મુંબઈ, તા.૧૧: બોલિવૂડના જાણીતા કલાકારો રણબીર કપૂર, યશ અને સાઈ પલ્લવી અભિનીત મેગા-બજેટ પૌરાણિક ફિલ્મ 'રામાયણ' એ બોક્સ ઓફિસ પર ધૂમ મચાવવાની સાથે દિગ્ગજ કલાકારોનું પણ મન મોહી લીધું છે, જેમાં પ્રખ્યાત અભિનેત્રી અને સાંસદ હેમા માલિનીએ થિયેટરમાં ફિલ્મ નિહાળ્યા બાદ પોતાના પ્રભાવશાળી વિચારો વ્યક્ત કર્યા છે.

પ્રાપ્ત વિગતો અનુસાર, નીતિશ તિવારી દ્વારા દિગ્દર્શિત અને નમિત મલ્હોત્રા દ્વારા નિર્મિત આ ભવ્ય ફિલ્મને થિયેટરમાં નિહાળ્યા બાદ ડ્રીમ ગર્લ તરીકે જાણીતી હેમા માલિનીએ પોતાના સોશિયલ મીડિયા હેન્ડલ પર ફિલ્મનું પોસ્ટર શેર કરીને એક વિસ્તૃત સમીક્ષા રજૂ કરી હતી.

અભિનેત્રીએ સ્વીકાર્યું હતું કે તેઓ સાવ ઓછી અપેક્ષાઓ સાથે ફિલ્મ જોવા માટે ગયા હતા કારણ કે રામાયણની કથાથી દેશના નાના બાળકો પણ પરિચિત હોય છે, પરંતુ થિયેટરના અદભુત વાતાવરણ અને ટેક્નોલોજીએ તેમને ચોંકાવી દીધા હતા.

ફિલ્મના વખાણ કરતા તેમણે જણાવ્યું હતું કે આ પૌરાણિક ગાથાના અદભુત સ્પેશિયલ ઇફેક્ટ્સ અને કલાકારોના અસાધારણ અભિનયે તેમના શ્વાસ થંભાવી દીધા હતા અને દ્રશ્યોની ભવ્યતા જોઈને તેઓ મંત્રમુગ્ધ થઈ ગયા હતા.

તેમણે સિનેમાઘરના માહોલ વિશે વાત કરતા ઉમેર્યું હતું કે ત્યાં ઉપસ્થિત દર્શકોનો ઉત્સાહ જોતા એવું લાગતું હતું કે સૌ કોઈ કોઈ અલગ જ યુગમાં પહોંચીને આ પવિત્ર ઘટનાઓના પ્રત્યક્ષ સાક્ષી બની ગયા હોય તેવો દિવ્ય અનુભવ કરી રહ્યા છે.

બોક્સ ઓફિસ પર સતત નવા કીર્તિમાન સ્થાપિત કરી રહેલી આ ફિલ્મે માત્ર સામાન્ય જનતા જ નહીં પરંતુ ફિલ્મ જગતના દિગ્ગજોના હૃદયમાં પણ એક વિશેષ સ્થાન બનાવી લીધું છે, જે ભારતીય સિનેમા માટે ગર્વની બાબત છે.