મુંબઈ: દિવંગત બોલિવૂડ અભિનેતા સુશાંત સિંહ રાજપૂત અને તેની પૂર્વ સેલિબ્રિટી મેનેજર દિશા સાલિયાનના અવસાન સાથે જોડાયેલા પ્રકરણો લાંબા સમયથી ચર્ચામાં રહ્યા છે. દિશા સાલિયાનના મૃત્યુ કેસમાં બોમ્બે હાઈકોર્ટ દ્વારા કરવામાં આવેલી તાજેતરની કાનૂની કાર્યવાહી બાદ સુશાંત સિંહ રાજપૂતની બહેન શ્વેતા સિંહ કીર્તિએ પોતાની તીવ્ર પ્રતિક્રિયા આપી છે. સોશિયલ મીડિયા પર સામે આવેલા એક ભાવુક વીડિયો સંદેશમાં શ્વેતાએ જણાવ્યું હતું કે આ કાનૂની ઘટનાક્રમે તેના પરિવાર અને સુશાંતના કરોડો ચાહકોના મનમાં ફરી એકવાર ન્યાયની નવી આશા જગાવી છે.

શ્વેતા સિંહ કીર્તિએ પોતાના વીડિયો સંદેશમાં વિશ્વાસ વ્યક્ત કરતા જણાવ્યું હતું કે, "સત્યને ગમે તેટલા સમય સુધી પડદા પાછળ રાખવાનો પ્રયાસ કરવામાં આવે, પરંતુ તેને ક્યારેય કાયમ માટે દબાવી શકાતું નથી." તાજેતરના કાનૂની ઘટનાક્રમ બાદ સોશિયલ મીડિયા પર ‘SSRians’ તરીકે ઓળખાતા સુશાંતના ચાહકોમાં ન્યાયની આશા વધુ બળવત્તર બની છે. જન્માષ્ટમીના પાવન પર્વનો ઉલ્લેખ કરતાં શ્વેતાએ ભગવાન શ્રીકૃષ્ણને પ્રાર્થના કરી હતી કે સત્ય સુધી પહોંચવાનો માર્ગ ખુલ્લો થાય અને કેસમાં પારદર્શક તપાસ થાય. તેણે પોતાના સંદેશના અંતે ‘સત્યમેવ જયતે’ અને ‘જય શ્રી કૃષ્ણ’ કહીને ન્યાય માટે આહવાન કર્યું હતું.

ઉલ્લેખનીય છે કે, સેલિબ્રિટી મેનેજર દિશા સાલિયાનનું ૮ જૂન ૨૦૨૦ ના રોજ મુંબઈના મલાડ વિસ્તારમાં એક બિલ્ડિંગ પરથી પડતાં શંકાસ્પદ સંજોગોમાં મોત નીપજ્યું હતું. તેના માત્ર છ દિવસ બાદ, ૧૪ જૂન ૨૦૨૦ ના રોજ સુશાંત સિંહ રાજપૂત બાંદ્રા સ્થિત તેના નિવાસસ્થાને મૃત હાલતમાં મળી આવ્યો હતો. બંને ઘટનાઓ ખૂબ જ ઓછા સમયગાળામાં બની હોવાથી સોશિયલ મીડિયા અને જાહેર જીવનમાં આ બંને કિસ્સાઓ વચ્ચે સંબંધ હોવાની વ્યાપક ચર્ચાઓ અને અટકળો ચાલી રહી છે. બોમ્બે હાઈકોર્ટના તાજેતરના નિર્દેશો બાદ આ કેસમાં કાનૂની કાર્યવાહી વધુ ઝડપી બની છે.