મુંબઈ, તા. ૨૭: બોલિવૂડમાં મિસ્ટર પરફેક્ટનિસ્ટ તરીકે ઓળખાતા આમિર ખાન હંમેશા કંઈક નવું કરીને તેના ચાહકોને આશ્ચર્યચકિત કરવા માટે જાણીતા છે. રવિવારે મુંબઈમાં યોજાયેલા એક ખાસ કાર્યક્રમમાં આમિરે સાબિત કરી દીધું કે અભિનય સિવાય પણ તે ઘણું બધું કરી શકે છે. તેના પ્રોડક્શન વેન્ચર હેઠળ બની રહેલી ફિલ્મ 'એક દિન'ના પ્રમોશનલ ઈવેન્ટમાં આમિરે લાઈવ ગાઈને સૌના દિલ જીતી લીધા હતા. ૧૯૯૮માં 'આતી ક્યા ખંડાલા' ગાયા બાદ લાંબા સમય પછી આમિરનો આ સિંગિંગ અંદાજ જોવા મળ્યો છે.
સ્ટેજ પર કર્યો ખુલાસો: બે વર્ષની મહેનત
આમિર ખાને સ્ટેજ પર આવીને બધાની સામે કબૂલાત કરી હતી કે તે છેલ્લા બે વર્ષથી સંગીત શીખી રહ્યો છે. કાર્યક્રમમાં તેના સંગીત ગુરુ પણ હાજર રહ્યા હતા. ગીત શરૂ કરતા પહેલા આમિરે તેની ગર્લફ્રેન્ડ ગૌરી તરફ જોઈને ખૂબ જ મીઠા અંદાજમાં કહ્યું, 'ગૌરી, મને શુભકામનાઓ આપો'. ત્યારબાદ તેણે ફિલ્મ 'એક દિન'નું ટાઇટલ ટ્રેક ગાયું હતું, જેને સાંભળીને ત્યાં હાજર તમામ લોકો પ્રભાવિત થઈ ગયા હતા. સોશિયલ મીડિયા પર આ વીડિયો વાયરલ થતા ચાહકો કહી રહ્યા છે કે, "આમિર માટે એવું કંઈ જ નથી જે તે ન કરી શકે."
સાઈ પલ્લવીનું હિન્દી ડેબ્યૂ
આ ફિલ્મમાં સાઉથની સુપરસ્ટાર સાઈ પલ્લવી અને આમિરનો પુત્ર જુનૈદ ખાન મુખ્ય ભૂમિકામાં છે. કાર્યક્રમ દરમિયાન સાઈ પલ્લવી પણ હાજર હતી. પોતાની પહેલી હિન્દી ફિલ્મ વિશે વાત કરતા તેણે કહ્યું, "હું ખરેખર ખૂબ નર્વસ છું. આ એક સુંદર સફર રહી છે. જુનૈદ ખૂબ જ સારો સહ-કલાકાર અને આજ્ઞાકારી બાળક જેવો છે. હિન્દી સિનેમામાં મારું આ ડેબ્યૂ મારા માટે ખૂબ ખાસ છે."
જુનૈદ ખાન માટે પિતાનો સપોર્ટ
જુનૈદ ખાનની આ સફરમાં આમિર ખાન પડછાયાની જેમ તેની સાથે રહી રહ્યો છે. ફિલ્મ 'એક દિન' ના પ્રમોશન માટે આમિર જે રીતે સક્રિય છે તે જોઈને લાગે છે કે આ ફિલ્મ બોક્સ ઓફિસ પર કંઈક નવું કરવા જઈ રહી છે. સંગીત શીખ્યા બાદ આમિર હવે પ્લેબેક સિંગિંગમાં પણ પોતાની કારકિર્દી આગળ વધારશે કે કેમ તે જોવું રસપ્રદ રહેશે. હાલમાં તો નેટીઝન્સ આમિરના આ અવાજ અને તેની આટલી મોટી ઉંમરે પણ કંઈક નવું શીખવાની ધગશના ભરપેટ વખાણ કરી રહ્યા છે.