મુંબઈ : બોલિવૂડ અભિનેતા ઈમરાન હાશ્મીની બહુપ્રતિક્ષિત ફિલ્મ **‘આવારાપન 2’**એ રિલિઝ થતાની સાથે બોક્સ ઓફિસ પર ધમાકેદાર શરૂઆત કરી છે. વર્ષ 2007ની કલ્ટ ફિલ્મ ‘આવારાપન’ની સિક્વલમાં 19 વર્ષ બાદ ઈમરાન હાશ્મીને ‘શિવમ પંડિત’ના લોકપ્રિય પાત્રમાં જોવા માટે ચાહકોમાં ભારે ઉત્સાહ જોવા મળી રહ્યો છે. ફિલ્મ 14 ઓગસ્ટે સિનેમાઘરોમાં રિલિઝ થઈ હતી.

સ્વતંત્રતા દિવસના વીકેન્ડનો લાભ પણ ફિલ્મને મળી રહ્યો છે. પહેલા દિવસે જ ફિલ્મે ઈમરાન હાશ્મીની કારકિર્દીની સૌથી મોટી ઓપનિંગ નોંધાવી હતી. અહેવાલ મુજબ ફિલ્મનું પ્રથમ દિવસનું વર્લ્ડવાઈડ કલેક્શન આશરે રૂ. 27 કરોડ રહ્યું હતું.

બીજા દિવસે પણ ફિલ્મની કમાણીમાં જબરદસ્ત ઉછાળો જોવા મળ્યો છે. ભારતમાં માત્ર બે દિવસમાં ફિલ્મ રૂ. 50 કરોડનો આંકડો પાર કરી ચૂકી હોવાનું અહેવાલોમાં જણાવાયું છે. આ સાથે ‘આવારાપન 2’ ઈમરાન હાશ્મીની અગાઉની અનેક સફળ ફિલ્મોના બોક્સ ઓફિસ આંકડાઓને પાછળ છોડતી જોવા મળી રહી છે.

‘આવારાપન’ના શિવમ પંડિતનું પાત્ર ઈમરાન હાશ્મીની કારકિર્દીના સૌથી યાદગાર પાત્રોમાં ગણાય છે. લાંબા સમય બાદ એ જ પાત્ર સાથે મોટા પડદા પર થયેલી વાપસીને કારણે ફિલ્મ માટે પહેલેથી જ ભારે ઉત્સુકતા હતી. ફિલ્મ રિલિઝ થયા બાદ ઈમરાનના અભિનય અને સંગીતને લઈને સોશિયલ મીડિયા પર પણ ચર્ચા જોવા મળી રહી છે.

બે દિવસની જોરદાર શરૂઆત બાદ હવે રવિવારના કલેક્શન પર ટ્રેડ વર્તુળોની નજર મંડાઈ છે. વીકેન્ડના અંતે ‘આવારાપન 2’ની કમાણી ક્યાં સુધી પહોંચે છે તેના પર ફિલ્મના આગામી બોક્સ ઓફિસ સફરનો મોટો આધાર રહેશે.