મુંબઈ: દક્ષિણ ભારત અને બોલિવૂડના કલાકારોના સંગમ સાથે બનેલી પેન-ઇન્ડિયા ફિલ્મ 'ડકૈત: અ લવ સ્ટોરી' ને લઈને સિનેપ્રેમીઓ માટે મોટા સમાચાર આવ્યા છે. 10 એપ્રિલ 2026 ના રોજ થિયેટરોમાં રિલીઝ થયેલી આ ફિલ્મ હવે ખૂબ જ ટૂંકા સમયમાં એટલે કે માત્ર 28 દિવસના અંતરાલમાં OTT પ્લેટફોર્મ પર જોવા મળશે. બોક્સ ઓફિસ પર મિશ્ર પ્રતિસાદ મેળવ્યા બાદ હવે નિર્માતાઓએ તેને ડિજિટલ દર્શકો સુધી પહોંચાડવાની તૈયારી કરી લીધી છે.

  શૈનલ દેવના નિર્દેશનમાં બનેલી 'ડકૈત' ની વાર્તા માત્ર એક્શન પૂરતી મર્યાદિત નથી, પરંતુ તેમાં પ્રેમ, વિશ્વાસઘાત અને બદલાની ગૂંથણી કરવામાં આવી છે. અદિવી શેષ અને મૃણાલ ઠાકુરની જોડીએ પડદા પર શાનદાર કેમિસ્ટ્રી જમાવી છે. ફિલ્મની વાર્તા અને સ્ક્રીનપ્લે ખુદ અદિવી શેષ દ્વારા લખવામાં આવ્યા છે, જે તેમની અગાઉની હિટ ફિલ્મોની જેમ જ સસ્પેન્સ અને ડ્રામાથી ભરપૂર છે.
 તાજા અહેવાલો મુજબ, 'ડકૈત' તેલુગુ, હિન્દી, તમિલ, કન્નડ અને મલયાલમ એમ પાંચ ભાષાઓમાં OTT પર રિલીઝ કરવામાં આવશે. સામાન્ય રીતે ફિલ્મો રિલીઝના 6 થી 8 અઠવાડિયા પછી OTT પર આવતી હોય છે, પરંતુ આ ફિલ્મ માત્ર 4 અઠવાડિયામાં જ ડિજિટલ માધ્યમ પર આવી રહી હોવાથી ચાહકોમાં ઉત્સાહ જોવા મળી રહ્યો છે. જોકે પ્લેટફોર્મના નામની સત્તાવાર જાહેરાત ટૂંક સમયમાં કરવામાં આવશે, પરંતુ ચર્ચા છે કે મોટા પ્લેટફોર્મ સાથે આ માટેના કરાર થઈ ચૂક્યા છે.
આ ફિલ્મમાં અદિવી શેષ અને મૃણાલ ઠાકુર ઉપરાંત મનોરંજન જગતના દિગ્ગજો પણ સામેલ છે. ફિલ્મમાં અનુરાગ કશ્યપ, પ્રકાશ રાજ અને અતુલ કુલકર્ણી જેવા દમદાર કલાકારો મહત્વની ભૂમિકામાં જોવા મળશે. અન્નપૂર્ણા સ્ટુડિયો દ્વારા પ્રોડ્યુસ કરવામાં આવેલી આ ફિલ્મની સિનેમેટોગ્રાફી અને મ્યુઝિક પણ તેના એક્શન સીન્સને વધુ રોમાંચક બનાવે છે. જે લોકો થિયેટરમાં આ ફિલ્મ જોવાનું ચૂકી ગયા છે, તેમના માટે મે મહિનાની શરૂઆતમાં આ એક મોટી ભેટ સાબિત થશે.