મુંબઈ : ટેલિવિઝન જગતની લોકપ્રિય અભિનેત્રી દિવ્યાંકા ત્રિપાઠીના જીવનમાં એક મોટી દુર્ઘટના ટળી છે પરંતુ તે સાથે જ એક ભારે શોક પણ છવાઈ ગયો છે. દિવાળીના તહેવારની બરાબર એક રાત્રિ પહેલા મુંબઈ સ્થિત તેમની રહેણાંક ઇમારતમાં ભીષણ આગ લાગી હતી. આ ભયાનક અકસ્માતમાં દિવ્યાંકા ત્રિપાઠી, તેમના પતિ વિવેક દહિયા, બાળકો, પરિવારના અન્ય સભ્યો અને સ્ટાફ સમયસર સુરક્ષિત રીતે બહાર નીકળવામાં સફળ રહ્યા હતા, પરંતુ આ આગની દુર્ઘટનામાં તેમની બિલ્ડિંગના સિનિયર સુરક્ષા રક્ષક ધનપતનું કરુણ મૃત્યુ થયું છે.

ઘટના અંગે વિગતવાર વાત કરતા દિવ્યાંકા ત્રિપાઠીએ જણાવ્યું કે તે સાંજે તેમણે અને વિવેક દહિયાએ બહાર જવાનું આયોજન કર્યું હતું, પરંતુ કોઈને કોઈ કારણસર ઘરની બહાર નીકળવાનું ટળતું રહ્યું. કુદરતનો ખેલ એવો હતો કે તેઓ ઘરે જ હાજર હોવાને કારણે સમયસર ખતરાની જાણ થઈ ગઈ અને તેઓ પોતાના બાળકો, પરિવાર તેમજ સ્ટાફને લઈને હેમખેમ બહાર આવી શક્યા. જો તેઓ ઘરની બહાર હોત તો પરિસ્થિતિ વધુ ગંભીર બની શકી હોત.

સોશિયલ મીડિયા પર આ દુઃખદ ઘટનાને યાદ કરતા દિવ્યાંકા ત્રિપાઠીએ એક ખૂબ જ લાગણીસભર નોટ લખી છે. તેમણે લખ્યું કે કેટલાક નુકસાન પાછળ એક એવો સન્નાટો છોડી જાય છે જે ક્યારેય સંપૂર્ણપણે ઓછો થતો નથી. અભિનેત્રીએ યાદ કર્યું કે જ્યારે તેઓ તેમના જુડવા બાળકોને ઘરે લઈને આવ્યા હતા, ત્યારે સૌથી પહેલા આવકારીને આશીર્વાદ આપનારાઓમાં ધનપત પણ સામેલ હતા. તેમણે અને વિવેકે એવું વિચાર્યું હતું કે આવનારા વર્ષોમાં ધનપત તેમના બાળકોને મોટા થતા જોશે અને તેમની સાથે સમય વિતાવશે.

વિવેક દહિયા અને દિવ્યાંકા માટે આ સમાચાર સ્વીકારવા અત્યંત મુશ્કેલ હતા તેમ જણાવતા અભિનેત્રીએ ઉમેર્યું કે જ્યારે તેઓ એક મિત્રના ઘરે રોકાયા હતા, ત્યારે પણ તેઓ માત્ર એ જ પ્રાર્થના કરી રહ્યા હતા કે કાશ આ ભયાનક સત્ય ન હોય. આ દિવાળીએ આગે તેમના ઘરની રોનક તો ફિક્કી કરી જ દીધી હતી, પરંતુ એક કિંમતી જીવ ચાલ્યો જવાથી તેમના હૃદયમાં એવો અંધકાર છવાઈ ગયો છે જેને કોઈ દીવા કે રોશની દૂર કરી શકતી નથી.

પોતાના રક્ષક અને વફાદાર મિત્રને શ્રદ્ધાંજલિ આપતા દિવ્યાંકા ત્રિપાઠીએ લખ્યું કે ધનપત અંકલ તમે ક્યારેય માત્ર અમારી બિલ્ડિંગના ગાર્ડ નહોતા, પરંતુ તમે અમારી દૈનિકિ જીવનચર્યાનો એક અનોખો હિસ્સો હતા. તમે એક એવા વ્યક્તિ હતા જેના પર અમે આંખો બંધ કરીને ભરોસો કરતા હતા. અંતમાં તેમણે કહ્યું કે જ્યારે તેમના બાળકો મોટા થશે ત્યારે તેઓ અને વિવેક બાળકોને તે મહાન અને ભલા ઇન્સાન વિશે જરૂર જણાવશે જેમણે પોતાના આશીર્વાદ આપીને તેમના ઘરમાં તેમનું સ્વાગત કર્યું હતું.