ મૃતદેહને તાત્કાલિક અસરથી પોસ્ટમોર્ટમ માટે સિવિલ હોસ્પિટલ મોકલી આપવામાં આવ્યો હતો.

​પોસ્ટમોર્ટમ અહેવાલના પ્રારંભિક તારણો તેમજ ઘટનાસ્થળની સ્થિતિ પરથી પોલીસ તમામ શંકાસ્પદ પાસાઓને ધ્યાનમાં રાખીને આગળની કાનૂની કાર્યવાહી હાથ ધરી રહી છે. સિંગરના અચાનક અને કરૂણ અવસાનના સમાચાર વાયુવેગે પ્રસરતા જ સમગ્ર પંજાબી મ્યુઝિક ઈન્ડસ્ટ્રી અને તેમના ચાહકવર્ગમાં ભારે શોકની કાલિમા છવાઈ ગઈ છે. પોલીસે ગાયકના પરિવારજનોનો સંપર્ક કરીને કેસ દાખલ કર્યો છે અને આ ઘટના પાછળનું સાચું કારણ જાણવા ઊંડાણપૂર્વક તપાસ શરૂ કરી દીધી છે.