મુંબઈ, તા.૨૧: ભોજપુરી ફિલ્મ ઈન્ડસ્ટ્રીમાં પોતાની દમદાર એક્ટિંગ અને શાનદાર કેમિસ્ટ્રીથી રાજ કરનારી જોડી પાખી હેગડે અને દિનેશ લાલ યાદવ 'નિરહુઆ' ફરી એકવાર ભારે ચર્ચામાં આવ્યા છે. ભોજપુરી સિનેમાની જાણીતી અભિનેત્રી પાખી હેગડેએ તાજેતરમાં એક એવો ધડાકો કર્યો છે જેનાથી સમગ્ર ઇન્ડસ્ટ્રી ચોંકી ગઈ છે. રિયાલિટી શો 'ભોજપુરી બાવાલ' ના સેટ પર પાખીએ ખુલાસો કર્યો હતો કે સુપરસ્ટાર નિરહુઆએ એક સમયે તેને લગ્નનો પ્રસ્તાવ મૂક્યો હતો. આ ખુલાસો સાંભળીને દિનેશ લાલ યાદવ સાથે અવારનવાર જોડાતી અભિનેત્રી આમ્રપાલી દુબે આઘાતમાં સરી પડી હતી.

"અમે માત્ર મિત્રો નહોતા, તેથી વધુ હતા"

પત્રકાર શુભંકર મિશ્રા દ્વારા લેવાયેલા એક ખાસ ઈન્ટરવ્યુમાં જ્યારે પાખીને પૂછવામાં આવ્યું કે દિનેશ સાથે તેનો સંબંધ માત્ર વ્યાવસાયિક હતો કે કંઈક વિશેષ? ત્યારે પાખીએ ખુલ્લેઆમ સ્વીકાર્યું કે તેઓ માત્ર સારા મિત્રો જ નહીં પરંતુ "મિત્રો કરતાં પણ વધુ" ખાસ સંબંધ ધરાવતા હતા. ત્યારબાદ જ્યારે તેને પૂછવામાં આવ્યું કે શું દિનેશે ક્યારેય તેને લગ્ન માટે પ્રપોઝ કર્યું હતું?, ત્યારે થોડો સમય ભાવુક થઈને અટકી ગયા બાદ પાખીએ "હા" માં જવાબ આપ્યો હતો. આ જવાબ સાંભળીને નજીક બેઠેલી આમ્રપાલી દુબે પણ આશ્ચર્યચકિત થઈ ગઈ હતી અને તેના મોંમાંથી "ગંભીરતાથી?" એવો ઉદ્ગાર નીકળી ગયો હતો.

નિરહુઆની એન્ટ્રી અને નર્વસનેસ

આ ખુલાસાના થોડા જ સમય બાદ લાઈવ સેટ પર દિનેશ લાલ યાદવે પ્રવેશ કર્યો હતો. દિનેશને જોતાં જ પાખી પોતાના આંસુ રોકી શકી ન હતી અને અત્યંત ભાવુક થઈ ગઈ હતી. દિનેશે તેને પ્રેમથી ગળે લગાવી હતી. જોકે, જ્યારે પત્રકારે દિનેશને સીધો સવાલ પૂછ્યો કે "શું તમે પાખીના પ્રેમમાં હતા?", ત્યારે નિરહુઆએ કોઈ સીધો જવાબ આપવાને બદલે માત્ર પાણીનો ગ્લાસ ઉઠાવીને ચુસ્કી લીધી હતી અને તેમની નર્વસનેસ કેમેરામાં સ્પષ્ટપણે કેદ થઈ ગઈ હતી.

ઉલ્લેખનીય છે કે પાખી અને દિનેશે 'નિરહુઆ રિક્ષાવાલા', 'ગંગા દેવી' અને 'સાત સહેલીયા' જેવી ઘણી સુપરહિટ ફિલ્મોમાં સાથે કામ કર્યું છે. હાલમાં આ ડ્રામેટિક ક્ષણો ધરાવતો શો 'ભોજપુરી બાવાલ' દરરોજ રાત્રે જીઓહોટસ્ટાર (JioHotstar) અને કલર્સ ટીવી પર પ્રસારિત થઈ રહ્યો છે, જેણે દર્શકોમાં ભારે આકર્ષણ જમાવ્યું છે.