મુંબઈ: ટેલિવિઝન જગતની જાણીતી અભિનેત્રી સારા ખાને ઈદ-ઉલ-અધાના પવિત્ર અવસરે એક વિચારપ્રેરક સંદેશ આપીને સોશિયલ મીડિયા પર ચર્ચા જગાવી છે. બકરી ઈદના દિવસે પરંપરાગત રીતે પશુ બલિદાન આપવામાં આવે છે, ત્યારે સારા ખાને આ તહેવારના આધ્યાત્મિક પાસા પર પ્રકાશ પાડતા પશુ બલિદાન વિરુદ્ધ પોતાની વાત રજૂ કરી છે. તેમણે ભારપૂર્વક જણાવ્યું કે આ તહેવાર માત્ર ધાર્મિક વિધિઓ કે ભોજનનો ઉત્સવ નથી, પરંતુ તે શ્રદ્ધા, કરુણા અને આત્મસમર્પણનો એક ગહન સંદેશ છે.
"ઈદ એટલે હૃદયની શુદ્ધતા"
પોતાના સોશિયલ મીડિયા વીડિયોમાં સારા ખાને પયગંબર ઇબ્રાહિમ (અ.સ.) ની વાર્તાનો ઉલ્લેખ કરતા કહ્યું, "ઈદ-ઉલ-અધા એ આપણને અલ્લાહમાં સંપૂર્ણ વિશ્વાસ, ઇરાદાની પ્રામાણિકતા અને આપણે જે સૌથી વધુ પ્રેમ કરીએ છીએ તેને પરમાત્મા માટે ત્યાગ કરવાની હિંમત શીખવે છે. અલ્લાહને માંસ કે લોહીની જરૂર નથી, તે માત્ર આપણી કરુણા, આપણી ભક્તિ અને આપણી આજ્ઞાપાલન જુએ છે." સારાએ લોકોને અપીલ કરી છે કે આ તહેવાર પર માત્ર બલિદાન પર ધ્યાન કેન્દ્રિત કરવાને બદલે, જરૂરિયાતમંદોની મદદ કરવી, ભૂખ્યાને ભોજન આપવું અને ઉદાર બનવું તે જ કુરબાનીનો સાચો અર્થ છે.
દયા અને સહાનુભૂતિથી ઉજવણીનો આગ્રહ
સારા ખાને પોતાના સંદેશના અંતમાં ખૂબ જ સુંદર વાત કહી છે, "આ ઈદ પર આપણું સૌથી મોટું બલિદાન આપણા 'અહંકાર'નું હોવું જોઈએ અને આપણું ઈનામ એક 'સ્વચ્છ હૃદય' હોવું જોઈએ." તેમણે ચાહકોને ભૂલ્યા વગર દયા અને કૃતજ્ઞતા સાથે આ તહેવારની ઉજવણી કરવા વિનંતી કરી છે. લાચારોનું રક્ષણ કરવું અને નરમ સ્વભાવના માણસો બનવું એ જ સાચી ઈબાદત છે, તેવો ભાવ તેમણે વ્યક્ત કર્યો છે.
અગાઉ પણ ચર્ચામાં રહી છે સારા ખાન
અભિનેત્રી સારા ખાન પોતાની પ્રોફેશનલ લાઈફની સાથે વ્યક્તિગત જીવનના કારણે પણ અવારનવાર હેડલાઇન્સમાં રહે છે. વર્ષ 2025માં તેમણે અભિનેતા ક્રિશ પાઠક સાથે કોર્ટ મેરેજ કર્યા હતા, જેની તસવીરો શેર કર્યા બાદ સોશિયલ મીડિયા પર તેમને મિશ્ર પ્રતિક્રિયાઓ મળી હતી. તે સમયે પણ કેટલાકે તેમના લગ્નને લઈને ટીકા કરી હતી, પરંતુ સારાએ કોઈપણ વિવાદ કે ટ્રોલિંગનો જવાબ આપવાનું ટાળ્યું હતું. 'સપના બાબુલ કા... બિદાઈ' અને 'બિગ બોસ 4' જેવા લોકપ્રિય શોથી ઓળખ મેળવનાર સારા ખાન આજે પોતાની સમજણ અને પ્રગતિશીલ વિચારો માટે તેમના ચાહકોમાં એક અલગ છબી ધરાવે છે.