મુંબઈ:બોલિવૂડના મહાનાયક અમિતાભ બચ્ચનનું નામ આજે સફળતાના પર્યાય સમાન છે. તેમના અંગત જીવન વિશે, ખાસ કરીને જયા બચ્ચન સાથેના લગ્ન અને રેખા સાથેના અફેરની વાતો તો જગજાહેર છે. પરંતુ, શું તમે જાણો છો કે સ્ટારડમની ચમક-ધમક અને ફિલ્મી દુનિયાના ઝળકાટ પહેલાં, અમિતાભના જીવનમાં એક એવી વ્યક્તિ હતી જે તેમની સફળતાની સાક્ષી બનવાની હતી? આ વ્યક્તિ એટલે 'માયા', જે અમિતાભની પહેલી ગર્લફ્રેન્ડ હતી.

સંઘર્ષના દિવસો અને માયાનો સાથ

અમિતાભ બચ્ચન જ્યારે મુંબઈમાં પોતાના કરિયર માટે સંઘર્ષ કરી રહ્યા હતા, ત્યારે તેઓ બ્રિટિશ એરવેઝની કર્મચારી માયાના પ્રેમમાં હતા. આ એક એવો સમય હતો જ્યારે બિગ બી હજુ હિન્દી ફિલ્મ ઉદ્યોગમાં પ્રવેશવા માટે ઝઝૂમી રહ્યા હતા. લેખક હનીફ ઝવેરીએ તેમના પુસ્તક 'AB: The Legend' માં આ લવ સ્ટોરીનો ખુલાસો કર્યો છે. તે સમયે અમિતાભ જુહુમાં પોતાની માતા તેજી બચ્ચનના મિત્રના બંગલે રહેતા હતા. પરંતુ માયા વારંવાર તેમને મળવા આવતી હોવાથી, બિગ બીને ડર હતો કે ક્યાંક માતાને આ પ્રેમસંબંધ વિશે જાણ ન થઈ જાય, એટલે તેમણે તે બંગલો પણ છોડી દીધો હતો.

બચ્ચન પરિવારની પણ હતી મંજૂરી

સૌથી ચોંકાવનારી વાત એ છે કે અમિતાભના પિતા અને પ્રખ્યાત કવિ હરિવંશ રાય બચ્ચન પણ માયાને ખૂબ પસંદ કરતા હતા. બચ્ચન પરિવારને આ સંબંધ સ્વીકાર્ય હતો અને તેમને પૂરો વિશ્વાસ હતો કે માયા જ અમિતાભની પત્ની બનશે અને ઘરની વહુ તરીકે આવશે.

સફળતાની સાથે બદલાઈ ગયા રસ્તાઓ

જેમ જેમ 1970 ના દાયકાની શરૂઆતમાં અમિતાભની કારકિર્દી આસમાને પહોંચી, તેમ તેમ પરિસ્થિતિઓ બદલાતી ગઈ. બદલાતી પ્રાથમિકતાઓ અને જીવનના અલગ થતા રસ્તાઓને કારણે આ સંબંધ કાયમ માટે તૂટી ગયો. માયા આ બ્રેકઅપથી ખૂબ દુઃખી હતી, પરંતુ તેણે લાઈમલાઈટથી હંમેશા દૂર રહેવાનું અને પોતાની અંગત જિંદગી ગુપ્ત રાખવાનું પસંદ કર્યું. માયા સાથેના વિચ્છેદ બાદ અમિતાભ બચ્ચન ફિલ્મોના શૂટિંગ દરમિયાન જયા ભાદુરીની નજીક આવ્યા અને 1973 માં આ જોડીએ લગ્નગ્રંથિથી જોડાઈને એક નવા પ્રકરણની શરૂઆત કરી.

આજે ભલે અમિતાભ અને જયા બચ્ચન બોલિવૂડના સૌથી આદર્શ દંપતી તરીકે ઓળખાય છે, પરંતુ માયા સાથેની આ પ્રેમકથા બિગ બીના જીવનના એ અજાણ્યા પાના જેવી છે, જે તેમના સંઘર્ષના દિવસોની યાદ અપાવે છે.