મુંબઈ: જાહ્નવી કપૂરની આગામી ફિલ્મ 'પેડ્ડી' હાલ સોશિયલ મીડિયા પર આક્રોશનું કેન્દ્ર બની છે. ફિલ્મમાં અભિનેત્રીના પાત્રને વાંધાજનક રીતે રજૂ કરવાના અને કેમેરા એંગલ્સ દ્વારા ઓબ્જેક્ટિફિકેશન કરવાના ગંભીર આક્ષેપો થઈ રહ્યા છે. આ ડામાડોળ સ્થિતિમાં જાહ્નવીના સહ-અભિનેતા જગપતિ બાબુ તેના સમર્થનમાં અવાજ ઉઠાવતા જોવા મળ્યા છે. તેમણે દર્શકોને ટ્રોલિંગ કરવાનું બંધ કરવાની વિનંતી કરી છે.
'જાહ્નવીએ તો માત્ર પોતાનું કામ કર્યું છે'
ઈનાડુના અહેવાલ મુજબ, જગપતિ બાબુએ જાહ્નવીનો બચાવ કરતા સ્પષ્ટ શબ્દોમાં જણાવ્યું હતું કે, "એક કલાકાર તરીકે જાહ્નવીએ તે જ કર્યું છે જે તેને દિગ્દર્શકે કરવા માટે કહ્યું હતું. કોઈ પણ ફિલ્મમાં લેવાયેલા સર્જનાત્મક નિર્ણયો માટે કલાકારને વ્યક્તિગત રીતે ટ્રોલ કરવા તે અયોગ્ય છે. તે બિચારી છોકરીએ પોતાની ભૂમિકા ભજવી છે, પરંતુ વસ્તુઓ ક્યારેક ખોટી દિશામાં જાય છે. લોકોએ તેણીને માનસિક પીડા આપવાનું બંધ કરવું જોઈએ."
નિર્માતાની માફી અને સુધારાના સંકેત
વધતા જતાં વિરોધને જોઈને ફિલ્મના નિર્માતા અને દિગ્દર્શક બુચી બાબુ સનાએ સોશિયલ મીડિયા દ્વારા માફી માંગી છે. તેમણે સ્વીકાર્યું કે તેમનો ઈરાદો ક્યારેય કોઈ સ્ત્રી પાત્રનું અપમાન કરવાનો કે કોઈને અસ્વસ્થ કરવાનો નહોતો. દિગ્દર્શકે ખાતરી આપી છે કે, પ્રેક્ષકો તરફથી મળેલો પ્રતિસાદ તેમણે ગંભીરતાથી લીધો છે અને વિવાદિત દ્રશ્યોને ફિલ્મમાંથી સંપાદિત (Edit) કરવામાં આવશે.
જાહ્નવીનું મૌન અને સોશિયલ મીડિયાનો આક્રોશ
જ્યાં એક તરફ ફિલ્મ જગતના વરિષ્ઠ કલાકારો અને નિર્માતાઓ આ મામલે સ્પષ્ટતા કરી રહ્યા છે, ત્યાં બીજી તરફ જાહ્નવી કપૂરે હજુ સુધી આ વિવાદ પર કોઈ સત્તાવાર પ્રતિક્રિયા આપી નથી. દર્શકોનો એક મોટો વર્ગ હજુ પણ આક્રોશ વ્યક્ત કરી રહ્યો છે કે ફિલ્મોમાં સ્ત્રીઓની રજૂઆત અત્યંત સભાનતાથી થવી જોઈએ.
જગપતિ બાબુની આ અપીલ શું સોશિયલ મીડિયા પર ચાલી રહેલા ટ્રોલિંગને રોકી શકશે? અને શું ખરેખર દ્રશ્યો હટાવ્યા બાદ વિવાદ શમશે? તે જોવું રહ્યું. હાલ તો ફિલ્મ જગતમાં કલાકારોની સર્જનાત્મક સ્વતંત્રતા અને કલાકારની મર્યાદાઓ વચ્ચેનો સંઘર્ષ ચર્ચાનું કેન્દ્ર બન્યો છે.