મુંબઈ, તા.૨૧: બોલિવૂડના જાણીતા ફિલ્મ નિર્માતા કરણ જોહરે ભારતીય ગુપ્તચર ક્ષેત્રના પિતામહ અને 'રિસર્ચ એન્ડ એનાલિસિસ વિંગ' (R&AW) ના સ્થાપક રામેશ્વર નાથ કાઓના જીવન પર આધારિત એક ભવ્ય ફિલ્મની જાહેરાત કરીને સિનેપ્રેમીઓ અને દેશવાસીઓમાં ભારે ઉત્સુકતા જગાવી છે. આ જાહેરાત સોમવારે R&AWના ૫૮મા સ્થાપના દિવસના ખાસ પ્રસંગે કરવામાં આવી હતી. કરણ જોહરે સોશિયલ મીડિયા પર શેર કર્યું કે, આ ફિલ્મ કાઓના જીવનના અજાણ્યા પ્રસંગો અને તેમણે પડછાયામાં રહીને ભારતની બાહ્ય સુરક્ષા માટે તૈયાર કરેલા મજબૂત માળખાની વાર્તા દેશસમક્ષ રજૂ કરશે.

આર. એન. કાઓનો જન્મ ૧૦ મે, ૧૯૧૮ના રોજ વારાણસીમાં કાશ્મીરી પંડિત પરિવારમાં થયો હતો. ૧૯૪૦માં ઇન્ડિયન ઇમ્પીરીયલ પોલીસમાં જોડાયા બાદ તેઓ ગુપ્તચર ક્ષેત્રમાં પ્રવેશ્યા હતા. ૧૯૬૮માં ઇન્ટેલિજન્સ બ્યુરો (IB) ના વિભાજન બાદ જ્યારે R&AW ની રચના થઈ, ત્યારે કાઓને તેના પ્રથમ વડા બનાવવામાં આવ્યા હતા. તેમણે શરૂઆતમાં માત્ર ૨૫૦ એજન્ટો સાથે આ એજન્સીની શરૂઆત કરી હતી, જે એજન્ટો પાછળથી વૈશ્વિક સ્તરે "કાઓબોયઝ" (Kaoboys) તરીકે મશહૂર થયા હતા. ૧૯૭૧ના બાંગ્લાદેશ મુક્તિ યુદ્ધ દરમિયાન ભારતની ઐતિહાસિક જીતમાં કાઓના ગુપ્તચર નેટવર્કે અત્યંત નિર્ણાયક ભૂમિકા ભજવી હતી.

વૈશ્વિક સ્તરે 'જેન્ટલમેન સ્પાય' તરીકે મેળવી ખ્યાતિ

અત્યંત શાંત, મિલનસાર અને પબ્લિસિટીથી દૂર રહેતા આર. એન. કાઓ આંતરરાષ્ટ્રીય સ્તરે "ધ જેન્ટલમેન સ્પાય" તરીકે ઓળખાતા હતા. ૫૦ના દાયકામાં તેમણે ઘાના દેશની સરકારને પણ પોતાની ગુપ્તચર એજન્સી ઊભી કરવામાં મદદ કરી હતી. ૨૦ જાન્યુઆરી, ૨૦૦૨ના રોજ ૮૩ વર્ષની વયે તેમનું અવસાન થયું હતું. કરણ જોહરના 'ધર્મા પ્રોડક્શન્સ' હેઠળ બનનારી આ ફિલ્મમાં આર. એન. કાઓના પ્રથમ ગુપ્ત મિશનની રોમાંચક ગાથા દર્શાવવામાં આવશે, જે ભારત દેશના વીર ગુપ્તચર અધિકારીઓને એક વિશેષ શ્રદ્ધાંજલિ સમાન રહેશે.