મુંબઈ : રણબીર કપૂર અને યશ અભિનીત અત્યંત ચર્ચાસ્પદ ફિલ્મ રામાયણના નિર્માતાઓએ થિયેટરોમાં ફિલ્મનું રેકોર્ડિંગ કરીને સોશિયલ મીડિયા પર વાયરલ કરનારાઓ સામે લાલ આંખ કરી છે. નિર્માતાઓએ એક કાનૂની નોટિસ જારી કરીને ચેતવણી આપી છે કે જે કોઈ પણ વ્યક્તિ સ્ક્રીનિંગ દરમિયાન દ્રશ્યો રેકોર્ડ કરશે અથવા તેને ઓનલાઈન પ્લેટફોર્મ પર વગર પરવાનગીરે શેર કરશે, તેની સામે ફોજદારી, દીવાની અને અદાલતી તિરસ્કારની કાર્યવાહી કરવામાં આવશે.

આ નોટિસમાં બોમ્બે હાઈકોર્ટના ૨ નવેમ્બર ૨૦૨૬ અને ૬ નવેમ્બર ૨૦૨૬ ના રોજ આપવામાં આવેલા બે મહત્વપૂર્ણ આદેશોનો ઉલ્લેખ કરવામાં આવ્યો છે. અદાલતના આદેશ મુજબ કોઈપણ વ્યક્તિ દ્વારા ફિલ્મ અથવા તેના કોઈપણ ભાગને રેકોર્ડ કરવા, અપલોડ કરવા કે શેર કરવા પર સંપૂર્ણ પ્રતિબંધ મૂકવામાં આવ્યો છે. નિર્માતાઓએ સ્પષ્ટતા કરી છે કે આ પ્રકારનું કૃત્ય ફક્ત કોપીરાઈટ ભંગ નથી, પરંતુ તે એક મોટો ગુનો છે.

નોટિસમાં જણાવવામાં આવ્યું છે કે કાયદાકીય જોગવાઈઓ હેઠળ કોપીરાઈટ એક્ટ ૧૯૫૭, સિનેમેટોગ્રાફ એક્ટ ૧૯૫૨, બીએનએસ ૨૦૨૩ અને આઈટી એક્ટ ૨૦૦૦ અંતર્ગત જેલ અને દંડ જેવી ફોજદારી સજા થઈ શકે છે. પ્રોડક્શન ટીમે અગાઉથી જ આવા વીડિયો અપલોડ કરી ચૂકેલા લોકોને તેને તાત્કાલિક હટાવી લેવા માટે આદેશ આપ્યો છે અને પ્લેટફોર્મ્સને પણ તેની જાણ કરવાની ચીમકી આપી છે.

સોશિયલ મીડિયા પર વાયરલ થઈ રહેલી ક્લિપ્સમાં ભગવાન હનુમાન તરીકે સની દેઓલના દ્રશ્ય ઉપરાંત આંતરરાષ્ટ્રીય વર્ઝનનો એક એવો ક્રમ પણ સામે આવ્યો છે જેમાં શૂર્પણખાનું નાક કાપ્યા પછીનો સીન દર્શાવવામાં આવ્યો છે. નિતેશ તિવારી દ્વારા દિગ્દર્શિત અને નમિત મલ્હોત્રા તથા યશ દ્વારા નિર્મિત રામાયણ પાર્ટ ૧ માં રણબીર કપૂર ભગવાન રામ, સાઈ પલ્લવી માતા સીતા અને યશ રાવણના રોલમાં નજરે પડશે. આ ફિલ્મના બીજા ભાગની રિલીઝ દિવાળી ૨૦૨૮ માં નિર્ધારિત છે.