અમદાવાદ, તા.૧૮: ભારતની ગુપ્તચર સંસ્થા (Intelligence Bureau) ના પૂર્વ ઉચ્ચ અધિકારી મલોય કૃષ્ણ ધર દ્વારા લિખિત પુસ્તક 'મિશન ટૂ પાકિસ્તાન' પરથી પ્રેરિત વેબ સિરીઝ 'મુખબીર: અ સ્ટોરી ઓફ સ્પાય' હાલ OTT પ્લેટફોર્મ 'ઝી ફાઇવ' (ZEE5) પર પ્રેક્ષકોમાં ભારે આકર્ષણનું કેન્દ્ર બની છે. શિવમ નાયર અને જયપ્રદ દેસાઈના નિશાના હેઠળ બનેલી આ સિરીઝ ૧૯૬૫ના ભારત-પાકિસ્તાન યુદ્ધ સમયના સત્ય બનાવો અને રોમાંચક જાસૂસી મિશન પર આધારિત છે, જે ભારતીય ગુપ્તચરોની સાહસિકતા અને શૌર્યની ઝાંખી કરાવે છે.

આ સિરીઝની કહાણી અનુસાર, ૧૯૬૨ પછી ભારત-પાક સરહદે વધેલા તણાવ વચ્ચે પાકિસ્તાનમાં મોકલાયેલો ભારતીય ખબરી પકડાઈ જતાં, ગુપ્તચર અફસર મૂર્તિ (પ્રકાશ રાજ) દ્વારા હરફન બુખારી (ઝૈન ખાન દુરાની) નામના અનાથ મુસ્લિમ યુવાનને નવી ઓળખ આપી લાહોરમાં પ્લાન્ટ કરવામાં આવે છે. હરફન પાકિસ્તાની જનરલ આહ્યા ખાનના લશ્કરી કાવતરાંની ગુપ્ત માહિતી મેળવી ભારત મોકલે છે. આ જાસૂસી માહિતીના આધારે જ ૧૯૬૬માં અખનૂર બોર્ડર પર પાકિસ્તાન સામેનું યુદ્ધ મહિનાઓ ચાલવાના બદલે માત્ર ૧૬ દિવસમાં જ પૂરું થયું હતું અને પાકિસ્તાને સંયુક્ત રાષ્ટ્ર (UN) માં નમતું જોખવું પડ્યું હતું.

૧૯૭૦ના દશકના લાહોરનું વાતાવરણ, આર્ટ ડાયરેક્શન અને કલાકારોના શાનદાર અભિનયે આ સિરીઝને અત્યંત રસપ્રદ બનાવી છે. લાલ બહાદુર શાસ્ત્રી અને ઇન્દિરા ગાંધી જેવા ઐતિહાસિક પાત્રોની હાજરી ધરાવતી આ સિરીઝમાં દિલીપ શંકર, હર્ષ છાયા, સત્યદીપ મિશ્રા અને ઝોયા અફરોઝ જેવા કલાકારોએ પાકિસ્તાની પાત્રોમાં જીવંત અભિનય કર્યો છે. નાટકીય વળાંકો અને જાસૂસી રોમાંચથી ભરપૂર આ સિરીઝ ભારતીય ગુપ્તચર એજન્સીઓની અદ્રશ્ય કુરબાનીઓની યાદ અપાવે છે.