મુંબઇ તા. ૨૪: અક્ષય કુમાર હવે એક એવી દુનિયામાં જોવા મળશે, જેમાં તે પહેલાં કયારેય જોવા મળ્‍યા નથી, એ છે એલિયનની દુનિયા. અભિનેતાએ ‘સમુક'નું શુટિંગ શરૂ કરી દીધું છે. વિપુલ અમળતલાલ શાહ અને કનિષ્‍ક વર્માની આ મોટા પાયે બની રહેલી સર્વાઇવલ-એક્‍શન થ્રિલર છે, જેને ભારતની મોટી થિયેટ્રિકલ ફિલ્‍મોમાંની એક બનાવવાની તૈયારી છે. ફિલ્‍મ માટે આંતરરાષ્‍ટ્રીય ક્રિચર અને સ્‍ટંટ ટીમને પણ સાથે લેવામાં આવી છે.

વિપુલ અમળતલાલ શાહ દ્વારા નિર્મિત, કનિષ્‍ક વર્મા દ્વારા દિગ્‍દર્શિત અને આશિન એ. શાહ દ્વારા સહ-નિર્મિત આ ફિલ્‍મ મોટા સ્‍તરની પેન-ઇન્‍ડિયન થિયેટ્રિકલ ફિલ્‍મ છે, જેનું પ્રોડક્‍શન આંતરરાષ્‍ટ્રીય સ્‍તરનું છે. આ પ્રોજેક્‍ટ છેલ્લા બે વર્ષથી તૈયાર કરવામાં આવી રહ્યો હતો. કનિષ્‍ક વર્મા અને શાહે મળીને એવી દુનિયા બનાવી છે, જેમાં મિલિટરી રિયલિઝમ, સર્વાઇવલ હોરર અને એલિયન માયથોલોજીનું મિશ્રણ જોવા મળશે. વિપુલ શાહ દર્શકોની પસંદ અને નબળીને સમજે છે, પરંતુ હંમેશા એક જ ફોર્મ્‍યુલાને અનુસરતા નથી. તેમની ફિલ્‍મોમાં થ્રિલર, ફેમિલી ડ્રામા, રોમાન્‍સ, કોમેડી, એક્‍શનથી લઈને હવે એલિયન સર્વાઇવલ જેવા અલગ-અલગ જૉનર જોવા મળ્‍યા છે. જોકે, આ બધામાં એક વાત સામાન્‍ય છે, મજબૂત અને રસપ્રદ વાર્તાઓને ઓળખવાની તેમની સમજ.

‘સમુક' સાથે તેમનો આ જ અભિગમ હવે એક એવી દુનિયામાં પહોંચ્‍યો છે, જે ભારતીય સિનેમામાં અત્‍યાર સુધી બહુ જોવા મળી નથી. ‘સમુક'ની સૌથી ખાસ વાત છે ફિલ્‍મના એલિયનને તૈયાર કરવાની તેની રીત. ઓસ્‍કર માટે નોમિનેટ થયેલા ક્રિચર ઇફેક્‍ટ્‍સ ડિઝાઇનર એલેક્‍સ ગિલિસે ફિલ્‍મના મુખ્‍ય એલિયનને ડિઝાઇન કર્યો છે. ગિલિસ ‘એલિયન' અને ‘પ્રિડેટર' ફ્રેન્‍ચાઇઝી તેમજ ‘એલિયન રોમ્‍યુલસ' પર પણ કામ કરી ચુકયા છે. ફિલ્‍મમાં અન્‍ય આંતરરાષ્‍ટ્રીય ટેક્‍નિશિયનોને પણ સામેલ કરવામાં આવ્‍યા છે. તેમાં બ્રિટિશ એક્‍શન ડિરેક્‍ટર લ્‍યુક ટમ્‍બરનો સમાવેશ થાય છે. તેઓ ફિલ્‍મના એક્‍શનને ડિઝાઇન કરવાની સાથે તેનું દિગ્‍દર્શન પણ કરી રહ્યા છે, જેથી ફિલ્‍મમાં જોરદાર અને પડકારજનક એક્‍શન જોવા મળે.