મુંબઈ: બોલિવૂડના જાણીતા પ્રોડ્યુસર રવિ ભાગચંદકા હવે મરાઠી સિનેમાની ખૂબ જ વખણાયેલી અને રાષ્ટ્રીય પુરસ્કાર વિજેતા ફિલ્મ ‘ફનરલ’ (Funeral) નો હિન્દી અવતાર લઈને આવી રહ્યા છે. જીવન અને મૃત્યુ પ્રત્યેના એકદમ અલગ અને હકારાત્મક દ્રષ્ટિકોણને દર્શાવતી આ ફિલ્મની હિન્દી રિમેક માટે હાલ રાઈટિંગ સ્ટેજ પર કામ શરૂ કરી દેવામાં આવ્યું છે. દિલને સ્પર્શી જાય તેવી વાર્તાઓના શોખીન રવિ ભાગચંદકાને આ ફિલ્મની પ્રામાણિકતા અને સાર્વભૌમિક લાગણીઓએ ખૂબ જ પ્રભાવિત કર્યા છે.
ફિલ્મ વિશે વાત કરતા રવિ જણાવે છે કે, “સામાન્ય રીતે ફિલ્મોમાં મૃત્યુને માત્ર દુઃખ અને શોકના ચશ્માથી બતાવવામાં આવે છે, પરંતુ 'ફનરલ' માં પહેલીવાર હૂંફ, માનવતા અને જિંદગીના જશ્નનું અદભૂત મિશ્રણ જોવા મળ્યું. આ ફિલ્મનો ઈમોશનલ લેન્સ ખૂબ જ યુનિક છે. તે દર્શાવે છે કે કોઈનું જવું એ માત્ર ખોટ નથી, પરંતુ ક્યારેક જોડાણ અને સેલિબ્રેશનની ક્ષણ પણ બની શકે છે.”
મરાઠી સંસ્કૃતિમાં ઊંડે સુધી જોડાયેલી આ વાર્તાએ રવિ પર ઊંડી અસર છોડી હતી. તેમનું માનવું છે કે સાચી અને શક્તિશાળી વાર્તા હંમેશા ભાષા અને પ્રદેશની સીમાઓ તોડીને દરેક વ્યક્તિના હૃદય સુધી પહોંચે છે. તેમણે વધુમાં ઉમેર્યું કે, “મને લાગ્યું કે આ વાર્તા તેની મૂળભૂત આત્મા અને વિશ્વસનીયતા સાથે હિન્દી પ્રેક્ષકો સુધી પણ પહોંચવી જોઈએ. આજે જ્યારે પ્રાદેશિક સિનેમા દેશભરમાં સ્ટોરીટેલિંગની વ્યાખ્યા બદલી રહ્યું છે, ત્યારે સારી વાર્તા કોઈ લેબલની મહોતાજ હોતી નથી.”
હાલમાં ફિલ્મની સ્ક્રિપ્ટ પર કામ ચાલી રહ્યું છે અને રિલીઝની ટાઈમલાઈન હજુ નક્કી કરવામાં આવી નથી. ‘ફનરલ’ ના હિન્દી રૂપાંતરણ દ્વારા રવિ ભાગચંદકા એક એવી વાર્તા લોકો સુધી પહોંચાડવા માંગે છે જે માત્ર જીવન જ નહીં, પરંતુ માનવીય સંબંધો અને માણસાઈની પણ દિલથી ઉજવણી કરે - કોઈપણ ફિલ્ટર વગર, માત્ર શુદ્ધ લાગણીઓ સાથે.