મુંબઈ, તા.૦૧: અભિનેતા અજય દેવગનની અત્યંત લોકપ્રિય અને સુપરહિત ફ્રેન્ચાઇઝી 'દ્રશ્યમ'નો અંતિમ ભાગ 'દ્રશ્યમ ૩: ધ કન્ક્લુઝન' આગામી ૨ ઓક્ટોબરના રોજ સિનેમાઘરોમાં રિલીઝ થવા જઈ રહ્યો છે, પરંતુ રિલીઝના થોડા કલાકો પહેલા જ આ ફિલ્મે બોક્સ ઓફિસ પર એડવાન્સ બુકિંગમાં તોફાની કમાણી કરીને નવો રેકોર્ડ સર્જ્યો છે. દર્શકોમાં સસ્પેન્સ અને થ્રિલરથી ભરપૂર આ કહાનીનો અંત જોવા માટે ભારે ઉત્સાહ જોવા મળી રહ્યો છે. સિનેમાઘરોમાં રિલીઝ થતા પહેલા જ ફિલ્મે દેશભરમાંથી લાખો ટિકિટોનું વેચાણ કરીને કરોડો રૂપિયાનું બુકિંગ મેળવી લીધું છે.

ટ્રેડ વિશ્લેષકોના આંકડા અનુસાર, ગુરુવાર સવાર સુધીમાં આ ફિલ્મે પ્રથમ દિવસ માટે બ્લોક સીટો સાથે રૂ. ૧૯.૭૧ કરોડ અને બ્લોક સીટો વગર રૂ. ૧૬.૫૮ કરોડનું અદ્ભુત કલેક્શન કરી લીધું છે. દેશભરની ૧૨,૦૦૦થી વધુ સ્ક્રીન્સ અને શૉ માટે અત્યાર સુધીમાં ૫.૩૫ લાખથી વધુ ટિકિટો વેચાઈ ચૂકી છે. આ ક્રેઝ માત્ર પહેલા દિવસ પૂરતો સીમિત નથી, પરંતુ ૨ થી ૬ ઓક્ટોબર સુધીના ૫ દિવસીય લોંગ વીકેન્ડ માટે જબરદસ્ત પ્રતિસાદ સાંપડ્યો છે.

પ્રાપ્ત વિગતો મુજબ, પ્રીમિયર શૉ સહિત આગામી ૫ દિવસમાં કૂલ ૧૧.૦૪ લાખથી વધુ ટિકિટોનું એડવાન્સ બુકિંગ થઈ ગયું છે, જેના દ્વારા ફિલ્મે અત્યાર સુધીમાં રૂ. ૩૭.૩૮ કરોડનું ગ્રોસ એડવાન્સ બુકિંગ મેળવ્યું છે. ફિલ્મના નિર્માતાઓ અને એનાલિસ્ટ્સનો અંદાજ છે કે આ ફિલ્મ ભારતીય બોક્સ ઓફિસ પર પહેલા જ દિવસે રૂ. ૪૦ કરોડથી વધુનું નેટ કલેક્શન આસાનીથી કરી લેશે.

જો રિલીઝના દિવસે સિનેમાઘરોની બારી પર સ્પોટ બુકિંગનો સહકારો મજબૂત રહેશે, તો આ ફિલ્મ પ્રથમ દિવસે રૂ. ૫૦ કરોડના આંકડાને સ્પર્શીને નવો ઇતિહાસ રચી શકે છે. ટ્રેડ નિષ્ણાતોના જણાવ્યા અનુસાર, જો પ્રથમ દિવસનો માઉથ પબ્લિસિટી રિવ્યુ સકારાત્મક રહ્યો, તો આ ફિલ્મ વીકેન્ડમાં અત્યાર સુધીના તમામ રેકોર્ડ તોડી શકે છે.

અભિષેક પાઠક દ્વારા નિર્દેશિત આ ફિલ્મ 'દ્રશ્યમ' ફ્રેન્ચાઇઝીનો આખરી અને નિર્ણાયક ભાગ ગણાઈ રહ્યો છે. ફિલ્મમાં મુખ્ય ભૂમિકામાં અજય દેવગન (વિજય સાલગાવંકર), તબુ, શ્રિયા સરન, ઇશિતા દત્તા અને રજત કપૂર સાથે આ વખતે પ્રકાશ રાજ અને જયદીપ અહલાવત સરપ્રાઇઝ એલિમેન્ટ તરીકે જોડાઈને સસ્પેન્સને બેગણું બનાવશે.

અગાઉ ૨૦૧૫માં આવેલી 'દ્રશ્યમ' અને ૨૦૨૨માં રિલીઝ થયેલી 'દ્રશ્યમ ૨' બંને બોક્સ ઓફિસ પર બ્લોકબસ્ટર સાબિત થઈ હતી, તેથી આ ત્રીજા ભાગ માટે દર્શકોની અપેક્ષાઓ ખૂબ જ ઊંચી છે. હવે આ ફિલ્મ આવતીકાલે મોટા પડદા પર દસ્તક આપ્યા બાદ પ્રેક્ષકોના દિલ જીતવામાં કેટલી સફળ રહે છે અને બોક્સ ઓફિસ પર કમાણીના નવા કયા શિખરો સર કરે છે તેના પર સૌની નજર ટકેલી છે.