મુંબઈ, તા.19: બોલિવૂડની ગ્લેમરથી ભરેલી દુનિયામાં કામ કરતા કલાકારો હંમેશા પોતાના ફેન્સના દિલ પર રાજ કરે છે. પરંતુ ગ્લેમર લાઈમલાઈટ વચ્ચે પણ કેટલાક સ્ટાર્સ એવા છે જેઓ ભારત છોડીને વિદેશમાં સ્થાયી થવાનું પસંદ કરી ચૂક્યા છે. કોઈએ લગ્ન બાદ વિદેશની વાટ પકડી તો કોઈ પોતાના બાળકોના સારા ભવિષ્ય અને અભ્યાસ માટે દેશ છોડીને સાત સમુદ્ર પાર વસી ગયું છે. ચાલો જાણીએ બોલિવૂડના એવા જાણીતા ચહેરાઓ વિશે જેઓ હવે ભારતમાં નહીં પરંતુ વિદેશમાં પોતાનું જીવન વિતાવી રહ્યા છે.

અનુષ્કા શર્મા અને વિરાટ કોહલી (લંડન)
અભિનેત્રી અનુષ્કા શર્મા અને ભારતીય ક્રિકેટર વિરાટ કોહલી તેમના બાળકો સાથે લંડનમાં સ્થાયી થયા છે. ગ્લેમર અને મીડિયાની લાઈમલાઈટથી દૂર બંને પોતાના બાળકો સાથે ખૂબ જ પ્રાઈવેટ અને શાંતિપૂર્ણ જીવન જીવી રહ્યા છે. આ જ કારણ છે કે તેઓ સોશિયલ મીડિયા પર પણ પોતાના બાળકોના ચહેરા ફેન્સ સાથે શેર કરવાનું ટાળે છે.

પ્રિયંકા ચોપરા અને પ્રીતિ ઝિન્ટા (અમેરિકા)
દેશી ગર્લ પ્રિયંકા ચોપરાએ હોલીવુડ સિંગર નિક જોનાસ સાથે લગ્ન કર્યા બાદ યુનાઈટેડ સ્ટેટ્સમાં પોતાનો આશિયાનો બનાવ્યો છે. તે પતિ નિક અને પુત્રી માલતી સાથે લોસ એન્જલસમાં રહે છે. તેવી જ રીતે 'ડિમ્પલ ગર્લ' પ્રીતિ ઝિન્ટા પણ જીન ગુડઇનફ સાથે લગ્ન કર્યા બાદ અમેરિકામાં સ્થાયી થઈ ગઈ છે અને હવે જોડિયા બાળકો સાથે ત્યાં જીવન વિતાવે છે અને કામ અર્થે જ ભારત આવે છે.

સંજય દત્ત અને આર. માધવન (દુબઈ)
સંજુ બાબા એટલે કે સંજય દત્તનો આખો પરિવાર હાલ યુએઈના દુબઈમાં રહે છે. તેમના બાળકો પણ ત્યાં જ અભ્યાસ કરે છે, જોકે સંજય દત્ત શૂટિંગ અને પ્રોજેક્ટ્સ માટે મુંબઈ આવતા-જતા રહે છે. બીજી તરફ, અભિનેતા આર. માધવને પણ પોતાના પુત્ર વેદાંતની સ્વિમિંગ ટ્રેનિંગ અને કરિયરને પ્રોત્સાહન આપવા માટે દુબઈ શિફ્ટ થવાનો નિર્ણય લીધો હતો, જેના પરિણામે તેના પુત્રએ સ્વિમિંગ ક્ષેત્રે ભારતનું નામ રોશન કર્યું છે.

મલ્લિકા શેરાવત અને અપૂર્વ માખીજા (ફ્રાન્સ અને ન્યૂ યોર્ક)
બોલ્ડ બોલિવૂડ એક્ટ્રેસ મલ્લિકા શેરાવત ઘણા સમયથી ફ્રાન્સમાં પોતાના આલીશાન વિલામાં રહે છે અને અવારનવાર ત્યાંના ફોટોઝ શેર કરતી રહે છે. જ્યારે 'રેબેલ કિડ' તરીકે જાણીતી સોશિયલ મીડિયા ઈન્ફ્લુએન્સર અને એક્ટ્રેસ અપૂર્વ માખીજાએ પણ હાલમાં જ જાહેરાત કરી છે કે તે હવે ન્યૂ યોર્કમાં સ્થળાંતરિત થઈ ગઈ છે અને ભારત છોડી ચૂકી છે.