મુંબઈ: મહારાષ્ટ્રના અન્ન અને ઔષધ પ્રશાસન (ફૂડ સેફ્ટી ડિપાર્ટમેન્ટ) ના કમિશનર તરીકે ચાર્જ સંભાળ્યા બાદથી તુકારામ મુંઢે તેમના કડક વલણ અને કાયદાના અમલીકરણ માટે સતત ચર્ચામાં રહ્યા છે. ખાદ્ય પદાર્થોમાં ભેળસેળ અને નિયમોનો ભંગ કરતી સંસ્થાઓ સામે આકરાં પગલાં ભરી રહેલા તુકારામ મુંઢેની લોકપ્રિયતામાં હવે બોલિવૂડના દિગ્ગજ અભિનેતા મનોજ બાજપાયી પણ જોડાયા છે. સમાચાર એજન્સી ANI સાથેની ખાસ વાતચીતમાં મનોજ બાજપાયીએ મુંઢે દ્વારા કરવામાં આવતી સરકારી ફરજો અને તેમની કાર્યશૈલીના વખાણ કર્યા હતા.

સમાજ અને સામાન્ય લોકોની માનસિકતા અંગે વાત કરતા મનોજ બાજપાયીએ જણાવ્યું હતું કે, આપણે એવા સમયમાં જીવી રહ્યા છીએ જ્યાં જો કોઈ વ્યક્તિ પોતાની ફરજ સંપૂર્ણ 'ઈમાનદારી' અને 'સમર્પણ' થી બજાવે છે, તો લોકો આશ્ચર્યચકિત થઈ જાય છે. તેમણે ઉમેર્યું હતું કે, "કોઈ પોલીસ અધિકારી હોય કે પછી તુકારામ મુંઢે જેવા અધિકારી હોય, તેમને એક ચોક્કસ જવાબદારી સોંપવામાં આવે છે. જ્યારે તેઓ પૂરી નિષ્ઠાથી કામ કરે છે, ત્યારે તેઓ સોશિયલ મીડિયા પર વાયરલ થવા લાગે છે અને લોકો તેમનાથી અચરજ પામે છે. આ બાબત દર્શાવે છે કે જ્યારે કોઈ વ્યક્તિ માત્ર પોતાની ફરજ યોગ્ય રીતે બજાવે ત્યારે તે સેલિબ્રિટી બની જાય છે, જે એ વાતનો પુરાવો છે કે આપણો સમાજ કયા સ્તરે પહોંચી ગયો છે."

આ ઉપરાંત વાતચીત દરમિયાન મનોજ બાજપાયીએ તેમની આગામી ફિલ્મ 'લાસ્ટ મેન ઇન ટાવર' અંગે માહિતી આપી હતી. બેન રેખીના નિર્દેશનમાં અને રાણા દગ્ગુબાટીના સ્પિરિટ મીડિયા હેઠળ બનેલી આ ફિલ્મ અરવિંદ અડિગાની પ્રખ્યાત નવલકથા પર આધારિત છે. ફિલ્મમાં મનોજ બાજપાયી ઉપરાંત દિવ્યા દત્તા અને બોમન ઈરાની મુખ્ય ભૂમિકામાં છે. ફિલ્મની વાર્તા 'માસ્તરજી' નામના એક નિવૃત્ત શિક્ષકની આસપાસ ફરે છે, જેમના નિર્ણયોથી સોસાયટીના રહીશો વચ્ચે સંઘર્ષ ઊભો થાય છે. આ બહુચર્ચિત ફિલ્મ ૧૧ સપ્ટેમ્બરના રોજ દેશભરના સિનેમાઘરોમાં રિલીઝ થવા જઈ રહી છે.