નવી દિલ્હી:ભારતીય ક્રિકેટ ટીમના ભૂતપૂર્વ કોચ અને દિગ્ગજ ક્રિકેટર સંજય બાંગરના સંતાન, જે અગાઉ આર્યન બાંગર તરીકે ઓળખાતા હતા, તેમણે હવે પોતાની નવી ઓળખ જાહેર કરી છે. તેમણે લિંગ પરિવર્તન કરાવીને પોતાનું નામ "અનાયા બાંગર" રાખ્યું છે. તાજેતરમાં અનાયાએ તેની આ લાંબી અને સંઘર્ષપૂર્ણ સફરનો સૌથી મહત્વપૂર્ણ તબક્કો એટલે કે 'જેન્ડર અફર્મેશન સર્જરી' સફળતાપૂર્વક પૂર્ણ કરી છે.

થાઈલેન્ડમાં સર્જરી અને સંઘર્ષની વાર્તા

અનાયાએ આ જટિલ સર્જરી થાઈલેન્ડની રાજધાની બેંગકોકમાં કરાવી હતી. સોશિયલ મીડિયા પર પોતાની પીડા વ્યક્ત કરતા અનાયાએ જણાવ્યું કે, શારીરિક રીતે આ પ્રક્રિયા ખૂબ જ પડકારજનક હતી. સર્જરી બાદ લાંબા સમય સુધી પથારીવશ રહીને તેમણે અસહ્ય પીડા સહન કરી હતી. જોકે, તેની મક્કમતાને કારણે તે આજે સ્વસ્થ થઈ રહી છે અને નવા જીવનમાં આગળ વધી રહી છે.

સોશિયલ મીડિયા પર ફિટનેસ અને આત્મવિશ્વાસ

રિકવરી બાદ અનાયા સોશિયલ મીડિયા પર ખૂબ જ સક્રિય જોવા મળી રહી છે. તેણે જીમમાં વર્કઆઉટ કરતી પોતાની કેટલીક તસવીરો અને વીડિયો શેર કર્યા છે. ગુલાબી રંગના ફિટિંગ કપડાં અને મિરર સેલ્ફીમાં અનાયા અત્યંત આત્મવિશ્વાસપૂર્ણ દેખાઈ રહી છે. તે ટ્રેડમિલ પર પણ કસરત કરતી જોવા મળી હતી, જે તેની શારીરિક ક્ષમતામાં થઈ રહેલા સુધારાને દર્શાવે છે.

"અમે આગળ વધી રહ્યા છીએ"

પોતાની આ સફર વિશે અનાયાએ કેપ્શનમાં લખ્યું, "બેબી સ્ટેપ્સ... પરંતુ અમે આગળ વધી રહ્યા છીએ." અનાયાની આ પ્રામાણિકતા અને હિંમતને સોશિયલ મીડિયા પર ચાહકોનો ભરપૂર પ્રેમ મળી રહ્યો છે. ઘણા યુઝર્સે કોમેન્ટમાં તેની હિંમતની પ્રશંસા કરતા લખ્યું છે કે, દરેક વ્યક્તિને પોતાની ઓળખ સાથે જીવવાનો પૂરો અધિકાર છે.

2023થી શરૂ થઈ હતી સફર

અનાયાએ ખુલાસો કર્યો કે તે અંદરથી હંમેશા છોકરી જેવું જ અનુભવતી હતી. છોકરામાંથી છોકરી બનવાની તેની આ સફર વર્ષ 2023-24માં હોર્મોન રિપ્લેસમેન્ટ થેરાપી (HRT) સાથે શરૂ થઈ હતી. સમાજ અને શરીરના પડકારો સામે લડીને આજે અનાયા તે ઓળખ જીવી રહી છે જેનું તેણે હંમેશા સપનું જોયું હતું. ક્રિકેટ જગતના એક જાણીતા પરિવારમાંથી હોવા છતાં, અનાયાનો આ નિર્ણય અને તેનું હસતું મુખ તેની સકારાત્મકતાનો પરિચય આપે છે.