મુંબઈ: બોલિવૂડના દિગ્ગજ અભિનેતા અને ડાન્સર ગોવિંદા હાલના દિવસોમાં પોતાની ફિલ્મો કરતાં વધુ અંગત જીવન અને પત્ની સુનિતા આહૂજા સાથે ચાલી રહેલા પારિવારિક તણાવને કારણે ચર્ચામાં છે. સુનિતા આહૂજા દ્વારા જાહેર મંચો પર સતત આપવામાં આવી રહેલા નિવેદનો અને આરોપો વચ્ચે આખરે ગોવિંદાએ પોતાનું મૌન તોડ્યું છે. મુંબઈમાં યોજાયેલા એક કાર્યક્રમ દરમિયાન અભિનેતાએ આ તમામ વિવાદો પર મુક્તપણે વાત કરી હતી અને જીવનમાં આગળ વધવાની સાથે પોતાની ફિલ્મોથી ધમાકેદાર પુનરાગમન કરવાના પણ સ્પષ્ટ સંકેતો આપ્યા છે.

મુંબઈ ખાતે આયોજિત એક ભવ્ય સાંસ્કૃતિક કાર્યક્રમમાં લોકોને સંબોધિત કરતા ગોવિંદાએ સમાજમાં એકતા અને શિસ્ત જાળવી રાખવાનો સંદેશ આપ્યો હતો. તેમણે જણાવ્યું હતું કે આપણે સૌએ એકબીજાનું ધ્યાન રાખવું પડશે અને દેશની સંસ્કૃતિ તથા પરંપરાઓને આગળ વધારવી પડશે.

પોતાની પત્ની સુનિતા આહૂજાના નિવેદનો અને તાજેતરના મીડિયા વિવાદો અંગે અપ્રત્યક્ષ રીતે વાત કરતા ગોવિંદા ભાવુક નજરે પડ્યા હતા. તેમણે જણાવ્યું હતું કે, આકાશમાં ઘણી વાતો લખાઈ ચૂકી છે અને તેઓ પોતાની માઈ એટલે કે દેવી મા પાસે પ્રાર્થના કરે છે કે બધું સાફ થઈ જાય અને ગોવિંદા એ સફાઈને વધુ સારી રીતે કરી શકે. આ દરમિયાન તેમણે પોતાના ચાહકો પાસે અગાઉની જેમ જ પ્રેમ અને સહયોગની અપીલ કરી હતી.

અંગત જીવનમાં ચાલી રહેલી આ અણબનાવ વચ્ચે ગોવિંદા પોતાના કામ પર ધ્યાન કેન્દ્રિત કરી રહ્યા છે. તેમણે ચાહકોને મોટી ખુશખબરી આપતાં જણાવ્યું હતું કે તેઓ ટૂંક સમયમાં જ સિલ્વર સ્ક્રીન પર પરત ફરી રહ્યા છે. પડદા પાછળ હાલમાં કુલ આઠ મોટા પ્રોજેક્ટ્સ પર ઝડપથી કામ ચાલી રહ્યું છે. ગોવિંદાએ પોતાની આગામી ફિલ્મ 'દુનિયાદારી' સાથે અન્ય બે નવી ફિલ્મો પણ ટૂંક સમયમાં જ દર્શકો સમક્ષ લાવવાની જાહેરાત કરી હતી. કાર્યક્રમ દરમિયાન ગોવિંદાએ દહી હાંડી ઉત્સવમાં ડાન્સ પણ કર્યો હતો, જેનો વિડીયો સોશિયલ મીડિયા પર વાયરલ થઈ રહ્યો છે.