મુંબઈ,: બોલિવૂડની 'ગંગુબાઈ' અને 'બ્રહ્માસ્ત્ર'ની આલિયા ભટ્ટ હવે એક નવા જ મિશન પર નીકળી છે. આલિયાની આગામી ફિલ્મ 'આલ્ફા'નું ટીઝર રિલીઝ થતાં જ સોશિયલ મીડિયા પર ધૂમ મચાવી રહ્યું છે. સામાન્ય રીતે લાગણીસભર અને ગંભીર ભૂમિકાઓ માટે જાણીતી આલિયા આ ફિલ્મમાં એક પાવર-પેક્ડ એક્શન હીરોઈન તરીકે જોવા મળી રહી છે. તેના આ અદભૂત પરિવર્તનને જોઈને માત્ર ચાહકો જ નહીં, પણ બોલિવૂડના દિગ્ગજ કલાકારો પણ આશ્ચર્યચકિત થઈ ગયા છે.
સુપરસ્ટાર શાહરૂખ ખાને આલિયાના વખાણ કરતા સોશિયલ મીડિયા પર એક ખાસ સંદેશ લખ્યો છે. તેમણે 'ડિયર જિંદગી'ની પોતાની સહ-કલાકારના વખાણ કરતા કહ્યું, "'આલ્ફા' દિલ જીતવાની સાથે સાથે ખલનાયકોને ધૂળ ચટાડવામાં પણ કોઈ કસર નહીં છોડે. તેમને 'સિગ્મા ગર્લ' તરીકે જોવી અદ્ભુત છે! લોર્ડ બોબી, તમે જ્યારે ખલનાયક બનો છો ત્યારે પણ ખૂબ જ સરસ લાગે છે." શાહરૂખે આલિયા અને ફિલ્મના દિગ્દર્શક શિવ રવૈલને ખૂબ ખૂબ શુભેચ્છાઓ પાઠવી હતી.
બીજી તરફ, 'બ્રહ્માસ્ત્ર'માં આલિયા સાથે કામ કરી ચૂકેલા મહાનાયક અમિતાભ બચ્ચને પણ પોતાના ટ્વિટર (X) એકાઉન્ટ પર ટીઝર શેર કરીને આલિયા માટે પ્રેમ વ્યક્ત કર્યો છે. બિગ બીએ ટ્વિટ કર્યું, "મારી પ્રિય આલિયાને ખૂબ ખૂબ પ્રેમ અને શુભેચ્છાઓ." દિગ્ગજ કલાકારો તરફથી મળેલી આ પ્રતિક્રિયા દર્શાવે છે કે આલિયાએ પોતાના અભિનયમાં કેટલું મોટું જોખમ ઉઠાવ્યું છે અને તે તેમાં કેટલી સફળ રહી છે.
શિવ રવૈલ દ્વારા નિર્દેશિત 'આલ્ફા' એ આદિત્ય ચોપરાના 'YRF સ્પાય યુનિવર્સ'નો એક મહત્વનો ભાગ છે. આ પ્રથમ વખત છે જ્યારે આ યુનિવર્સમાં કોઈ ફિલ્મનું નેતૃત્વ મહિલા પાત્ર કરી રહ્યું છે. આ ફિલ્મમાં આલિયા સાથે શર્વરી વાઘ પણ મુખ્ય ભૂમિકામાં જોવા મળશે. 'એક થા ટાઈગર', 'વોર' અને 'પઠાણ' જેવી હિટ ફિલ્મો બાદ હવે 'આલ્ફા' પ્રેક્ષકોને એક નવી એક્શન સ્ટાઈલ જોવા મળશે.

ઘણી વખત રિલીઝ ડેટમાં ફેરફાર થયા બાદ, આખરે આ ફિલ્મ હવે ૩ જુલાઈએ સિનેમાઘરોમાં ધૂમ મચાવવા માટે તૈયાર છે. આલિયાના આ નવા 'સ્પાય' અંદાજને જોવા માટે દર્શકોમાં અત્યારથી જ ભારે ઉત્સુકતા જોવા મળી રહી છે. શું આલિયા પણ પઠાણ અને ટાઈગરની જેમ બોક્સ ઓફિસ પર રેકોર્ડ તોડશે? તે તો ફિલ્મ રિલીઝ થયા બાદ જ ખબર પડશે, પરંતુ ટીઝરે ચોક્કસપણે બોલિવૂડમાં એક નવી આશા જગાવી છે.