મુંબઈ, તા.૧૬: સિનેમાજગતમાં ક્યારેક એવા ચમત્કારો સર્જાતા હોય છે જે તમામ ગણિતો અને અંદાજોને ઊંધા પાડી દે છે. શરૂઆતમાં નબળા ઓપનિંગના કારણે જે ફિલ્મને લોકો ફ્લોપ માની રહ્યા હતા, તે જ ફિલ્મ 'હનુમાનઅંશ' (HanumanAnsh) આજે માઉથ-ટુ-માઉથ પબ્લિસિટીના જોરે બોક્સ ઓફિસ પર ઈતિહાસ રચી ચૂકી છે. અદ્ભુત પ્રતિસાદ મેળવીને આ ફિલ્મે વર્લ્ડવાઈડ ₹300 કરોડની ભવ્ય ક્લબમાં સત્તાવાર એન્ટ્રી કરી લીધી છે.

માત્ર ₹2 કરોડના બજેટ સામે ₹300 કરોડની કમાણી

વિશાલ ચતુર્વેદીના લેખન અને નિર્દેશનમાં બનેલી આ ફિલ્મે ભારતમાં ₹272 કરોડનું ગ્રોસ કલેક્શન કર્યું છે, જ્યારે આંતરરાષ્ટ્રીય માર્કેટ મિલાવીને ગ્લોબલ ગ્રોસ કલેક્શન ₹291 કરોડને પાર થઈને ₹300 કરોડના આંકડાને આંબી ગયું છે. ફિલ્મમાં ચંદન આનંદ અને શોભિનવ સત્યાએ મુખ્ય ભૂમિકા ભજવી છે. સાધારણ સ્ક્રીન્સથી શરૂ થયેલી આ ફિલ્મે યુવાનોથી લઈને વૃદ્ધો સુધીના તમામ વર્ગના દર્શકોના દિલ જીતી લીધા છે.

ત્રણ મહિલા પ્રોડ્યુસર્સનું સાહસ અને બાબા નીમ કરોલીની ભક્તિ

આ ફિલ્મની સફળતા પાછળ ત્રણ મહિલા પ્રોડ્યુસર્સનો સંઘર્ષ અને સમર્પણ છુપાયેલું છે. મૂળ મુંબઈની અને બ્રિટનમાં અભ્યાસ કરનારી નિર્માતા અનુપ્રિયા નાગરે પોતાના ખિસ્સામાંથી અને યુકેની કમાણીનો મોટો હિસ્સો રોકીને આ ફિલ્મ બનાવી હતી. ફિલ્મના સુપરહિત થયા બાદ અનુપ્રિયાએ ઉત્તરાખંડ સ્થિત પવિત્ર કૈંચીધામ પહોંચીને નીમ કરોલી બાબાના આશ્રમે શિશ નમાવ્યું હતું. તેમણે ઈન્સ્ટાગ્રામ પર તસવીર શેર કરીને લખ્યું હતું કે, "મેં તમારા જ ભરોસે સાગરમાં નૈયા તારી દીધી, જય હનુમાન, જય મહારાજજી."

હવે સિક્વલ (બીજા ભાગ) ની તૈયારીઓ શરૂ

મેકર્સના જણાવ્યા મુજબ, આ વાર્તા ૩ ભાગની ફ્રેન્ચાઈઝી તરીકે પ્લાન કરવામાં આવી હતી. પ્રથમ ભાગને મળેલી આ અભૂતપૂર્વ અને મેજિકલ સફળતા બાદ હવે નિર્માતાઓ અને નિર્દેશક ટૂંક સમયમાં જ 'હનુમાનઅંશ' નો બીજો ભાગ (Part-2) ફ્લોર પર લાવવાની તૈયારી કરી રહ્યા છે.