મુંબઈ : બોલિવૂડના મહાનાયક અમિતાભ બચ્ચને દિવાળીના પાવન અવસરે પોતાની વર્ષો જૂની પરંપરાને જાળવી રાખતા મુંબઈ સ્થિત પોતાના પ્રખ્યાત બંગલા જલસા બહાર એકત્રિત થયેલા પ્રશંસકોને ખુશ કરી દીધા. દર રવિવારે પોતાના ચાહકોને મળવાની પરંપરા ધરાવતા અભિનેતા આ વખતે દિવાળીના ખાસ દિવસે પણ અચૂક બહાર આવ્યા અને હાજર જનમેદનીનું અભિવાદન સ્વીકાર્યું. આ દરમિયાન તેમના પુત્ર અને અભિનેતા અભિષેક બચ્ચન પણ તેમની પાછળ હાજર રહીને પિતાની સંભાળ રાખતા નજરે પડ્યા.

આ મુલાકાતનું સૌથી મોટું આકર્ષણ એ રહ્યું કે અમિતાભ બચ્ચને તે પારદર્શક બુલેટપ્રૂફ કાચના આવરણનો ઉપયોગ કર્યો ન હતો, જે તાજેતરમાં બોમ્બની ધમકી મળ્યા બાદ વધારાની સુરક્ષા વ્યવસ્થાના ભાગરૂપે લગાવવામાં આવ્યો હતો. સુરક્ષાના આ મોટા કવચ વગર સીધા જ પ્રશંસકોની વચ્ચે આવેલા મહાનાયકે સ્મિત સાથે હાથ જોડીને અને હાથ હલાવીને તમામનો આભાર વ્યક્ત કર્યો હતો.

એકત્રિત થયેલી ભીડને સંબોધિત કરતા અભિનેતાએ માઇક્રોફોનનો ઉપયોગ કર્યો અને જણાવ્યું કે તે આપ સૌ લોકોને પ્રણામ કરે છે અને દિવાળીની શુભકામનાઓ મોકલે છે. તેમણે પ્રાર્થના કરી કે આપ સૌના જીવનમાં સુખ, શાંતિ અને સમૃદ્ધિ જળવાઈ રહે અને આપ સૌ લોકોનો ખૂબ ખૂબ આભાર. તેમની આ સરળતાએ ત્યાં હાજર દરેક વ્યક્તિનું મન જીતી લીધું હતું.

આ દરમિયાન અભિનેતાએ પોતાના સ્વાસ્થ્ય અને દૈનિક કાર્ય વિશે પણ વાત કરી. પોતાના ટમ્બ્લર બ્લોગ પર એક દિવાળી સંદેશ શેર કરતા તેમણે જણાવ્યું કે હાથમાં અસ્વસ્થતાના કારણે તેમને પ્રશંસકોને વ્યક્તિગત રૂપે પત્ર લખવામાં થોડો વિલંબ થયો છે. અગાઉ ડોક્ટરોએ તેમને પૂરતો આરામ કરવાની સલાહ પણ આપી હતી.

ઉલ્લેખનીય છે કે તાજેતરમાં જ અમિતાભના બંગલા, બોમ્બે હાઈકોર્ટ અને મહાલક્ષ્મી રેસકોર્સને ઉડાવી દેવાની એક ધમકીભરી ઈમેઈલ મળી હતી, જેની તપાસ બાદ સુરક્ષા એજન્સીઓએ તેને અફવા ગણાવી હતી. આ ઉપરાંત, સ્વાસ્થ્ય સારું ન હોવાના કારણે લોકપ્રિય ગેમ શો કોન બનેગા કરોડપતિ ૧૮ નું શૂટિંગ પણ અસ્થાયી રૂપે અટકાવી દેવામાં આવ્યું છે, જેથી ચેનલ દ્વારા જૂના એપિસોડ પ્રસારિત કરવામાં આવી રહ્યા છે.