મુંબઈ, તા.૧૭: ‘લોક અપ’ અને ‘બિગ બોસ’ જેવા પોપ્યુલર રિયાલિટી શોઝની સફળતા બાદ હવે વધુ એક હાઈ-વોલ્ટેજ ડ્રામાથી ભરપૂર શો ‘રાઈઝ એન્ડ ફોલ’ (Rise And Fall) ની બીજી સીઝન ધમાકેદાર વાપસી માટે તૈયાર છે. ગુરુવારે મેકર્સ દ્વારા ‘રાઈઝ એન્ડ ફોલ સીઝન ૨’ નું મનોરંજક ટ્રેલર રિલીઝ કરવામાં આવ્યું છે. આ સીઝનની સૌથી મોટી ખાસિયત એ છે કે ભારતીય ટીમના પૂર્વ વિસ્ફોટક ક્રિકેટર વીરેન્દ્ર સેહવાગ આ શોને હોસ્ટ કરતા જોવા મળશે. પ્રથમ સીઝનમાં અશ્નીર ગ્રોવરે હોસ્ટ તરીકે કમાન સંભાળી હતી.

ટ્રેલર લોન્ચ સાથે જ શોમાં ભાગ લેનારા ચાર કન્ફર્મ સેલિબ્રિટી સ્પર્ધકોના નામો પરથી પણ પરદો ઊંચકાયો છે. વિવાદાસ્પદ બોલિવૂડ એક્ટ્રેસ સ્વરા ભાસ્કર, ભાજપના પ્રવક્તા શહેઝાદ પૂનાવાલા, જાણીતા ટીવી એક્ટર કરણ પટેલ અને બિગ બોસ 16 ફેમ પ્રિયંકા ચહર ચૌધરી આ વખતે શોમાં સામસામે ટકરાશે. ટ્રેલર સામે આવ્યા બાદ ખાસ કરીને પ્રિયંકા અને કરણના ફેન્સમાં ભારે ઉત્સાહ જોવા મળી રહ્યો છે અને સોશિયલ મીડિયા પર અત્યારથી જ પ્રિયંકાની ‘મેઈન-કેરેક્ટર એનર્જી’ ચર્ચાનો વિષય બની છે.

આ રિયાલિટી શોની થીમ અત્યંત રોમાંચક છે, જેમાં સેલિબ્રિટીઓને બે જૂથમાં વહેંચવામાં આવે છે. એક જૂથને તમામ સુવિધાઓથી સજ્જ ‘લક્ઝરી એપાર્ટમેન્ટ’માં રહેવા મળે છે, જ્યારે બીજા જૂથને ‘બેઝમેન્ટ’માં રહીને ટકી રહેવા માટે ભારે સંઘર્ષ કરવો પડે છે. વિવિધ ટાસ્ક દ્વારા બેઝમેન્ટના સભ્યો ઉપર આવી શકે છે અને લક્ઝરીમાં રહેતા સભ્યો નીચે બેઝમેન્ટમાં ધકેલાઈ શકે છે. આ શો આગામી ૨૬ સપ્ટેમ્બર, ૨૦૨૬થી MX Player પર સ્ટ્રીમ થશે. ઉલ્લેખનીય છે કે આ શોની પ્રથમ સીઝનનો વિજેતા લોકપ્રિય ટીવી એક્ટર અર્જુન બિજલાની રહ્યો હતો.